ދިވެހިރާއްޖެ އާއި ތުރުކީއާ ދެެމެދު ވެފައިވާ ޕްރިފަރެންޝަލް ޓްރޭޑް އެގްރީމެންޓަށް އަމަލުކުރަން ފަށައިފި

ދިވެހިރާއްޖެ އާއި ތުރުކީއާ ދެެމެދު ވެފައިވާ ޕްރިފަރެންޝަލް ޓްރޭޑް އެގްރީމެންޓް (އެމް.ޓީ.ޕީ.ޓީ.އޭ) އަށް މިއަދުން ފެށިގެން އަމަލުކުރަން ފަށައިފިއެވެ.

މި އެއްބަސްވުމަކީ 2023 ވަނަ އަހަރު ރައީސުލްޖުމްހޫރިއްޔާ ތުރުކީއަށް ކުރެއްވި ދަތުރުފުޅުގެ ތެރެއިން ދެ ޤައުމުގެ ދެމެދު ސޮއިކުރެވިގެންދިޔަ އެއްބަސްވުމެކެވެ. މި އެއްބަސްވުމަކީ ދެޤައުމުގެ ދެެމެދުގައި އިގްތިސާދީގޮތުން ގުޅުންތައް ކުރިއަށްގެންދިއުމަށް ވެވުނު އެއްބަސްވުމެކެވެ.

އެއްބަސްވުމަށް އަމަލުކުރަން ފެށުމާ ގުޅިގެން އިކޮނޮމިކް މިނިސްޓަރު މުހައްމަދު ސައީދު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، މިއީ ދެ ޤައުމުގެ ދެމެދުގައި އޮތް އިޤްތިޞާދީ އަދި ވިޔަފާރީގެ ގުޅުމުގައި ހާސިލުކުރެވުނު މުހިންމު ކާމިޔާބީއެއް ކަމަށެވެ. އަދި މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އާއި ތުރުކީވިލާތުގެ ރައީސް ރަޖަބް ތައްޔިބު އުރުދުޣާން ގެންގުޅުއްވާ އެއްގަލަށް އަރާ ތަޞައްވުރުގެ މައްޗަށް ބިނާވެފައިވާ ތާރީޚީ ފެށުމެއް ކަމަށްވެސް ވަޒީރު ފާހަގަކުރެއްވިއެވެ.

ދެ ޤައުމުގެ ދެމެދުގައި ވެވުނު މި އެއްބަސްވުމުގެ ދަށުން ޖުމްލަ 75 ބާވަތަކުން ވިޔަފާރީގެ ލުއިތަކެއް ދިނުމަށް ވަނީ ހަމަޖެހިފައެވެ. މީގެ ސަބަބުން، 85 މިލިއަނަށްވުރެ ގިނަ ކަސްޓަމަރުންގެ މާކެޓެއް އޮތް ތުރުކީވިލާތަށް ރާއްޖޭގެ މަހުގެ އުފެއްދުންތައް ބޭރުކުރުމަށް އިތުރު ފުރުޞަތުތަކެއް ހުޅުވިގެންދާނޭކަމަށް ވަޒީރު ވަނީ ވިދާޅުވެފައެވެ. ހަމައެއާއެކު، ތުރުކީވިލާތުގެ އުފެއްދުންތަކާއި ޒަރޫރީ މުދާ ހޯދުމުގައި ދިވެހި ވިޔަފާރިވެރިންނަށް ފަހި ފުރުޞަތުތަކެއް ލިބިގެންދާނެއެވެ.

އިކޮނޮމިކް މިނިސްޓަރު ސައީދު ވިދާޅުވެފައިވަނީ، އުންމީދަކީ އަމަލުކުރަން ފެށި އެއްބަސްވުމާއެކު، ދެ ޤައުމުގެ ދެމެދުގައި އޮތް އިޤްތިޞާދީ އެއްބާރުލުން އިތުރަށް ބަދަހިވެ، ދެ ޤައުމުގެ ރައްޔިތުންނަށް ދެމެހެއްޓެނިވި ތަނަވަސްކަމާއި މަންފާ ލިބިގެންދިއުން ކަމަށެވެ.

ރާއްޖެއާއި ތުރުކީ އާ ދެމެދު އެކި ދާއިރާތަކުން ވަނީ އެއްބަސްވުންތައް ގާއިމްކޮށްފައެވެ. މީގެ ތެރޭގައި އިގްތިސާދީ އެއްބަސްވުމުގެ އިތުރުން އަސްކަރީ، އަދި ތައުލީމީ ދާއިރާ ފާހަގަކޮށްލެވެއެވެ.