އަޅުގަނޑުގެ އެދުމަކީ އެހެން ގައުމުތަކުގެ ހަމަނުޖެހުންތަކުގައި ބައިވެރިވާން ދިވެހިން ނުދިޔުން: މާރިޔާ
ލިޔުންތެރިޔާ
ޚަދީޖާ އަރުފާ
އުއްމީދަކީ، އެހެން ގައުމުތަކުގައި ހިނގާ ދާޚިލީ ހަނގުރާމަތަކާއި ހަމަނުޖެހުންތަކުގައި ބައިވެރިވުމަށް ދިވެހިން ރާއްޖެއިން ބޭރަށް ނުދިއުން ކަމަށް ކުރީގެ ޑިފެންސް މިނިސްޓަރު މާރިޔާ އަޙްމަދު ދީދީ ވިދާޅުވެއްޖެއެވެ.
މާރިޔާ މިހެން ވިދާޅުވީ އިންޑިއާގެ އިއަންސް ނޫސް އޭޖެންސީއަށް ދެއްވި ބަސްދީގަތުމެއްގައެވެ.
މި ބަސްދީގަތުމުގައި އޭނާ ވަނީ އެމެރިކާއާއި އިސްރާއީލުން އިސްވެ އީރާނަށް ދިން ހަމަލާތަކާ ގުޅިގެން މެދުއިރުމަތީގެ އުފެދިފައިވާ ހަމަނުޖެހުންތަކާމެދު ކަންބޮޑުވުން ފާޅުކުރައްވާފައެވެ. އަދި މެދުއިރުމަތީގެ މަސްރަހު ހޫނުވެފައިވާ ދަނޑިވަޅެއްގައި، ދިވެހިން މިފަދަ ކަންކަމުގެ ތެރެއަށް ނުވަންނާނެ ކަމަށް އުއްމީދުކުރައްވާ ކަމަށް ވިދާޅުވެފައެވެ.
މާރިޔާ ވިދާޅުވީ، ސީރިއާގެ ދާޚިލީ ހަނގުރާމަ ގަދަވެގެން ދިޔަ ދުވަސްވަރު ގިނަ އަދަދެއްގެ ދިވެހިން އެ ހަނގުރާމައިގައި ބައިވެރިވުމަށް ސީރިއާއަށް ދިޔުމަކީ އޭރުވެސް އޮތް ވަރަށް ބޮޑު ކަންބޮޑުވުމެއް ކަމަށެވެ. އަދި އޭގެ ސަބަބުން ހަނގުރާމައަށް ދިޔަ އާއިލާތަކުގެ އަންހެނުންނާއި ކުޑަކުދިންނަށް ވަރަށް ބޮޑެތި ނޭދެވޭ އަސަރުތަކެއް ކޮށް، ބޮޑެތި ތަކުލީފުތަކެއް އުފުލަން ޖެހުނުކަމަށް އޭނާ ވިދާޅުވިއެވެ.
"އަޅުގަނޑުގެ އުންމީދަކީ ދިވެހިން އެހެން ގައުމުތަކުގެ ހަމަނުޖެހުންތަކުގައި ބައިވެރިވުމަށް ރާއްޖެއިން ބޭރަށް ނުދިއުން. ސީރިއާ ހަނގުރާމައިގެ ތެރޭގައި ދިވެހިން އެ ގައުމަށް ދިއުމުން އާއިލާތަކަށް ލިބުނު އަސަރުތަކަކީ އަޅުގަނޑުމެން ތަޖުރިބާކޮށްފައިވާ ހިތްދަތި ކަންތައްތަކެއް،"
މާރިޔާ ވިދާޅުވިއެވެ.
މީގެ އިތުރުން މާރިޔާ ވަނީ އެ ހަމަނުޖެހުންތަކާއި ގުޅިގެން ތެލުގެ އަގުމަތިވެފައިވާތީ އެކަމާމެދުވެސް ކަންބޮޑުވުންފާޅުކުރައްވާފައެވެ. ައެގޮތުން ރާއްޖެއަކީ ވަރަށް ބޮޑަށް ތެލަށް ބަރޯސާވެފައިވާ ގައުމެއް ކަމަށާ، ހަނގުރާމައިގެ ސަބަބުން، ތެލުގެ އަގުތައް ވަރަށް ބޮޑަށް އުފުލިފައިވާކަން އޭނާ ފާހަގަކުރެއްވިއެވެ. އަދި ތެލުގެ އަގު މަތިވުމަކީ، ރާއްޖޭގައި ތަކެތީގެ އަގުތައްވެސް މަތިވާނެ ކަމެއްކަމަށް އޭނާ ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
