ފުށިދިއްގަރުފަޅުގެ ޕްލޭނިންގ އަށް ބައިނަލްއަގްވާމީ ކޮންސަލްޓެންޓެއް ހޯދަނީ!
ދިވެހިރާއްޖޭގައި މިހާތަނަށް ހިންގާ ބޯހިޔާވަހިކަމުގެ އެންމެ ބޮޑު މަޝްރޫއު ކަމަށްވާ މާލޭގެ ދެކުނަށް އޮންނަ ފުށިދިއްގަރުފަޅު، ހިއްކައި އެތަން ތަރައްގީ ކުރުމާއި ގުޅޭ ގޮތުގެ ޕްލޭނިންގ ހެދުމަށް ބޭރުގެ ކޮންސަލްޓެންޓެއް ހޯދުމުގެ މަސައްކަތް ކުރަމުންދާ ކަމަށް ގެދޮރުވެރިކަމާއި ބިމާއި ޢުމްރާނީ ތަރައްޤީއާއި ބެހޭ ވުޒާރާގެ ވަޒީރު މިނިސްޓަރު ޢަލީ ހައިދަރު ވިދާޅުވެއްޖެއެވެ.
މިބސަރުކާރުގެ ހަފްތާ 14 މަގު ޗާޓުގައި ހިމެނޭ ކަންކަމުގެ ތެރެއިން ގެދޮރުވެރިކަމާއި ބިމާއި ޢުމްރާނީ ތަރައްޤީއާއި ބެހޭ ވުޒާރާގެ އިޚްތިޞާޞްގައިވާ ކަންކަން ނިމި، އެކަން ކަމާއި ގުޅޭ އިތުރު ތަފްސީލް ހާމަކުރުމަށް މިއަދު އެ ވުޒާރާއިން ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަށް ޖަވާބު ދެއްވަމުން ހައިދަރު ވިދާޅުވީ ފުށިދިއްގަރުފަޅުގެ ޕްލޭނިންގ ގެ މަސައްކަތް ފަށައިގެން މިހާރު ކުރެވެމުންދާ މަސައްކަތަކީ ކޮންސަލްޓަންޓެއް ހޯދުމުގެ މަސައްކަތް ކަމަށެވެ.
މިއީ ވަރަށް ބޮޑު މަޝްރޫއު އެއް. ވަރަށް ގިނަ ކަންތައްތަކަށް ރިޢާޔަތް ކުރަންޖެހޭ މަޝްރޫޢުއެއް. އެކޯ ސިޓީއެއްގެ ގޮތުގައި ތަރައްގީ ކުރާތީ އަޅުގަނޑުމެން ކުރަންޖެހޭ އިތުރު ތަހުލީލުތައް ވެސް އެބަހުރި. ވަކިން ޚާއްސަކޮށް ރަށުގެ އިންފްރާ ސްޓްރަކްޗަރ ގާއިމް ކުރުމުގައިވެސް އެތަނަކީ އެންވާރަމެންޓް ފްރެންޑްލީ ތަނަކަށް ހެދުމަށްޓަކައި ވެސް ކުރަންޖެހޭ ވަރަށް ގިނަ ކަންކަން އެބަހުރި. އެހެންވީމާ އެ މަސައްކަތްތައް ދިރާސާކޮށް، ތަހުލީލު ކުރުމަށްޓަކައި ބައިނަލްއަގްވާމީ ކޮންސަލްޓަންޓެއް ހޯދުމުގެ މަސައްކަތް މިވަގުތު ކުރިއަށް ދަނީ.
ވަޒީރު ޑރ. ޢަލީ ހައިދަރު އަހުމަދު
ފުށިދިއްގަރުފަޅު ހިއްކައިގެން ރަސްމާލެ ތަރައްގީ ކުރުމުގެ މަޝްރޫއަކީ މި ސަރުކާރުން ބޯހިޔާވަހިކަން ކަށަވަރުކޮށްދިނުމަށް އިއުލާނުކުރި އެންމެ ބޮޑު މަޝްރޫއެވެ. މި މަޝްރޫއުގެ ދަށުން 1200 ހެކްޓަރުގެ ބޮޑު ސަރަހައްދެއް ހިއްކާ 11900 އަށްވުރެ ގިނަ ގޯއްޗާއި 26000 ފްލެޓު ދިނުމަށް ސަރުކާރުން ވަނީ ނިންމާފައެވެ.
މީގެ އިތުރުން، ރައީސުލްޖުމްހޫރިއްޔާ ވަނީ، ރަސްމާލެ އާއި މާލެ ސިޓީއާއި ގުޅުވާލުމަށް އަންޑަވޯޓާ ޓަނެލް އެއް އެޅުމާއި ގުޅޭގޮތުން ވެސް މަޝްވަރާތައް ކުރިއަށްދާކަން އިއުލާން ކުރައްވާފައެވެ.
މި މަޝްރޫއު މުޅިން ނިމޭއިރު، މާލެ ސަރަހައްދަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ޙައްލެއް ލިބިގެންދާނެ ކަމުގެ ޔަގީންކަން ދެއްވާކަމަށް ރައީސް ޑރ.މުހައްމަދު މުއިއްޒު ވަނީ ވިދާޅުވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
