ޙައްޖުގެ އަޅުކަމުގެ ތެރޭގައި އަބަދުވެސް 'ނުސުކް ކާޑު' ބޭނުންކުރުމަށް ޙައްޖު ކޯޕަރޭޝަނުން އިލްތިމާސްކޮށްފި

ޙައްޖުގެ މާތް އަޅުކަން އަދާކުރުމަށް ސައޫދީ އަރަބިއްޔާއަށް ގޮސްތިބި ހުރިހާ ދިވެހި ޙައްޖުވެރިންވެސް، ހުރިހާ ވަގުތެއްގައި "ނުސުކް ކާޑު" އަޅައިގެން އުޅުމަށް މޯލްޑިވްސް ޙައްޖު ކޯޕަރޭޝަނުން ވަރަށް ބޮޑަށް އިލްތިމާސްކޮށްފިއެވެ.

ނުސުކް ކާޑަކީ ޙައްޖުގެ އަޅުކަން އަދާކުރުމަށް ޙައްޖާޖީންނަށް ދޫކުރާ ރަސްމީ ފާހެވެ. ސައޫދީ ސަރުކާރުގެ ޙައްޖާ ބެހޭ ވުޒާރާއިން ކަނޑައަޅާފައިވާ ގޮތުން، ޙައްޖުގެ އަޅުކަން އަދާކުރުމުގައި އެންމެހާ ޙާޖީންގެ އަތުގައި ހުރިހާ ވަގުތަކު މި ފާސް އޮންނަންޖެހޭނެއެވެ.

ނުސުކް ނިޒާމަކީ ޤަވާއިދާ ޚިލާފަށް މައްކާއަށް އެތެރެވާ މީހުން މަދުކޮށް، ވަކި އިންތިޒާމެއްގެ ދަށުން ޙައްޖުގެ އަޅުކަން ކުރިއަށް ގެންދިއުމަށް ސައޫދީ ސަރުކާރުން ތައާރަފްކޮށްފައިވާ ޚާއްސަ ޕްލެޓްފޯމެކެވެ. މީގެ މައިގަނޑު މަގުސަދަކީ ސައޫދީއަށް އެތެރެވާ އެންމެހާ ޙާޖީންގެ ސަލާމަތާއި ރައްކާތެރިކަން ކަށަވަރުކުރުމެވެ.

މި ފަހަރުގެ ޙައްޖުގެ އިންތިޒާމުތަކުގެ ތެރެއިން ފާހަގަކޮށްލެވޭ އެންމެ މުހިންމު އެއް ކަމަކީ، އަމިއްލަ ޤައުމުގައި ތިބެ ނުސުކް ކާޑު ޙައްޖުވެރިންނަށް ބަހާ ހަމައެކަނި ޤައުމަކަށް ދިވެހިރާއްޖެ ވެގެންދިޔަ ކަމެވެ. ޙައްޖުވެރިން ފުރުމުގެ ކުރިން މި ކާޑު ލިބޭނެ އިންތިޒާމު ޙައްޖު ކޯޕަރޭޝަނުން ހަމަޖެއްސީ، ޙައްޖުގެ ޚިދުމަތް ފޯރުކޮށްދޭ އެޖެންޓު ނުވަތަ މުޠައްވިފް "ރަވާފް މިނާ" މެދުވެރިކޮށެވެ. މި މަސައްކަތަށްޓަކައި ރަވާފް މިނާގެ ވައިސް ޕްރެސިޑެންޓް އިހްސާން ކަތިބު ވަނީ ރާއްޖެ ވަޑައިގެންފައެވެ.

ޕްރިންޓުކޮށްފައިވާ މި ކާޑަކީ ޙައްޖުގެ މަނާސިކުތައް އަދާކުރުމަށް އެއްތަނުން އަނެއްތަނަށް ދަތުރުކުރާއިރު ކޮންމެހެން އަތުގައި އޮންނަންޖެހޭ އެއްޗެކެވެ. އަދި މިއީ ޙައްޖާ ގުޅުންހުރި އެކި ޚިދުމަތްތައް ހޯދުމަށާއި، މުޤައްދަސް ބިންތަކަށް ވަނުމުގައި ޙައްޖާޖީންނަށް ފަސޭހަވާނެ ވަސީލަތެކެވެ.

ޙައްޖު ކޯޕަރޭޝަނުން ބާރުއަޅަނީ ދިވެހި އެއްވެސް ޙާއްޖީއަކަށް މި ކާޑުގެ ސަބަބުން ޙައްޖުގެ އަޅުކަން އަދާކުރުމުގެ ފުރުޞަތު ގެއްލުނަ ނުދިނުމަށެވެ. އެހެންކަމުން، ހުރިހާ ވަގުތެއްގައިވެސް ނުސުކް ކާޑު ބޭނުންކުރުމަށް އެ ކޯޕަރޭޝަނުން ވަނީ ނަސޭހަތްތެރިވެފައެވެ.