ވައިޓް ހައުސް ކައިރީގައި ބަޑީގެ ހަމަލާތަކެއް؛ ”ހަމަލާތައް ދިން މީހާ ސީކްރެޓް ސާވިސްގެ ހަމަލާތަކުގައި މަރުވެއްޖެ“

އެމެރިކާގެ ރިޔާސީ ގަނޑުވަރު، ވައިޓް ހައުސް ކޮމްޕްލެކްސް ކައިރީގައި ހޮނިހިރު ދުވަހު ބަޑީގެ ހަމަލާތަކެއް ދިން މީހަކު، ސަލާމަތީ ބާރުތަކުން ދިން ރައްދު ހަމަލާތަކުގައި މަރުވެއްޖެ ކަމަށް ޔޫއެސް ސީކްރެޓް ސާވިސްއިން ހާމަކޮށްފިއެވެ.

ސީކްރެޓް ސާވިސްއިން ނެރުނު ބަޔާނެއްގައި ބުނެފައިވަނީ، މި ހާދިސާ ހިނގާފައިވަނީ އެ ގައުމުގެ ގަޑިން ހޮނިހިރު ދުވަހުގެ އިރުއޮއްސި 6:00 ޖަހާ އެހާކަންހާއިރު، ވައިޓް ހައުސްގެ ގޯތިތެރެއިން ބޭރުގައި އޮންނަ 17 ވަނަ މަގާއި ޕެންސިލްވޭނިއާ އެވެނިއު އެންޑަބްލިއު ގުޅުނު ސަރަހައްދުގައެވެ.

ކަމާބެހޭ ފަރާތްތަކުން މައުލޫމާތު ދޭ ގޮތުގައި، ތުހުމަތު ކުރެވޭ މީހާ ބޭނުންކުރީ އޭނާ ގެންގުޅުނު ދަބަހުން ނެގި ބަޑިއެކެވެ.

"ސީކްރެޓް ސާވިސްގެ ފުލުހުން ވަނީ ރައްދުގައި ހަމަލާދީ އެ މީހާގެ ގަޔަށް ބަޑިޖަހާފައި. އޭނާ ވަގުތުން އެ ސަރަހައްދުގެ ހޮސްޕިޓަލަކަށް ގެންދިޔަ ނަމަވެސް، ހޮސްޕިޓަލަށް ގެންދިޔަ ފަހުން މަރުވެފައިވާ ކަމަށް ވަނީ ކަނޑައަޅާފައި،" ސީކްރެޓް ސާވިސްގެ ބަޔާނުގައިވެއެވެ.

މި ހާދިސާގައި މަގުމަތިން ދިޔަ އާންމު މީހެއްގެ ގަޔަށްވެސް ބަޑީގެ ވަޒަން އަރާފައިވާ ކަމަށް އެ އިދާރާއިން ބުނެއެވެ. ނަމަވެސް އެމީހާގެ ހާލަތާ ބެހޭ އެންމެ ފަހުގެ ތަފްސީލެއް އަދި އާންމެއް ނުކުރެއެވެ. މި ހާދިސާގައި ސީކްރެޓް ސާވިސްގެ އެއްވެސް އޮފިސަރަކަށް އަނިޔާއެއް ލިބިފައެއް ނުވެއެވެ.

ހާދިސާ ހިނގި ވަގުތު އެމެރިކާގެ ރައީސް ޑޮނަލްޑް ޓްރަމްޕް ހުރީ ވައިޓް ހައުސްގެ އެތެރޭގައެވެ. އޭބީސީ ނިއުސްއިން ރިޕޯޓްކޮށްފައިވާ ގޮތުގައި، ބަޑީގެ ހަމަލާތައް ދިން ވަގުތު ރައީސް ޓްރަމްޕް އިނީ އޯވަލް އޮފީހުގައި ސްޓީވަން ޗިއަންގް، ނަޓަލީ ހާޕް އަދި މާގޯ މާޓިން އާއެކުގައެވެ. ސީކްރެޓް ސާވިސްއިން ކަށަވަރުކޮށްދީފައިވާ ގޮތުގައި މި ހާދިސާގެ ސަބަބުން ރައީސްގެ ސަލާމަތަށް ނުވަތަ ވައިޓް ހައުސްގެ އޮޕަރޭޝަންތަކަށް އެއްވެސް ބުރޫއެއް އަރާފައެއް ނުވެއެވެ.

މި ހާދިސާ މިހާރު ދަނީ އިތުރަށް ތަހުގީގު ކުރަމުންނެވެ. އެފްބީއައިގެ ޑައިރެކްޓަރު ކާޝް ޕަޓޭލް ބުނީ، އެފްބީއައިގެ އޮފިސަރުން އެ ސަރަހައްދުގައި ހަރަކާތްތެރިވަމުންދާ ކަމަށާއި، ސީކްރެޓް ސާވިސްއަށް ތަހުގީގުގައި އެހީތެރިވަމުންދާ ކަމަށެވެ. މީގެ އިތުރުން ވޮޝިންޓަން ޑީސީގެ މެޓްރޯޕޮލިޓަން ޕޮލިސް ޑިޕާޓްމަންޓުންވެސް ދަނީ މި މައްސަލަ ބަލަމުންނެވެ.

ބަޑީގެ ހަމަލާތަކާ ގުޅިގެން ވައިޓް ހައުސް ވަގުތީ ގޮތުން ލޮކްޑައުން ކުރި ނަމަވެސް، ފަހުން ވަނީ އެ ފިޔަވަޅުތައް އުވާލާފައެވެ.