ސުޕްރީމް ކޯޓުން ވެސް ޝަމްއާން މިނިވަނެއް ނުކުރި
އިމިގްރޭޝަންގެ ކުރީގެ ކޮންޓްރޯލާ ޖެނެރަލް މުހައްމަދު ޝައްމާން ވަހީދު ޝަރީޢަތް ނިމެންދެން ބަންދުކުރަން ދަށު ކޯޓުން ނިންމި ނިންމުމަށް ސުޕްރީމް ކޯޓުން ވެސް ތާއީދު ކޮށްފިއެވެ.
މަގާމުގެ ނުފޫޒު ބޭނުންކޮށްގެން ބިދޭސީ ބައެއްގެ އަތުން ނާޖާއިޒު މަންފާ ނެގި ކަމަށް ބުނާ މައްސަލާގައި ކޯޓުއަމުރެއްގެ ދަށުން ޝަމްއާން ހައްޔަރުކުރީ މިދިޔަ މާޗު 21 ގައެވެ. އޭނާގެ ބަންދާމެދު ގޮތް ނިންމަން ކޯޓަށް ހާޒިރު ކުރުމުން 15 ދުވަހުގެ ބަންދުގެ މުއްދަތެއް ޖަހާފައިވެ އެވެ. އެ މުއްދަތު ހަމަވުމުން ކޯޓަށް ހާޒިރު ކުރުމުން ޝަރީއަތް ނިމެންދެން ބަންދުގައި ބެހެއްޓުމަށް އަމުރުކޮށްފައިވާ ކަމަށް ފުލުހުން ބުންޏެވެ.
ބަންދު އަމުރުތައް ޝަމްއާންގެ ފަރާތުން އެންމެ ފުރަތަމަ އިސްތިއުނާފްކުރީ ހައި ކޯޓުގައެވެ. ނަމަވެސް ހައި ކޯޓުންވެސް ދަށު ކޯޓުގެ ނިންމުމަށް ތާއިދު ކޮށްފައިވާއިރު، އެ މައްސަލަ އަލުން ސުޕްރީމް ކޯޓަށް ހުށަހެޅުމުން އެ ކޯޓުން ވެސް މިއަދު ނިންމީ އޭނާ ޝަރީއަތް ނިމެންދެން ބަންދުކުރީ ރަނގަޅަށް ކަމަށެވެ.
ބަންދު އަމުރުތަކާ ގުޅޭ ގޮތުން ހައިކޯޓުން ނިންމި ނިންމުން ބާތިލް ކުރުމަށް އެދުމުގެ އިތުރުން، ޝަމްޢާންގެ ވަނީ އެންޓި-ކޮރަޕްޝަން ކޮމިޝަން (އޭސީސީ)ގެ އެއްވެސް ބައިވެރިވުމެއް ނެތި ކޮރަޕްޝަނުގެ މައްސަލަތައް ފުލުހުންނަށް ބެލިދާނެ ކަމަށް ހައި ކޯޓުން ކަނޑައަޅާފައިވާ ނިންމުން ވެސް ބާތިލުކޮށްދިނުމަށް އެދިފައެވެ.
ސްޕްރީމް ކޯޓުން ނިންމީ ހައިކޯޓުގެ އެ ނިންމުން ގާނޫނާ ޚިލާފް ކަމަށެވެ. އެހެން ކަމުން އެ ނިންމުން ވަނީ ބާތިލްކޮށްފައެވެ.
ޝަމްއާންގެ މައްޗަށް ފުލުހުން ހިންގި ތަހުގީގު ނިންމާ މިދިޔަ މަހުގެ 11 ވަނަ ދުވަހު އެ މައްސަލަ ޕީޖީ އޮފީހަށް ފޮނުވާފައިވާއިރު، ޕީޖީ އޮފީހުން ބުނީ ޝަމްއާންގެ މައްޗަށް ތިން ދައުވާއެއް އުފުލާ ކްރިމިނަލް ކޯޓަށް މައްސަލަ ފޮނުވާފައިވާ ކަމަށެވެ.
އެގޮތުން، ޝަމްއާންގެ މައްޗަށް އުފުލީ ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދައުވާ އާއި މަނީ ލޯންޑްރިންގެ ދައުވާ އާއި ފޭރުމުގައި ބައިވެރިވުމުގެ ކުށުގެ ދައުވާ އެވެ.
މި ދައުވާތައް ސާބިތުވެއްޖެނަމަ ވިއްސަކަށް އަހަރުގެ ޖަލު ހުކުމެއް އަންނާނެ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
