މުލީ އެއާޕޯޓުގެ މަސައްކަތް ނިންމައި، މާރިޗު މަހު ޓެސްޓް ފްލައިޓް ޖައްސަނީ

މުލަކަ އަތޮޅު މުލީގައި ތަރައްގީ ކުރަމުން އަންނަ އެއާޕޯޓުގެ މަސައްކަތް ނިންމައި ކުރިއަށް އޮތް އަހަރުގެ މާރިޗު މަހުގެ 1 ވަނަ ދުވަހު  ޓެސްޓް ފްލައިޓް ޖެއްސުމަށް އަމާޒުކުރާކަމަށް ރީޖަނަލް އެއަރޕޯޓްސް ކޮންޕެނީ ލިމިޓެޑްގެ މެނޭޖިން ޑިރެކްޓަރ އަހްމަދު މުބީން ވިދާޅުވެއްޖެއެވެ.

ދައުލަތުގެ މީޑިއާ، ޕީއެސްއެމްގެ "ރާއްޖެ މިއަދު" ޕްރޮގްރާމްގައި ވާހަކަ ދައްކަވަމުން މުބީން ވިދާޅުވީ، މުލީ އެއާޕޯޓު 2025 ވަނަ އަހަރުގެ މާރިޗު މަހަށް ނިންމުމަކީ އަމާޒެއްކަމަށެވެ. މިހާރު ކުރިއަށްދަނީ އެއަރޕޯޓު ހުޅުވުމަށް ވާންޖެހޭ ފަހުގެ ތައްޔާރީތައްކަމަށެވެ.

މިގޮތުން މުލީ އެއާޕޯޓަށް ބޭނުންވާ ވެހިކަލާއި މެޝިނަރީއާއި ވަޞީލަތްތައް ހޯދުމުގެ އިތުރުން އޮފީސް ބައިގެ މަސައްކަތް ނިންމުމާއި އަލިފާން ނިއްވުމަށް މީހުން ނަގައި ތަމްރީންކުރުމުގެ މަސައްކަތް މިހާރު ކުރަމުންދާކަން މުބީން ފާހަގަކުރެއްވިއެވެ.

އެއަރޕޯޓަށް ބޭނުންވާ ވެހިކަލާއި މެޝިނަރީއާއި ވަޞީލަތްތައް ހޯދުމުގެ އިތުރުން އޮފީސް ބައިގެ މަސައްކަތް ނިންމުމާއި އަލިފާން ނިއްވުމަށް މީހުން ނަގައި ތަމްރީންކުރުމުގެ މަސައްކަތް މިހާރު ދަނީ ކުރަމުން

މުބީން ވިދާޅުވިއެވެ.

މުލީ އެއަރޕޯޓުގެ ޢަމަލީ މަސައްކަތް 2021 ވަނަ އަހަރުގެ އޮގަސްޓްމަހު ފަށައި، 2023 ވަނަ އަހަރުގެ މެދުތެރޭގައި ޚިދުމަތްދޭން ރާވާފައި އޮތް ނަމަވެސް، އެކި ސަބަބުތަކާހުރެ އެއާޕޯޓުގެ މަސައްކަތްތައް ވަނީ ލަސްވެފައެވެ.

މިއީ މުލަކަ އަތޮޅުގައި ތަރައްޤީ ކުރާ ފުރަތަމަ އެއާޕޯޓަށްވާއިރު، 1200 މީޓަރު ދިގު އަދި 30 މީޓާރު ފުޅާ ރަންވޭއަކާއެކު ތަރައްޤީކޮށްފައިވާ މި އެއަޕޯޓުގެ މަޝްރޫއަށް ސަރުކާރުން 221 މިލިޔަން ރުފިޔާ ޚަރަދުކޮށްފައިވާކަން ފާހަގަކޮށްލަން ޖެހެއެވެ.