ހިތްބިރުގަތުމަކީ މައްސަލައެއް ނޫން!

އިއްޔެ މީސް މީޑިޔާގެ ވަސީލަތްތައް ހުޅުވާލުމުން ފެނިގެންދިޔަ އެއް ބޮޑު ކަމަކީ ޓްރާންސްޕޯޓް މިނިސްޓަރ އައިޝަތު ނަހުލާއަށް މީޑިޔާގެ ކުރިމަތީގައި ވާހަކަދައްކަވަން ޖެހިވަޑައިގަތުމުން އެކަމާއި ހިތްބިރުގަނެ، ޖެހިގެން އިން ފަރާތެއްގެ ކައިރީގައި އެވާހަކަ ބުނާ ވީޑިޔޯއެކެވެ.

ސަރުކާރުގެ ކޯލިޝަނުގެ އެކްޓިވިސްޓުންނާއި އިދިކޮޅު ޕީޕީއެމްގެ އެކްޓިވިސްޓުންނަށްވެސް، މިނިސްޓަރ ނަހުލާ ހިތްބިރުގަތުން ވެގެންދިޔައީ މާ މޮޅުކަމަކަށެވެ. މިނިސްޓަރަށް ފާޑެއް ކިޔައި، ހަޖޫޖަހާލަން ލިބުނު ރަނުގެ ފުރުސަތެއްގެ ގޮތުގައެވެ. ކަންވީވެސް އެހެންނެވެ. މިނިސްޓަރަށް ފާޑުކިޔައި، ދައުލަތުގެ އިސްވެރިންވެސް ހިތްބިރުގަނޭތޯ ސުވާލުކޮށް މުޅި ފޭސްބުކާއި ޓްވިޓަރގައި އޮތީ އެ ވީޑިޔޯއެވެ.

މިވީޑިޔޯ ލުމާއި އެކު ފާޑުކިޔުންތައް މިނިސްޓަރަށް އަމާޒުކުރިޔަސް، ބައެއް ފަރާތްތަކުން މިނިސްޓަރ އައިޝަތު ނަހުލާގެ ސްޓޭޖް ފްރައިޓްގެ ދިފާއުގައި އެކަމަށް ހަޖޫނުޖެހުމަށް އެދި ވާހަކަދެއްކިއެވެ. މީގެ ތެރެއިން އެކަކީ މަޝްހޫރު ޓީވީ ޕްރެޒެންޓަރ އަދި ނޫސްވެރިޔާ މޫސާ ވަސީމެވެ. ވަސީމް ބުނިގޮތުގައި މިނިސްޓަރ ހިތް ބިރުގަތުމަކީ އެކަމުގައި އެއްވެސް ގޯސްކަމެއް އަދި ހޭންވީ ސަބަބެއް އޮތްކަމެއް ނޫނެވެ. އެއީ، ކެމެރާއަށް ބަލައި ވާހަކަދެއްކުމަކީ ތަޖުރިބާކާރު ފަރާތެއްވިޔަސް އުނދަގޫ ވެދާނެކަމަކަށް ވާތީކަމަށް ވަސީމް ބުންޏެވެ.

މީގެ އިތުރުން މަޖިލީހާއި އެހެނިހެން ޕޯޑިއަމް ތަކުގައި ދޫފަރިތަކަމާ ޖެހިލުން ކުޑަކޮށް ވާހަކަ ދެއްކުމަށް މަޝްހޫރު މަޖިލިސް މެންބަރ އީވާ ވެސް މިކަމަށް ރައްދުދެއްވައި ވަނީ ޓުވީޓު ކުރައްވާފައެވެ.

ހަގީގަތުގައި އެއީ ތެދެކެވެ. އާންމުންގެ ކުރިމައްޗަށް އަރައިހުރެ ރާއްޖޭގެ ގިނަ މޮޅެތި ސިޔާސީ ވެރިންވެސް ދޫއޮޅި، ބިރުފުޅުގަންނަގޮތްވެއެވެ. އެއީ އިންސާނީ ތަބިއްޔަތުގައި ކިތަންމެ ދަށަސް އަދި މޮޅަސް ހުރެފާނެ ސިފަޔަކަށް ވާތީއެވެ. ނަމަވެސް އެ ސިފަ ފެނިގެން އެއީ މާ މޮޅުކަމަކަށް ވެގެންދިޔައީ މިނިސްޓަރ ނަހުލާގެ ކިބައިން ފެނިދިއުމުންނެވެ.

ނަމަވެސް މިނިސްޓަރަށް ކިޔަމުންދާ ފާޑުތަކާއި އެއްބަސްވާ ފަރާތްތަކުން ބުނާގޮތުގަައި މިނިސްޓަރަކަށްވީތީ، ބިރުފަދަ ކަންކަމަކީ ހުރެގެންވާނެ ކަންކަން ނޫންކަމަށާއި ލިޔެފައިވާ ގަނޑެއް ބަލާލައިގެން އެއްޗެއް ފަރިތަކޮށް ކިޔާލަން ނޭނގުމަކީ ލަދުވެތިކަމެއް ކަަމަށެވެ. އަދި އެއީ މިނިސްޓަރުންނަށް ވުމުން ވަކި ފަންތިއެއް ބަހައްޓަން ޖެހޭނެތީކަމަށްވެސް އެ ފަރާތްތަކުން ދަނީ ބުނަމުންނެވެ.

ކޮންމެ ގޮތެއް ވިޔަސް ހަގީގަތަކީ ހިތްބިރުގަތުމަކީ އިންސާނީ ސިފަތަކުގެ ތެރެއިން ސިފައެއްކަމުގައިވާކަމެވެ. މިނިސްޓަރަކީވެސް އިންސާނެކެވެ. ފުރަތަމަ ބިރުވެސް ގަނެދާނެއެވެ. އެކަމަކުވެސް އެއީ މިނިސްޓަރަށް ފާޑުކިޔޭނެ ގޮތެއްކަމުގައި ހެދުމަކީ އެއީ އެންމެ ބުއްދިވެރި ގޮތްބާވައެވެ؟