ސަރުކާރުން ދަނީ"ރަން ރީނދޫ" ހަރަކާތަށް ހުރަސް އަޅަމުން: އެމްޑީޕީ
ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ) އަށް 20 އަހަރު ފުރުމާއި ގުޅިގެން ބޭއްވުމަށް ހަމަޖެހިފައިވާ "ރަން ރީނދޫ" ހަރަކާތައް ސަރުކާރުން ހުރަސް އަޅަމުންދާ ކަމަށް އެޕާޓީން ތުހުމަތު ކޮށްފި އެވެ.
އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި، އެޕާޓީގެ އަހަރީ ދުވަހުގެ ހަރަކާތަށް ސަރުކާރުން ދަތިކުރަމުންގެންދާކަން ފާހަގަކޮށް އެވާހަކަތައް ހިއްސާކޮށްފައެވެ. ނޫސްވެރިންގެ ބައްދަލުވުމުގައި ވާހަކަދައްކަވަމުން އެ ޕާޓީގެ ކުރީގެ ޗެއަރޕާސަން ހަސަން ލަތީފް ވިދާޅުވީ، އެމްޑީޕީން "ރަން ރީނދޫ"ގެ ނަމުގައި މި މަހުގެ 18 ވަނަ ދުވަހު ކުރިއަށް ގެންދިއުމަށް ނިންމާފައިވާ ހިނގާލުމާއި ދުވުމުގެ ހަރަކާތައް ހުއްދަ ހޯދުމަށް އެޗްޑިސީއަށް ދެ ފަހަރެއްގެމަތިން ސިޓީ ފޮނުވާފައިވާނޭކަމަށެވެ.
އެހެން ނަމަވެސް އެ ހަރަކާތަކީ ސިޔާސީ ހަރަކާތެއް ކަމަށް ބުނެ އެޗް.ޑީ.ސީން އެ ހަރަކާތް ބާއްވަން ހުއްދަދިނުމަށް އިންކާރުކޮށްފައިވާ ކަމަށް ހަސަން ލަތީފް ވިދާޅުވި އެވެ.
ހަސަން ވިދާޅުވި ގޮތުގައި މި ހަރަކާތް އެންމެ ފުރަތަމަ ފަށަން ހަމަޖެހިފައި އޮތީ މި މަހުގެ 18 ވަނަ ދުވަހު ދަންމަރަކާ އެކީ ހުޅުމާލޭގައި ކަމަށެވެ. އެގޮތުން ހއ. ތުރާކުނުން ފެށިގެން އައްޑޫސިޓީއަށް، އަންނަ އަހަރުގެ އޭޕްރީލް މަހުގެ ކުރިން މި ހަރަކާތް ކުރިއަށް ގެންގޮސް ނިންމާލުމަކީ އަމާޒެއް ކަމަށް ހަސަން ވިދާޅުވި އެވެ.
އެ ދަންމަރަކީ އެމްޑީޕީގެ މި ފާއިތުވި 20 އަހަރު ދިވެހި ރައްޔިތުންނަށާއި މި ރާއްޖެއަށް ކޮށްދީފައިވާ އެކިއެކި މަސައްކަތްތައް ޚިދުމަތްތައް އަދި ގެނެސްދީފައިވާ ތަރައްގީ ރަމްޒުކޮށްދޭ ދަންމަރެއް. މިއީ ސިޔާސީކަމެއްނޫން
ހަސަން ވިދާޅުވިއެވެ.
އެމްޑީޕީން މި ހަރަކާތް ކުރިއަށް ގެންދަން ކުރިން ނިންމާފައިވަނީ ހުޅުމާލޭ ސެންޓްރަލް ޕަރކް ވަށައިގެން އޮންނަ ބަގީޗާ ހިނގުމުގަ އެވެ. އެހެން ނަމަވެސް އެޗްޑީސީން އެ ހަރަކާތް ކުރިއަށް ގެންދިއުމަށް ހުއްދަ ނުދިނުމާ ގުޅިގެން އެމްޑީޕީންވަނީ އެ ހަރަކާތް މަޖީދީމަގުގައި ބޭއްވުމަށް ނިންމާފައެވެ.
އެގޮތުން އެމްޑީޕީން މިހާރު ނިންމާފައިވަނީ "ރަން ރީނދޫ ހަރަކާތް" މިމަހުގެ 25 ވަނަ ދުވަހު އާޓިފިޝަލް ބީޗުން ފެށުމަށް ނިންމާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
