އޮޑިޓަރ ޖެނެރަލް ދެއްވާ ލަފާ ބޮލާލާ ނުޖަހާނަން، މަސައްކަތްކުރާނީ އެކުގައި: މާލީ ވަޒީރު

ބަޖެޓާ ގުޅޭގޮތުންވިއަސް އަދި އެނޫންވެސް މާލީ މުއާމަލާތްތަކާ ގުޅޭގޮތުން އޮޑިޓަރ ޖެނެރަލް ދެއްވާ ރަޢުޔު ސަރުކާރުން އަޑުއަހާނޭކަމަށާއި، މާލީ ވުޒާރާއިން މަސައްކަތްކުރަމުންދާނީ އޮޑިޓަރ ޖެނެރަލް އަދި އެނޫންވެސް މިނިވަން މުއައްސަސާތަކާއެކުގައިކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެއެވެ.

ރައްޔިތުން މަޖިލީހުގައި ބަޖެޓް ދިރާސާކުރުމުގެ މަސައްކަތްތައް ކުރިއަށްދާއިރު މާލީ ވަޒީރު މިއަދު ވަނީ މަޖިލީހުގެ ތަޅުމަށް ހާޒިރުވެ، މެމްބަރުންގެ ސުވާލުތަކަށް ޖަވާބުދާރީވެ ވަޑައިގެން ވާހަކަދައްކަވާފައެވެ. މާލީ ވަޒީރު ވިދާޅުވީ ބަޖެޓާ ގުޅޭގޮތުން އޮޑިޓަރ ޖެނެރަލްގެ ހުރި ކަންބޮޑުވުންތައް ބަލައިގަނެ، އޮޑިޓަރ ޖެނެރަލްގެ ޓީމާއެކު މާލީވުޒާރާއިން މަސައްކަތް ކުރަމުންދާނޭކަމަށެވެ.

ވަޒީރު ވިދާޅުވީ ފިނޭންސް މިނިސްޓްރީން މަސައްކަތްކުރަމުންދާނީ ރައީސުލްޖުމްހޫރިއްޔާ ޑރ.މުހައްމަދު މުއިއްޒު ދެއްވާފައިވާ އިރުޝާދުތަކަށް އޮޑިޓަރ ޖެނެރަލްގެ ލަފާވެސް ހޯއްދަވައިގެންކަމަށެވެ.

އަޅުގަނޑުމެން ކުރާ ހުރިހާ މަސައްކަތެއްގަވެސް އެންމެ ގާތުން އެ މަސައްކަތް ކުރަނީ އޮޑިޓަރ ޖެނެރަލްއާ އެކުގައޭ ޖަވާބުދާރީ ވެވޭނެ ގޮތަކަށް

މާލީ ވަޒީރު މޫސާ ޒަމީރު

މާލީ ވަޒީރު ވިދާޅުވީ ބަޖެޓް ކޮމިޓީއަށް އޮޑިޓަރ ޖެނެރަލް ވަޑައިގެން ދެއްވި ލަފާ އެކަމަށް ހާއްސަ ބައްދަލުވުންތަކެއް ބާއްވައިގެން ކުރިއަށްގެންދާނޭކަމަށެވެ.

އަންނަ އަހަރުގެ ބަޖެޓާ ގުޅޭގޮތުން އޮޑިޓަރ ޖެނެރަލްގެ އޮފީހުން މަޖިލީހަށް ދެއްވި ރައުޔުގައި ބުނެފައިވަނީ އާމްދަނީ އިތުރުކުރާނޭ ގޮތެއް އަދި ހަރަދުތައް ކުޑަކުރާނޭ ގޮތެއް ފެންނަން ނެތްކަމަށެވެ. ނަމަވެސް ބަޖެޓްގެ ބައެއް މުހިންމު އަންދާޒާތައް ރަނގަޅުކަން ވަނީ ފާހަގަކުރައްވާފައެވެ.

އަންނަ އަހަރަށް ލަފާކުރާ ދައުލަތުގެ ބަޖެޓުން، ސްކޫކާއި ބޮންޑު އަނބުރައި ދެއްކުމުގެ ޚަރަދުނުލައި އަންނަ އަހަރުގެ ބަޖެޓަކީ 55 ބިލިއަން ރުފިޔާ ކަމަށް މާލީ ވަޒީރު ވަނީ ވިދާޅުވެފައެވެ. ވަޒީރު ވިދާޅުވީ، 64.2 ބިލިއަން ރުފިޔާގެ އެ ބަޖެޓުން 9.3 ބިލިއަން ރުފިޔާއަކީ ސުކޫކާއި ބޮންޑު އަނބުރާ ދެއްކުމުގެ ޚަރަދު ކަމަށެވެ.