މަކުނުދޫ އެއާޕޯޓުގެ ރަންވޭ 1800 މީޓަރު ދިގު ރަންވޭ އަކަށް ހަދައިދޭނަން: ރައީސް ޑރ.މުއިއްޒު

ހދ.މަކުނުދޫ އެއާޕޯޓުގެ ރަންވޭ 1800 މީޓަރު ދިގު ރަންވޭ އަކަށް ހަދައިދެއްވާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ރައީސް ޑރ.މުއިއްޒު މިފަދައިން ވިދާޅުވީ އުތުރުގެ 4 އަތޮޅަށް އެމަނިކުފާނު ކުރައްވާ ދަތުރުފުޅުގެ ތެރެއިން ހދ.މަކުނުދޫއަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވާ ދެއްކެވި ވާހަކަފުޅުގައެވެ.

މިގޮތުން ރައީސް ޑރ.މުއިއްޒު ވިދާޅުވީ އެއާޕޯޓަކީ ރަށުގެ ތަރައްގީއަށް އެކި ގޮތް ގޮތުން ބަލާއިރު މުހިންމު ކަމެއް ނަމަވެސް މަސައްކަތް ފެށިގެން ކުރިއަށް ދަނީ އެ ރަށުގެ ރައްޔިތުން ބޭނުންވާ ގޮތަށް ނޫން ކަމަށެވެ. އަދި މިއަދު ރަށު ކައުންސިލާއި ރައްޔިތުން ވެސް ރައީސް ޑރ.މުއިއްޒު ގެ ގާތުގައި ރަށުގެ އެއާޕޯޓުގެ ރަންވޭ މިހާރު ހެދުމަށް ހަމަޖެހިފައިވާ ދިގުމިނަށް ވުރެ ދިގު ރަންވޭ އަކަށް ހަދަން އެދުނު ކަމަށް ވެސް އެމަނިކުފާނު ވިދާޅުވިއެވެ.

"ކައުންސިލް އިން އަޅުގަނޑު ގާތުގައި ދެންނެވި އަދި ރައްޔިތުންވެސް އަޅުގަނޑަށް ދަންނަވާފައި ވަނީ އެއާޕޯޓުގެ ރަންވޭ އަކީ މިހާރު އެހަދަން އުޅޭ ދިގުމިނަށް ވުރެ ދިގު ރަންވޭ އަކަށް ހަދަން. އެހެންވީމަ، އަޅުގަނޑު ރައްޔިތުންނަށް ދޭނެ ޔަގީން ކަމަކީ އިރާދަކުރެއްވިއްޔާ 1800 މީޓަރު ދިގު ރަންވޭ އަކަށް ހަދައިދޭނަމޭ."

ރައީސް ޑރ.މުއިއްޒު ވިދާޅުވިއެވެ.

މީގެ އިތުރުންވެސް ރައީސް ޑރ.މުއިއްޒު ވިދާޅުވީ މަކުނުދޫގައި އެއާޕޯޓު ހެދުމުގެ މަސައްކަތުގެ ތެރެއިން ހިނގަމުންދާ ބިން ހިއްކުމުގެ މަޝްރޫއުގެ ތެރެއިން، ބިން ހިއްކައި ނިމޭއިރު، ރަށުގެ ގެދޮރުވެރިކަމުގެ ބޭނުމަށާއި ރަށުގެ ތަރައްގީ އަށް ވެސް  އެކަށިގެންވާ ވަރަށް ބިން ހިއްކިގެންދާނެ ކަމަށެވެ.

ރައީސް ޑރ.މުއިއްޒު ވަނީ ރިޔާސީ އިންތިހާބުގައި މަކުނުދޫގެ ރައްޔިތުންނަށް ވައުދުވެވަޑައިގެންނެވި ފަދައިން ހުރިހާ ވައުދެއްވެސް ފުއްދާނެ ކަމުގެ ޔަގީންކަން އެ ރަށުގެ ރައްޔިތުންނަށް ދެއްވާފައެވެ.