މީގެ 21 މަސް ކުރީން، ވީނުވީއެއް ނޭނގި ގެއްލުނު ދަރިފުޅު ފެނުނީ އިސްރާއީލު ސިފައިން އާންމުކުރި ފޮޓޯއަކުން

ފާއިތުވި 21 މަސްދުވަހު ވީނުވީއެއް ނޭނގި ގެއްލިފައިވާ ފަލަސްތީނުގެ ޒުވާނަކު، އިސްރާއީލު ސިފައިންގެ މީހަކު އިންސްޓަގްރާމްގައި ހިއްސާކުރި ފޮޓޯއަކުން އޭނާގެ އާއިލާއަށް ފެނިއްޖެއެވެ.

އުމުރުން 22 އަހަރުގެ މަޙްމޫދު އަތަالله އަލް-ދިރިމްލީ ފެންނަ މި ފޮޓޯއިން ފެންނަނީ، އޭނާގެ ލޯބަނދެ، ބިޑިއަޅުވާފައި ވަނިކޮށް އިސްރާއީލުގެ ދެ އަންހެން ސިފައިންގެ މެދުގައި ބައިންދާފައެވެ. މި ފޮޓޯއާއެކު އޭނާ ދިރިހުރިކަން ކަށަވަރުވީ ނަމަވެސް، އޭނާ މިހާރު ހުރި ތަނަކާއި، ސިއްހީ ހާލަތާއި އަދި އޭނާއާ މެދު އަމަލުކުރަމުންދާ ގޮތްތަކާ މެދު ވަނީ ކަންބޮޑުވުން އުފެދިފައެވެ.

މަޙްމޫދު ގެއްލިފައިވަނީ 2 ނޮވެމްބަރު 2024 ގައެވެ. އޭނާ ގެއްލުނީ ނެޓްޒާރިމް ކޮރިޑޯ މަގުން ޣައްޒާ ސިޓީއަށް އެނބުރި ދާން އުޅުމުގެ ތެރޭގައެވެ. އެއީ ޣައްޒާގެ އުތުރާއި ދެކުނު ވަކިކުރާ ސަރަހައްދު އިސްރާއީލު ސިފައިންގެ ފުރިހަމަ ކޮންޓްރޯލްގެ ދަށުގައި އޮތް ވަގުތެކެވެ.

އަނަޑޯލޫ އެޖެންސީއަށް މައުލޫމާތު ދެމުން މަޙްމޫދުގެ މަންމަ ބުނީ، މީގެ ކުރިން ރެޑް ކްރޮސް މެދުވެރިކޮށް އޭނާ ހޯދަން ކުރި އެއްވެސް މަސައްކަތަކުން ނަތީޖާއެއް ފެނިފައި ނުވާ ކަމަށެވެ.

"އެ ފޮޓޯ ފެނުމުން އޭނާ ދިރިހުރިކަން އެނގުމުން ހިތަށް ހަމަޖެހުމެއް ލިބުނު. އެކަމަކު އޭނާގެ ލޯބަނދެ ބިޑިއަޅުވާފައި ހުރި މަންޒަރު ފެނުމުން ހިތް ކުދިކުދިވި،" އޭނާ ބުންޏެވެ.

އަދި އެ ފޮޓޯ އާންމުކުރުމަކީ އޭނާގެ ދަރިފުޅަށް ލިބުނު ދެރައެއް ނޫން ކަމަށާއި، އެއީ އެ ފޮޓޯ ނަގައި އާންމުކުރި ބައެއްގެ ދަށުދަރަޖަ ހާމަކޮށްދޭ ކަމެއް ކަމަށްވެސް އޭނާ ބުންޏެވެ.

މަޙްމޫދުގެ ބޭބެ އަހުމަދު ބުނިގޮތުގައި، ދެ އަހަރެއްހާ ދުވަހުގެ މެދުކެނޑުމަކަށްފަހު ފެނުނު މި ފޮޓޯއަކީ އުންމީދުގެ ހުޅުކޮޅެއް ކަމަށެވެ. އޭނާ ވަނީ ބައިނަލްއަގުވާމީ އިންސާނީ ހައްގުތަކަށް މަސައްކަތްކުރާ ޖަމިއްޔާތަކުން މަޙްމޫދު ހުރި ތަނެއް ހޯދައިދިނުމަށް ގޮވާލާފައެވެ.

ފަލަސްތީނުގެ ގައިދީންގެ ކްލަބުން ހާމަކޮށްފައިވާ ގޮތުގައި، ޖުލައި މަހުގެ ކުރީކޮޅާ ހަމައަށް އިސްރާއީލުގެ ޖަލުތަކުގައި 9,400 އަށްވުރެ ގިނަ ފަލަސްތީނު މީހުން ބަންދުކޮށްފައި އެބަތިއްބެވެ.

އިންސާނީ ހައްގުތަކަށް މަސައްކަތްކުރާ ގުރޫޕްތަކުން ބުނާ ގޮތުގައި، ޣައްޒާއިން ހައްޔަރުކުރި އެތައް ސަތޭކަ ބައެއްގެ މައުލޫމާތާއި، އެމީހުން ބަންދުކޮށްފައި ތިބި ތަނެއް އަދި ސިއްހީ ހާލަތު އިސްރާއީލުން ހާމަނުކޮށް ހިފަހައްޓަމުންދާތީ އެމީހުންގެ އާއިލާތައް ވަނީ ބޮޑު ނުތަނަވަސްކަމެއްގެ ތެރޭގައެވެ.