ހައުސިން މަޝްރޫޢުއެއް ހިންގަން ފުވައްމުލައް ކައުންސިލުން ފުރަތަމަ ދިނީ ޗަކަބިމެއް: މުއްތަލިބް

ފުވައްމުލައް ސިޓީގައި ހައުސިން މަޝްރޫޢުއެއް ހިންގަން ބިމެއް ދޭން އެދުމުން ކައުންސިލުން އެންމެފުރަތަމަ ދިނީ ޗަކަބިމެއްކަމަށް އިމާރާތްކުރުމާއި ގެދޮރުވެރިކަމާ ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބް ވިދާޅުވެއެވެ.

މިއަދު ބޭއްވި ނޫސްވެރިްނގެ ބައްދަލުވުމުގައި ސަރުކާރުގެ އެކިއެކި މަޝްރޫޢުތައް ހިންގުމަށް ކައުންސިލްތަކުން ދަތިކުރަމުންދާ މައްސަލާގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން މިނިސްޓަރު މުއްތަލިބް ވިދާޅުވީ، ސަރުކާރުގެ މަޝްރޫޢުތައް ހިންގުމަށް ހުށަހަޅާހިނދު ކައުންސިލްގެ ފަރާތުން އެއްބާރުލުން ނުލިބޭ މައްސަލަ ފާހަގަވެފައިވާކަމަށެވެ.

މީގެ ތެރެއިން ކުރިމަތިވި އެއް މައްސަލައިގެ ވާހަކަ ފާހަގަކުރައްވަމުން މިނިސްޓަރު ވިދާޅުވީ ފުވައްމުލަކުސިޓީގައި ހައުސިން މަޝްރޫޢުއެއް ހިންގުމަށް ބިމެއް ކަނޑައަޅައިދިނުމަށް އެދުމުން އެންމެފުރަތަމަ ހަމަޖައްސައިދިނީ ޗަކަ ބިމެއް ކަމަށެވެ.

މި މަޝްރޫޢުއަކީ ބޭންކް އޮފް މޯލްޑިވްސްގެ ކޮންޓްރެކްޓަރ ފައިނޭންސްގެ އުސޫލުން ބައެއް ރަށްތަކުގައި ކުރިއަށްގެންދިއުމަށް ނިންމި ހައުސިން މަޝްރޫޢުގެ ތެރޭގައި ހިމެނޭ ޕްރޮޖެކްޓެކެވެ.

ފުވައްމުލަކުގައި ކައުންސިލުން ފުރަތަމަ ކަނޑައަޅައިދިނީ ޗަކަބިމެއް. އެޗަކަބިން އަޅުގަނޑުމެން އެތަނަށްގޮސް ކަމުނުދާ ބިމެއްކަން އެނގުނީމަ ދެން އަޅުގަނޑުމެން އެ ބިން ބަދަލުކުރުމަށްޓަކައި އެކިއެކި މަސައްކަތްކޮށް މާބޮޑަށް ލަސްވާތީވެ އެލްޖީއޭ މެދުވެރިކޮށް ނެގުމުގެ ވިސްނުމެއްވެސް ގެންގުޅުނިން. އެހެން ނަމަވެސް އިއްޔެ އެކަން ވަނީ ހަމަޖެހިފައި

މިނިސްޓަރު މުއްތަލިބް

މިނިސްޓަރު ވިދާޅުވީ އެގޮތަށް ހިންގުމަށް ނިންމި ބައެއް މަޝްރޫޢުތައް ބައެއް ކައުންސިލުން ބިން ހަމަޖައްސައިދިނުން ލަސްވެގެން ނުފެށި އެބަހުރިކަމަށެވެ. ބައެއް ފަހަރު އެ ޕްރޮޖެކްޓެއް ކުރިއަށްދާކަން އަންގައިދުނުމަށް ކައުންސިލުން މަސައްކަތް ކުރިނަމަވެސް ކަނޑައެޅިފައިވާ ގޮތަށް އެއްބާރުލުން ނުދިނުމުގެ ސަބަބުން ބައެއް މަޝްރޫޢުތައް ކުރިއަށްދާ ސްޕީޑް ލަސްވާކަންވެސް މިއަދު މިނިސްތަރު ވަނީ ފާހަގަކުރައްވާފައެވެ.

ކުރިއަށްއޮތް ލޯކަލް ކައުންސިލްގެ އިންތިހާބުގެ ކެމްޕެއިން ފެށިގެން ކުރިއަށްދާއިރު، ސަރުކާރުގެ އެންމެބޮޑަށް ފާަހަގަކުރާ އެއް މައްސަލައަކީ އިދިކޮޅު ކައުންސިލްތަކުން ސަރުކާރުގެ މަޝްރޫޢުތައް ހުއްޓުވާ މައްސަލަ އާއި އެއްބާރުލުން ނުދޭ މައްސަލައެވެ. އެހެންކަމުން މިހާތަނަށް ތަޖުރިބާއަށް ބަލައި ސަރުކާރާ އިދިކީލަ ކައުންސިލެއް ގޮވައިގެން ސްޕީޑްގައި މަސައްކަތް ކުރަން އުނދަގޫވާނެކަމަށް ސަރުކާރުން ވަނީ ބުނެފައެވެ.