ރައީސް މުޢިއްޒު، އިދިކޮޅަށް: ފައިސާ ނުދެއޭ ބުނާއިރު، ދިޔައީ 9 ބިލިއަން ރުފިޔާ ރައްޔިތުންނަށް ނުދީ
ރައީސުލްޖުމްހޫރިއްޔާ ޑރ މުހައްމަދު މުޢިއްޒު ވެރިކަމާއި ހަވާލުވެވަޑައިގެންނެވި އިރު ކުރީ ސަރުކާރުން ރައްޔިތުންނަށް ނުދީ އޮތް 9 ބިލިއަން ރުފިޔާ އޮތް ކަމަށް ވިދާޅުވެ، މަސްވެރިންނަށް ފައިސާ ނުދީގެން އެމްޑީޕީން ދައްކަމުންދާ ވާހަކަތަކަށް ވަރުގަދަ ރައްދު ތަކެއް އެމާނިކުފާނު ދެއްވައިފި އެވެ.
ވިލިނގިލީ ރައްޔިތުންނާ ބައްދަލު ކުރައްވައި ވާހަކަފުޅު ދައްކަވަމުން ރައީސް ޑރ. މުއިއްޒު ވިދާޅުވީ ވެރިކަމާއި ހަވާލުވެވަޑައިގެންނެވި ދުވަހުގައި ވެސް، ގައުމާއި މުޚާތަބު ކުރައްވައި ވާހަކަ ދެއްކެވި އިރު، ގައުމާއި ހަވާލުވެވަޑައިގަންނަވަނީ 120 ބިލިއަން ރުފިޔާގެ ބޮޑު ދަރަންޏަކާއި ކަން ފާހަގަކުރެއްވި ކަމަށެވެ.
ހަމައެހެންމެ ރާއްޖެ އޮތީ އިގްތިސާދީ އަނދަވަޅަކަށް ވެއްޓިފައި ކަމަށާ، އެ އަނދަވަޅުން އަރައިގަންނަން ޖެހޭ ކަމަށްވެސް ވިދާޅުވިކަން އެމަނިކުފާނު ފާހަގަކުރެއްވިއެވެ.
ރައީސް ވިދާޅުވީ ސަރުކާރުން މަސައްކަތް ކުރަނީ އެ ދަރަނި އަދާކުރަމުން އިގްތިސާދީ މަސައްކަތް ކުރަން ކަމަށެވެ.
"މިހާރު އެ ވާހަކަ އޮޅުވާލަން ބަޔަކު އުޅުނަސް، އެއީ އޮޅޭނެ ވާހަކައެއް ނޫން. އަޅުގަނޑުމެން އޮތީ ވަރަށް ބޮޑަށް އިގްތިސާދީ އަނދަވަޅަކަށް ވައްޓާލާފައި. އެހެންވެ، ރައްޔިތުން އެކަން ބަދަލު ކުރަން ބޭނުންވީ ވެސް. އެއީ ބޭރުގެ ދަރަނި. އެ ދަރަނި ދެއްކުމަށްޓަކައި އެތައް ކަމެއް އެބަ ކުރަން. އަޅުގަނޑުމެންގެ އަތުގައި ހުރި ފައިސާ އެކި ނަން ނަމުގައި މީހުންނަށް ބަހާލަމުން ނޫންތޯ ދިޔައީ ބަދަލު ދިނުމުގެ ނަމުގައި، އެއްވެސް އަސާސެއް ނެތް ސެޓަލްމަންޓް ކޮމިޓީއެއް ހަދައިގެން،"
ރައީސުލްޖުމްހޫރިއްޔާ ޑރ މުހައްމަދު މުޢިއްޒު
މިއާއެކު ރައީސް ވިދާޅުވީ މި ސަރުކާރު ވެރިކަމަށް އައިސް އެ ކޮމިޓީ އުވާލާފައި ކަމަށާ ބަދަލު ދިނުމަކީ މި ސަރުކާރުން ކުރާނެ ކަމެއް ނޫން ކަމަށެވެ. އެފަދަ ކަންކަމަކީ ރައްޔިތުންގެ ފައިސާ އިސްރާފް ކުރުން ކަމަށާ، އެ ކޮމިޓީ އުވާލެއްވީ ބޭއިންސާފުން ރައްޔިތުންގެ ފައިސާ އިސްރާފް ކުރަން ބޭނުން ނުވާތީ ކަމުގައި ރައީސް ވިދާޅުވިއެވެ.
މީގެ އިތުރުން ރައީސް މުޢިއްޒު ވިދާޅުވީ ، ރައްޔިތުންގެ ބޭނުން ތަކަށް ސޮވެރިން ޑިވެލޮޕްމަންޓް ފަންޑުގައި ރައްކާ ކޮށްފައި ހުރި ޑޮލަރުކޮޅު ވެސް ކުރީ ސަރުކާރުން ހުރީ ބޭނުންކޮށްފައި ކަމަށާ، އެ ފަންޑު ހުސްކޮށްލާފައި ވަނިކޮށް މި ސަރުކާރުން އެ ފަންޑަށް ޑޮލަރު ޖަމާ ކުރަން ފަށާފައިވާ ކަމަށެވެ. އަދި އެކަމާ ގުޅޭ ބިލެއް ސަރުކާރުގެ ފަރާތުން ރައްޔިތުންގެ މަޖިލިހަށް ހުށަހަޅާފައިވާނެ ކަންވެސް ފާހަގަކުރެއްވިއެވެ.
މިއާއެކު ރައީސް މުޢިއްޒު ވަނީ، ބޭރުގެ ދަރަނީގެ ގޮތުގައި އޮތް 120 ބިލިއަން ރުފިޔާގެ އިތުރުން, އެތެރޭގެ 9000 މިލިއަން (9 ބިލިއަން) ރުފިޔާގެ ދަރަނި ކުރީ ސަރުކާރު ނިމުނު އިރު އޮތް ކަމަށެވެ. އަދި އެ ފައިސާ އަކީ އާއްމު ރައްޔިތުންނަށް ދޭން ހުރި ފައިސާ ކަންވެސް އެމާނިކުފާނު ފާހަގަކުރެއްވި އެވެ.
"އެކަމަކު، އެ ބޭފުޅުން ވިދާޅުވަނީ ދަރަނި ނުދައްކައޭ، ރައްޔިތުންނަށް ފައިސާއެއް ނުދެއޭ. އެކަމަކު، މި ބޭފުޅޫން ނޫންތޯ ނުދީ މިދިޔައީ 9،000 މިލިއަން ރުފިޔާ (9 ބިލިއަން ރުފިޔާ) ރައްޔިތުންނާ ހަވާލުނުކޮށް، އަޅުގަނޑަކަށް ނުވިސްނޭ ރައްޔިތުން ކުރިމައްޗަށް ނުކުންނަ ސަބަބެއް މިކަހަލަ ކަންކަން ކުރައްވާފައި،"
ރައީސުލްޖުމްހޫރިއްޔާ ޑރ މުހައްމަދު މުޢިއްޒު
ރައީސް ޑރ. މުއިއްޒު އެގޮތަށް ވިދާޅުވި އިރު، މިދިޔަ އަހަރު ނިމުނުއިރު ދައުލަތުގެ ބޭރުގެ ދަރަނީގެ ޖުމްލައަކީ 51.1 ބިލިއަން ރުފިޔާ ކަމަށް ކުރީގެ ފިނޭންސް މިނިސްޓަރު އިބްރާހިމް އަމީރު ވަނީ ވިދާޅުވެފައެވެ. އަމީރު ވިދާޅުވީ މިދިޔަ އަހަރު ދައުލަތުގެ ބޭރުގެ ދަރަނީގެ ތެރޭގައި ހިމެނެނީ ސީދާ ދައުލަތުން ބޭރުގެ ފަރާތްތަކުން ނަގާފައިވާ 37.3 ބިލިއަން ރުފިޔާ އާއި ދައުލަތުން ސޮވެރިންގް ގެރެންޓީ ދީގެން ނަގާފައިވާ 13.7 ބިލިއަން ރުފިޔާ ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
