ނަތަންޔާހޫ ފަހައި ހިފައި މަރާލާނެ ކަމުގެ އިންޒާރު އީރާނުން ދީފި

ނިރުބަވެރި އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ފަހައި ހިފައި މަރާލާނެ ކަމުގެ އިންޒާރު އީރާނުގެ އިސްލާމީ ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ދީފިއެވެ.

އީރާނުގެ ރިވޮލިއުޝަނަރީ ގާޑުން އެ ޖަމާޢަތުގެ ރަސްމީ ވެބްސައިޓް ސެޕާ ނިއުސްގައި ބުނެފައި ވަނީ "ކުޑަކުދިން މަރާ މި މުޖުރިމު ދިރި ހުރި ނަމަ، ފުރިހަމަ ބާރާ އެކު އޭނާ ފަހައި ހިފައި މަރާލާނެ" ކަމަށެވެ.

ފެބްރުއަރީ 28 ގައި އެމެރިކާ އާއި އިސްރާއީލު ގުޅިގެން އީރާނަށް ހަމަލާ ދީ ފެށި ހަނގުރާމައިގެ ތިންވަނަ ހަފުތާ ފެށިފައިވާއިރު، މި ހަނގުރާމައިގެ ފުރަތަމަ ހަމަލާތަކުގައި އީރާނުގެ ރޫޙާނީ ލީޑަރު އާޔަތުالله ޢަލީ ޚާމަނާއީ ވަނީ އަވަހާރަކޮށްލާފައެވެ.

ނަތަންޔާހޫ ވަނީ މާޗް 12 ގައި ބޭއްވި ނޫސްވެރިންގެ ބައްދަލުވުމެއްގައި އިސްރާއީލު "ކުރިއަށް ވުރެ ވަރުގަދަ" ކަމަށް ބުނެ، އީރާނުގެ ނިއުކްލިއާ ސައެންޓިސްޓުން މަރައި، އައިއާރުޖީސީ އަދި ބަސީޖް ފައުޖުތަކަށް ބޮޑެތި ގެއްލުންތައް ދީފައިވާ ކަމަށް ބުނެފައެވެ.

ނަތަންޔާހޫ މަރާލާނެ ކަމުގެ އިންޒާރު އީރާނުން ދީފައި މިވަނީ، އީރާނުގެ ތަސްނީމް ނިއުސް އެޖެންސީން ނަތަންޔާހޫ މަރުވެފައިވާ ކަމަށް ނުވަތަ ޒަޚަމްވެފައިވާ ކަމަށް ބުނެ ޚަބަރު ފަތުރާފައިވާ ދަނޑިވަޅެއްގައެވެ.

ނަމަވެސް އެ ވާހަކައަށް ބާރު ދޭ އެއްވެސް ހެއްކެއް ހުށަހެޅިފައެއް ނުވާއިރު، މާޗް 12 ގައި ނަތަންޔާހޫ ވަނީ ލައިވް ނޫސް ކޮންފަރެންސެއް ބާއްވައި ވާހަކަ ދައްކާފައެވެ.

އެމެރިކާ އާއި އިސްރާއީލުން އީރާނުގެ މިސައިލް ލޯންޗަރުތަކާއި ގުދަންތަކަށް ހަމަލާ ދެމުން ދިޔަ ނަމަވެސް، އީރާނުން ދަނީ ރެއާ ދުވާލު ބެލިސްޓިކް މިސައިލާއި ޑްރޯން ހަމަލާތައް އިސްރާއީލަށް ދެމުންނެވެ.

އަދި ގަލްފު ސަރަޙައްދުގެ އަރަބި ޤައުމުތަކަށް ވެސް ހަމަލާ ދެމުން ގެންދާތީ ތެލުގެ އަގު ވަނީ ބޮޑުތަނުން އުފުލިފައެވެ. އެކުވެރި ދައުލަތްތަކުގެ ސަލާމަތީ މަޖިލީހުން ވަނީ ގަލްފު ޤައުމުތަކާއި އުރުދުންއަށް އީރާނުން ދެމުންދާ ހަމަލާތައް ކުށްވެރިކޮށް، ވަގުތުން ހަމަލާ ހުއްޓާލުމަށް ގޮވާލައި ޤަރާރެއް ފާސްކޮށްފައެވެ.