އިހްތިސާސްގައި ހިމެނޭ ބިންތައް ނަގާތީ ޝާހިދުގެ ނުރުހުން ސަރުކާރަށް

ރަށްރަށުގެ އިހްތިސާސްގައި ހިމެނޭ ބިންތައް ނެގުމަށް ސަރުކާރުން ކުރަމުންގެންދާ މަސައްކަތަކީ ސީދާ ދިވެހި ރައްޔިތުންނާ ދެކޮޅަށް ކުރާ ކަމެއްކަމަށް އެމްޑީޕީގެ ރައީސް އަބްދުﷲ ޗާހިދު ވިދާޅުވެއްޖެއެވެ.

ސަރުކާރުން ބޭނުންވެއްޖެ ހިނދެއްގައި ރަށްރަށުގެ ކައުންސިލްތަކުގެ އިހްތިސާސްގައި ހިމެނޭ ބިންތައް ނެގޭ އިސްލާހެއް ރައްޔިތުންގެ މަޖިލީހަށް ވަނީ ހުށަހަޅާފައެވެ. މިކަމާ ގުޅޭގޮތުން އެކްސްގައި ކުރެއްވި ޕޯސްޓެއްގައި ޝާހިދު ވިދާޅުވީ، ރަށްރަށުގެ އިޙްތިސާސްގައި ހިމެނޭ ބިންތައް ރައްޔިތުންގެ ބަހެއްނެތި ނެގޭ ގޮތަށް ބަދަލު ގެންނަން ހުށަހަޅައިފައިވާ އިސްލާޙަކީ ސީދާ ރައްޔިތުންނާ ދެކޮޅަށް ކުރާ ކަމެއްކަމަށެވެ.

މިއީ ސަރުކާރުން ޚުދުމުޚްތާރުކޮށް ހިންގާ އަނިޔާވެރި ޢަމަލެއްކަން ފާހަގަކުރައްވަމުން ޝާހިދު ވަނީ މިކަން ހުއްޓާލަން ސަރުކާރަށް ގޮވާލާފައެވެ. އަދި މިކަމުގައި އެމްޑީޕީން ދިވެހި ރައްޔިތުންނާއި ކައުންސިލުތަކާއި އެކު ސާބިތުވެ ތިބޭނެކަމަޑްވެސް ޝާހިދު ވިދާޅުވިއެވެ.

ސަރުކާރުން ބޭނުންވާ ޕްރޮޖެކްޓްތައް ކުރިއަށްގެންދިއުމަށް ބޭނުންވެއްޖެ ހިނދެއްގައި ކައުންސިލްގެ އިހްތިސާސްގެ ދަށުގައިވާ ބިންތައް ނެގޭގޮތަށް ލާމަރުކަޒީ ޤާނޫނަށް އެ އިސްލާހް ހުށަހަޅާފައިވަނީ، ތުޅާދޫ ދާއިރާގެ މެމްބަރު އަބްދުލްހަންނާނެވެ. އެ އިސްލާހާ ގުޅިގެން ބައެއް ފަރާތްތަކުން ގެންދަނީ ކަންބޮޑުވުން ފާޅުކުރަމުންނެވެ. މިކަމާ ގުޅިގެން އިދިކޮޅު ފަރާތްތަކުން ވަނީ އިސްލާހް އަނބުރާ ގެންދިއުމަށް ގޮވާލާފައެވެ.

ލާމަރުކަޒީ ޤާނޫނަށް ގެނެސްފައިވާ އެ އިސްލާހާ ދެކޮޅަށް ޕެޓިޝަނެއް ހަދާފައިވާއިރު، އެ ޕެޓިޝަނުގައި ބައެއް ފަރާތްތަކުން މިހާރުވެސް ވަނީ ސޮއިކޮށްފައެވެ.