އިޒްރޭލުގެ ރަހުމުކުޑަ ހަމަލާއެއްގައި ގާޒާގެ އެއް އާއިލާއެއްގެ ހަ މީހުން ދިރިތިއްބާ އަންދައި ޝަހީދުކޮށްލައިފި

އިޒްރޭލުން ފަލަސްތީނުގެ ޣައްޒާއަށް ދެމުންގެންދާ ލާއިންސާނީ ހަމަލާތަކުގެ ތެރެއިން، އަންގާރަ ދުވަހުގެރޭ ދަންވަރު ޣައްޒާ ސިޓީއަށް ދިން ރަހުމުކުޑަ ވައިގެ ހަމަލާއެއްގައި އެއް އާއިލާއެއްގެ ހަ މީހުން ދިރިތިއްބާ އަންދައި ޝަހީދުކޮށްލައިފިއެވެ.

ޣައްޒާގެ ސިއްހީ އޮފިޝަލުން މައުލޫމާތު ދެއްވި ގޮތުގައި، ސަބްރާ އަވަށުގައި ހުރި އެ އާއިލާގެ ގޭގެއަށް ދިން މި ހަމަލާގައި ޝަހީދުވެފައިވަނީ ފިރާސް އަލް މަސްރީ އާއި އޭނާގެ އަންހެނުން ސަލްސަބީލްގެ އިތުރުން އެމީހުންގެ ހަތަރު ދަރިންނެވެ. މީގެ ތެރޭގައި ހިމެނެނީ ތިން އަންހެން ކުދިންނާއި ފިރިހެން ކުއްޖެކެވެ. މި ހަމަލާގައި އެމީހުން ދިރިއުޅެމުންދިޔަ ގޭގައި ވަނީ ބޮޑު އަލިފާންގަނޑެއް ރޯވެފައެވެ.

މި ހަމަލާގެ ދިން ބަހަނާއެއްގެ ގޮތުގައި ނިރުބަވެރި އިޒްރޭލު ސިފައިން ބުނެފައިވަނީ، އެމީހުންގެ އަމާޒަކީ ހަމާސްގެ ހަނގުރާމަވެރިއެއް ކަމަށާއި، ހަމަލާގެ ނަތީޖާ އިތުރަށް ދިރާސާ ކުރަމުންދާ ކަމަށެވެ. ނަމަވެސް އާއިލާގެ މެންބަރުން ބުނާ ގޮތުގައި މިއީ އެއްވެސް އިންޒާރެއް ނެތި އާންމުންނަށް އަމާޒުކޮށް ދިން ހަމަލާއެކެވެ.

ފިރާސްގެ ބައްޕަ، އަބޫ ޔޫސުފް އަލް މަސްރީ ރޮއެފައި ބުނި ގޮތުގައި، ހަމަލާ ދިން ވަގުތު މުޅި އާއިލާ ތިބީ ނިދާފައެވެ.

"އަލިފާނުގެ ތެރެއިން އަހަރެމެންގެ ދަރިންނާއި ކާފަދަރިން ސަލާމަތެއް ނުކުރެވުނު. އެއްވެސް ރަހުމެއް ނެތި، އިންޒާރެއް ނެތި ފަސް ހަ މީހުން ޝަހީދުކޮށްލައިފި. ގިނައީ ކުޑަކުދިންނާއި އަންހެނުން،" އޭނާ ބުންޏެވެ.

އަދި ޣައްޒާގައި މިހާރު ރައްކާތެރި އެއްވެސް ތަނެއް ނެތްކަން އޭނާ ފާހަގަކުރިއެވެ.

ރޮއިޓާސް އިން އާންމުކޮށްފައިވާ ވީޑިއޯތަކުން ފެންނަ ގޮތުގައި، ރެސްކިއު މަސައްކަތްތެރިން ދަނީ ގޭގައި ރޯވެފައިވާ އަލިފާން ނިއްވުމަށާއި، ހުދު ފޮތިގަނޑުތަކުގައި އޮޅާފައިވާ ހަށިގަނޑުތައް ނެރުމަށް ބުރަ މަސައްކަތްތަކެއް ކުރަމުންނެވެ.

މީގެ އިތުރުން އަންގާރަ ދުވަހުގެ ފަހުގެ ވަގުތެއްގައި ޣައްޒާގެ މެދުތެރޭގައި ދަތުރުކުރި އުޅަނދަކަށާއި، ޣައްޒާ ސިޓީގެ ޖަމިއްޔާއަކަށް ދިން ދެ ހަމަލާއެއްގައި އިތުރު ހަ މީހަކު ވަނީ ޝަހީދުވެފައެވެ. މިއާއެކު އަންގާރަ ދުވަހު އެކަނިވެސް ޝަހީދުވި މީހުންގެ އަދަދު ވަނީ 12 އަށް އަރާފައެވެ.

ޣައްޒާގެ ސިއްހީ އިދާރާތަކުން ބުނާ ގޮތުގައި، ޤަތުލްޢާއްމު މެދުކަނޑާލުމަށް ވެފައިވާ އެއްބަސްވުމުގެ ފަހުން ވެސް އިޒްރޭލުން ދެމުންދާ ހަމަލާތަކުގައި މިހާތަނަށް 1,160 އަށްވުރެ ގިނަ ފަލަސްތީނު މީހުން ވަނީ ޝަހީދުވެފައެވެ. މީގެ ތެރޭގައި ގިނައީ އާންމު ރައްޔިތުންނެވެ.