ކަނޑޫމާ ރިސޯޓުން ފަރަށް ގެއްލުންދިން މައްސަލަ އީޕީއޭ އިން ބަލަނީ

ހޮލިޑޭ އިން ކަނޑޫމާ ރިސޯޓުން އެ ރިސޯޓް ފަޅުން ވެއްޔާއި ގައު ނެގި މައްސަލައެއް އީޕީއޭ އިން ބަލަން ފަށައިފި އެވެ.

"ވޮއިސް" އަށް މައުލޫމާތު ލިބިފައިވާ ގޮތުގައި ކަނޑޫމާގެ މެނޭޖްމަންޓްއިން ވަނީ އީޕީއޭ އިން ހުއްދަ ނުނަގާ އެކްސްކަވޭޓަރ ބޭނުން ކޮށްގެން ރިސޯޓް ގެ ފަޅު ކޮނެ، ވަކި ސަރަހައްދެއް ފުންކޮށް، އެތާނގައި ހުރި ވެއްޔާ ގައުވެސް ނަގާފައެވެ.

އަދި އެ ސަރަހައްދުގެ އަތިރިމަތީގައި ގަލުން ކުދި ތޮށިތައް ވެސް ހަދާފައިވާއިރު، ފަރުން ނެގި ގާތަށް ތަޅައިކުދި ކޮށްގެން ފަރުމަތީގައި ގެބިއަން ވޯލްތައް ވެސް އެ ރިސޯޓުން ވަނީ ހަދާފައެވެ.

ކަނޑޫމާ ރިސޯޓުން އީޕީއޭގެ ހުއްދަ ނެތި ހަދާފައިވާ ސަރަހައްދުގެ ފޮޓޯތަކާއި އެ ސަރަހައްދުގެ މައުލޫމާތު ތައް ވޮއިސް އަށް ލިބިފައިވާއިރު، ރިސޯޓުގެ މޫދުން ވެލި ނަގައިގެން ސަރަހައްދެއް ފުންކޮށް، އެ ވެލިން ބީޗެއް ހަދާފައިވާއިރު، މޫދުން އެ ވެލި ނެގި ސަރަހައްދުގެ ބޮޑުމިން ގާތްގަނޑަކަށް ފުޓުބޯޅަ ދަނޑެއް ވަރު ވާނެކަމަށް ލަފާކުރެވެއެވެ.

އަދި ވެލި ނަގައިގެން ހަދާފައިވާ ބީޗުގައި މިހާރު ވަނީ ހަޓް ތަކާއި ގޮނޑިތައްވެސް ބަހައްޓާފައެވެ.

މި މައްސަލައާއި ގުޅިގެން އީޕީއޭއިން އެ ރިސޯޓަށް ފޮނުވި ސިޓީ ވޮއިސް އަށް ވަނީ ލިބިފައެވެ. އެ ސިޓީގައި ވާގޮތުން، އެ ރިސޯޓުން ގަވާއިދާއި ޚިލާފަށް ވެއްޔާއި ގައު ނެގި މައްސަލަ އާއި ގުޅިގެން ބަލަންޖެހޭ ކަންކަން އީޕީއޭއިން އަންނަނީ ބަލަމުންނެވެ.

އާއްމުގޮތެއްގައި، އީޕީއޭގެ ހުއްދަނެތި ކުރާ މިފަދަ ކަންކަމުގެ ސަބަބުން ރިސޯޓުތަކާއި ކައުންސިލްތައް ބޮޑު އަދަދުން ޖޫރިމަނާ ކުރެއެވެ.