ކުރިއަށް އޮތް ދެ އަހަރު ވާނީ ރިޔާސީ ވައުދުތައް ފުއްދުމުގެ މަސައްކަތް ބާރަށް ކުރިއަށްދާ ދެ އަހަރަށް: ރައީސް މުޢިއްޒު

ކުރިއަށް އޮތް ދެ އަހަރު ވެގެންދާނީ އެމަނިކުފާނު ރިޔާސީ އިންތިޚާބުގެ ކެމްޕެއިންގެ ތެރެއިން ރަށްރަށް ވަޑައިގެން ރައްޔިތުންނަށް ވެވަޑައިގެންނެވި ވައުދުފުޅުތައް ފުއްދުމުގެ އަމަލީ މަސައްކަތް ފެށިގެންދާނެ ދެ އަހަރަށް ކަމުގައި ރައީސް ޑރ.މުހައްމަދު މުއިއްޒު މިއަދު ވިދާޅުވެއްޖެއެވެ.

ރައީސް މިހެން ވިދާޅުވީ އއ. އަދި ކ. އަތޮޅުގެ ބައެއް ރަށްތަކަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ތޮއްޑުއަށް ވަޑައިގެން އެ ރަށު ރައްޔިތުންނާ ބައްދަލު ކުރައްވައި ވާހަކަފުޅު ދައްކަވަމުންނެވެ.

މި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، އެމަނިކުފާނުގެ ވެރިކަމުގެ ފުރަތަމަ އަހަރު ނިމިގެންދިޔައިރު ތަންފީޒު ކުރަމުން މިދަނީ، ނިމިދިޔަ ސަރުކާރުން އެކުލަވައިލި، އެމްޑީޕީގެ މެޖޯރިޓީ އޮތް މަޖިލީހުން އޭރު ފާސްކުރި ބަޖެޓެއް ކަމަށެވެ. އަދި އެ ބަޖެޓް ފާސްކުރިީ، އަދުގެ ސަރުކާރުން ހުށަހެޅި އެއްވެސް ކަމަކަށް ރިޢާޔަތް ނުކޮށް ކަމަށެވެ.

އެހެންކަމުން ފުުރަތަަމަ އަހަރު ތަރައްޤީގެ މަޝްރޫއުތައް ނުހިންގުނު ކަމަށް ވިދާޅުވިއެވެ.

އަދި މިހާރު ޕީއެންސީގެ މެޖޯރިޓީ އޮތް މަޖިލީހެއް އޮތް ނަމަވެސް މި އަހަރުގެ ނިޔަލަށް ހިނގަމުން ދާނީ ކުރީ ސަރުކާރުން ފާސްކޮށްފައިވާ ބަޖެޓު ކަމަށާ އެ ހަގީގަތް ބަދަލު ނުވާނެ ކަމަށް އެމަނިކުފާނު ވިދާޅުވިއެވެ.

އެހެންނަމަވެސް މިހާރު ފާސްކޮށްފައިވާ ބަޖެޓަކީ ރައްޔިތުންނަށް ބޭނުންވާ ކަންކަން ކޮށްދެއްވައި އެމަނިކުފާނުގެ ވައުދުފުޅުތައް ފުއްދުމަށް އެކުލަވާލެވިފައިވާ ބަޖެޓު ކަން ރައީސް ފާހަގަކުރެއްވިއެވެ.

"އިރާދަކުރެއްވިއްޔާ 2025 އަދި 2026 ވެގެންދާނީ އަޅުގަނޑު ރިޔާސީ އިންތިޚާބުގައި ރަށްރަށަށް ގޮސް ވެފައި ހުރި ވައުދުތައް ފުއްދުމަށްޓަކައި އަމަލީ ގޮތުން އެ މަސައްކަތްތައް ހިނގާ ދެ އަހަރަށް. މި އަންނަ އަހަރުގެ ޖެނުއަރީން ފެށިގެން ޑިސެމްބަރ އާ ހަމައަށް އަދި 2026 މި 24 މަހުގެ ތެރޭގައި އިރާދަކުއްރެއްވިއްޔާ ރާއްޖޭގެ ހުރިހާ ކަންކޮޅެއްގައި ބަހާލެވިގެން، ތަރުތީބެއްގެ ތެރެއިން އަޅުގަނޑު ވެފައި ހުރި ހުރިހާ ވައުދެއް. އެއީ ބަނދަރު، މަގު، ބިން ހިއްކުން، ސްކޫލު ހޮސްޕިޓަލް، ކިޔާނެ ކަމެއް ނެތް، ކުޅިވަރާ ބެހޭ ކަންކަން ތަރުތީބެއްގެ ތެރެއިން އަމަލީ ގޮތުން މަސައްކަތް ފަށައި، އަދި އެކި މަޝްރޫއުތައް ނިމެމުންވެސް ދާނެ"،

ރައީސް ޑރ މުހައްމަދު މުޢިއްޒު

އަންނަ އަހަރަށް ލަފާކޮށް ސަރުކާރުން ހުށަހަޅައި ފާސްކޮށްފައި ވަނީ 56.6 ބިލިއަން ރުފިޔާގެ ބަޖެޓެކެވެ.

މީގެ ތެރެއިން، ހަރަދުގެ ގޮތުގައި ހިނގާނީ 49.2 ބިލިއަން ރުފިޔާ އެވެ އެއީ ރިކަރަންޓް ހަރަދުގެ ގޮތުގައި 35.9 ބިލިއަން ރުފިޔާއާއި ކެޕިޓަލް ޚަރަދުގެ ގޮތުގައި 13.3 ބިލިއަން ރުފިޔާ އެވެ.