ކޮންގްރެސް ބާއްވަން ސަރުކާރުން ތަނެއް ނުދިން؛ ބާއްވާނީ ސިޓީ ކައުންސިލް ހޯލުގައި ޓެންޓް ޖަހައިގެން: އެމްޑީޕީ

އިދިކޮޅު މައި ޕާޓީ، ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ)ގެ ކޮންގްރެސް އަށް ސަރުކާރުން ހުރަސްއަޅަމުންދާ ކަމަށާަ އެހެން ނަމަވެސް، އެ ކޮންގްރެސް މާލެ ސިޓީ ކައުންސިލް ހޯލު ބިމުގައި ޓެންޓް ޖަހައިގެން ވެސް ކުރިއަށް ގެންދާނެ ކަމަށް އެ ޕާޓީން ބުނެފިއެވެ.

އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން އެ ޕާޓީގެ ޑެޕިއުޓީ ޗެއާޕާސަން އިބްރާހީމް ވަހީދު ވިދާޅުވީ، ސިޔާސީ ޕާޓީތަކުގެ ޤާނޫނުގައި ލާޒިމްކުރާ މި ބޮޑު ބައްދަލުވުން ބޭއްވުމަށް އެކަށީގެންވާ ތަނެއް ސަރުކާރުން ހަމަޖައްސައިދީފައި ނުވާ ކަމަށެވެ. އެހެންކަމުން، ކޮންގްރެސް ބޭއްވުމަށް މިހާރު ނިންމާފައިވަނީ މާލެ ސިޓީ ހޯލުގެ ގޮތުގައި އޮތް ހާމަ ބިމުގައި ޓެންޓު ޖަހައިގެން ކަމަށް އޭނާ ވިދާޅުވިއެވެ.

ސަރުކާރުގެ މި އަމަލަށް ވަރަށް ބޮޑަށް ފާޑުވިދާޅުވަމުން ވަހީދު ފާހަގަކުރެއްވި ގޮތުގައި، ވެރިކަން ކުރާ ޕީއެންސީގެ ކޮންގްރެސް ސޯޝަލް ސެންޓަރުގައި ބޭއްވިއިރު، މުޅި އެ ސަރަހައްދު ބަންދުކޮށް، ވަށައިގެން ހުރި ތިން ސްކޫލެއްވެސް ”ހިޞާރުކޮށްގެން“ ކަމަށެވެ. އަދި ހުރިހާ ސިޔާސީ ޕާޓީތަކަށް ހަމަހަމަކަމާއެކު ފުރުސަތު ދެއްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވި ނަމަވެސް، އަމަލީ ގޮތުން ފެންނަނީ އިދިކޮޅު ފަރާތްތަކަށް ޖެއްސުންކޮށް ދަތިކުރަމުންދާ މަންޒަރު ކަމަށް އޭނާ ތުހުމަތު ކުރެއްވިއެވެ.

އަޅުގަނޑުމެންނަށް ކޮންގްރެސް ބާއްވާނެ ތަނެއް ނުދީ، މާލޭގެ ތިން ސްކޫލް ހިސޯރުކޮށްގެން، ސޯޝަލް ސެންޓަރުގައި ކޮންގްރެސް ބޭއްވީ ތިން ސްކޫލް ހިސޯރު ކޮށްގެން. އަޅުގަނޑުމެން މިތިބީ އަޅުގަނޑުމެންނަށް ވެގެންވީ މިންވަރަކުން ކޮންގްރެސްއާއެކު ކުރިއަށްދާން.

އިބުރޭ

އަންނަ އޮކްޓޫބަރު މަހުގެ 1 އިން 3 ގެ ނިޔަލަށް ބޭއްވުމަށް ހަމަޖެހިފައިވާ މި ކޮންގްރެސްގައި 980 އަށް ވުރެ ގިނަ މަންދޫބުން ބައިވެރިވާނެ ކަމަށް އެމްޑީޕީން މައުލޫމާތު ދެއެވެ.

ކޮންގްރެސްގެ އިންތިޒާމުތަކާ ގުޅޭގޮތުން ވަހީދު ވިދާޅުވީ، ބައިވެރިން ރަޖިސްޓްރީ ކުރުމުގެ ފުރުސަތު މި މަހުގެ 20 އިން 25 ގެ ނިޔަލަށް އޮންލައިންކޮށް ހުޅުވާލާފައިވާ ކަމަށެވެ. މީގެއިތުރުން، ކޮންގްރެސްގައި ބައިވެރިވާ މެންބަރުންނަށް ދޫކުރާ ކިޓުތައް ހަވާލުކުރުން މި މަހުގެ 29 އަދި 30 ވަނަ ދުވަހު އެމްޑީޕީގެ މައި ހަރުގޭގައި ކުރިއަށްދާނެ ކަމަށް ވެސް އޭނާ ވިދާޅުވިއެވެ.

އިބްރާހީމް ވަހީދު އިތުރަށް ވިދާޅުވީ، ސަރުކާރުން އެކި ގޮތްގޮތުން ހުރަސްއަޅައި ދަތިކުރި ނަމަވެސް، ޕާޓީގެ އާންމު މެންބަރުންގެ ބޮޑު ތަރުހީބަކާއި އެއްބާރުލުމަކާއެކު ކޮންގްރެސް ކާމިޔާބުކަމާއެކު ނިންމާލެވޭނެ ކަމުގެ ފުރިހަމަ ޔަގީންކަން އެބައޮތް ކަމަށެވެ.