ރައީސް ޞާލިހަށް އިންތިޚާބު ކާމިޔާބުކޮށް ދިނުމަށް ރައީސް ނަޝީދު މަސައްކަތް ކުރަންޖެހޭ: އަލީ ނިޔާޒު
މިއަހަރު ބޭއްވޭ ރިޔާސީ އިންތިޙާބަށް އެމްޑީޕީގެ ރިޔާސީ ކެނޑިޑޭޓް ރައީސް އިބްރާހިމް މުހައްމަދު ޞާލިހު ހޮވުމަށް، ޕާޓީގެ ރައީސްގެ ހައިސިއްޔަތުން އެންމެ ބުރަކޮށް މަސައްކަތް ކުރައްވަން ޖެހޭނީ ރައީސް މުހައްމަދު ނަޝީދު ކަމަށް ހުޅުމާލެ ދާއިރާގެ މެމްބަރު އަލީ ނިޔާޒު ވިދާޅުވެއްޖެއެވެ.
އެގޮތުން ރޭ ވީޓީވީގެ ފަސްމަންޒަރު ޕްރޮޮގްރާމްގައި ވާހަކަ ދައްކަވަމުން އަލީ ނިޔާޒު ވަނީ ބަލިވުމުން ބަލި ޤަބޫލްކޮށް، ނާކާމިޔާބުގައި ހިތްތިރި ކުރައްވާ، ކާމިޔާބު ލިބުނު ފަރާތާއިއެކު ކުރިއަށް ދިޔުމަކީ ރައީސް ނަޝީދު ވަރަށް ގިނައިން ވިދާޅުވާ ބަހެއް ކަމަށް ފާހަގަ ކޮށްފައެވެ.
މިއާއިއެކު ނިޔާޒު ވަނީ ރިޔާސީ ޓިކެޓް ހަވާލުކުރުމުގެ ރަސްމިއްޔާތަށް ޕާޓީގެ ރައީސް ވަޑައިގަންނަވަން ވާނެކަމަށް ވިދާޅުވެ އެކަން ނުކުރުމަކީ ވަރަށް ދެރަކަމެއްގެ ގޮތުގައި ފާހަގަ ކުރައްވާފައެވެ.
މީގެ އިތުރުން ޕާޓީގެ ރައީސްގެ މަސްއޫލިއްޔަތުގެ ތެރެއިން ރިޔާސީ ޓިކެޓް ލިބިވަޑައިގަންނަވާ ފަރާތާއެކީ މަސައްކަތް ކޮށް، އިންތިޚާބު ކާމިޔާބު ކުރުމަށް މަސައްކަތް ކުރަން ޖެހޭނެ ކަމަށް ނިޔާޒު ވަނީ ވިދާޅުވެފައެވެ.
"ޕާޓީގެ ރައީސް ރައީސް ނަޝީދަކީ. އެހެންވީމަ ޕާޓީގެ ރިޔާސީ ކެނޑިޑޭޓު ހޮވުމަށްޓަކާ އެންމެ ބުރަކޮށް މަސައްކަތް ކުރައްވަންޖެހޭ އެއްފަރާތަކީ ޕާޓީގެ ރައީސް. އެހެންވީމަ ޕާޓީގެ ރައީސް އެކަން ނުކުރައްވާ ހުންނަވާނެ ކަމަކަށް އަޅުގަނޑު ގަބޫލެއް ނުކުރަން. މިވަގުތު އަދި ޚިޔާލުތަފާތުވުން ހުރެގެން އެއްފަރާތްވެގެން ހުންނެވި ނަމަވެސް، އަޅުގަނޑު ދެކޭ ގޮތުގައި ކެންޕޭން ފެށީމަ ކެންޕޭނާ އެއްކޮށް ހަމަ ރަށްރަށަށްވެސް ދަތުރު ކުރައްވަންވާނެ. އަދި މި ސިޔާސަތުތައް ވިއްކުމަށްޓަކާ ކުރެވެންހުރި ހުރިހާ މަސައްކަތެއް ޕާޓީގެ ރައީސް ކުރައްވަން ޖެހޭކަމަށް އަޅުގަނޑު ގަބޫލުކުރަނީ. ނުކުރާ ކަމަށް ވަންޏާ އެއީ ގޯހެއް." ނިޔާޒު ވިދާޅުވިއެވެ.
ނިޔާޒުގެ ވާހަކަ ނިންމާލަމުން ޕްރައިމަރީގައި ދެބޭފުޅުން ވާދަ ކުރައްވާގެން އެއް ބޭފުޅަކު ހޮވިފައިވާކަމަށާއި މިއީ އަބަދުވެސް ޕްރައިމަރީގައި އެކަން ހިނގާ ގޮތް ކަމަށް ވަނީ ވިދާޅުވެފައެވެ.
އެހެންކަމުން ނިޔާޒު ވަނީ ޕްރައިމަރީގައި މޮޅުވެފައިވާ ބޭފުޅާއި އެއްކޮށް ޕާޓީގެ ހުރިހާ މެމްބަރުން ނިކުންނަވާ ރިޔާސީ އިންތިޙާބު ކާމިޔާބު ކުރުމަށް މަސައްކަތް ކުރެއްވުމަށް ގޮވާލާ އިރާދަކުރެއްވިއްޔާ އެޕާޓީއީން އެއްބުރުން އިންތިޙާބު ކާމިޔާބު ވާނެ ކަމަށް ވިދާޅުވެފައެެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
