ރިޔާސީ އިންތިޚާބުގައި އެހެން ޕާޓީތައް ޕީޕީއެމްގެ ފަހަތަށް އެރުމަށް ދަޢުވަތުއަރުވަން: އަބްދުއްރަހީމް
އިސްލާހަށް މަސައްކަތް ކުރަން ބޭނުންވާ ސިޔާސީ ޕާޓީތައް ކުރިއަށް އޮތް ރިޔާސީ އިންތިޚާބުގައި ޕީޕީއެމްގެ ފަހަތަށް އެރުމަށް އިދިކޮޅު އިއްތިހާދުގައި ހިމެނޭ ޕީއެންސީގެ ރައީސް އަބްދުއްރަހީމް އަބްދުالله ދަޢުވަތުއަރުވައިފި އެވެ.
ރިޔާސީ އިންތިޚާބުގައި ޕީޕީއެމްގެ ފަހަތަށް އެރުމަށް ސިޔާސީ ޕާޓީތަކަށް އަބްދުއްރަހީމް ދަޢުވަތުއަރުވާފައި ވަނީ ޕީޕީއެމް ޖަގަހަ ޖަލްސާގައި ވާހަކަދައްކަވަމުން ނެވެ.
އަބްދުއްރަހީމް ވިދާޅުވީ ސަރުކާރަށް ވާގަވެރިވާ ގިނަ ލީޑަރުންތަކެއް ރިޔާސީ އިންތިޚާބު ބޯމަތިވުމުން ސަރުކާރަށް ފާޑުކިޔަން ފަށާފައިވާ ކަމަށެވެ. އެގޮތުން ގާނޫނު އަސާސީއާއި ޚިލާފު ކަންތައްތަކެއް ސަރުކާރުން ކުރަމުންދާކަމަށް ސަރުކާރު ކޯލިޝަންގައި ތިބި ލީޑަރުން ދެއްކެމަކީ އެމީހުންގެ އިޚްލާސްތެރި ކަމާމެދު ސުވާލު އުފެދޭ ކަމެއްކަމަށް އޭނާ ވިދާޅުވި އެވެ.
އެކަން ފާހަގަކުރައްވާ އަބްދުއްރަހީމް ވިދާޅުވީ ހަމަ ހަގީގަތުގައިވެސް މިހާރު ގޯސްކޮށް ހިނގާ ކަންކަން އިސްލާހުކޮށް ގައުމުގާއި ރައްޔިތުންގެ ހައްގުގައި މަސައްކަތްޕުޅު ކުރަން ބޭނުންފުޅުވާ ސިޔާސީ ލީޑަރެއް ހުރިނަމަ އެ ބޭފުޅަކު ޕީޕީއެމްގެ ފަހަތަށް އަރާވަޑައިގަތުމަށް ދަޢުވަތުއަރުވާ ކަމަށެވެ.
"ރައީސް ޔާމީންގެ ނަން މިފަހަރުގެ ވޯޓު ކަރުދާސްކޮޅުގައި އޮންނާނެ. ޕީޕީއެމްގެ ފަހަތަށް އަރަންވީ އެހެން މީހުން. ޕީޕީއެމްއަކީ ރާއްޖޭގައި އޮތް އެންމެ ޕާޓީ. ބައިބައި ނުވެ ސާބިތުކަންމަތީ ހަރުދަނާ ލީޑަރެއްގެ ފަހަތުގައި ގައުމިއްޔަތުގެ ދިފާއުގައި ދީނުގެ ހައްގުގައި އޮތް ހަމައެކަނި ޕާޓީއަކީ ޕީޕީއެމް ޕީއެންސީ. ތިޔަ ވިދާޅުވާ ވަރަށް މި ގައުމު ދެކެ ލޯބިވަންޏާ، ތިޔަ ވިދާޅުވާގޮތަށް ގައުމުގެ ރައްޔިތުންގެ ހައްގުތައް ރައްކާތެރިކޮށްދޭން ބޭނުންކަމަށް ވަންޏާ، ހުރިހާ ކަމެއް ހުއްޓާލާފަ އަންނަންވީ ނޫން ތޯ ޕީޕީއެމް އާއެކު މި މަސައްކަތުގައި ބައިވެރިވާން"
ޕީއެންސީގެ ރައީސް އަބްދުއްރަހީމް އަބްދުالله
އަބްދުއްރަހީމް ވިދާޅުވީ ޕީޕީއެމްއާއި ގުޅިގެން މަސައްކަތް ކުރުމުގެ ފުރުސަތު ހުރިހާ ސިޔާސީ ޕާޓީއަކަށްވެސް އޮތް ކަމަށެވެ. އެހެން ނަމަވެސް އެކުގައި މަސައްކަތް ކުރުމަށް ޝަރުތުތަކެއް ހުރިކަމަށް އަބްދުއްރަހީމް ވިދާޅުވިއެވެ. އަބްދުއްރަހީމް ވަނީ އެ ޝަރުތުތައްވެސް ހިއްސާ ކުރައްވާފަ އެވެ.
"ޕީޕީއެމްގެ ދޮރު މިއޮތީ ހުޅުވާލެވިފަ. އެކަމަކި ޝަރުތަކާއެކީގައި. އެ ޝަރުތަކީ ހަމައެކަނި ގައުމާއި ރައްޔިތުންގެ ހައްގުގައި މަސައްކަތް ކުރަންވާނީ. މިނިވަންކަމުގެ ދިފާއުގައި މަސައްކަތް ކުރަންވާނީ. ދީން ހިމާޔަތްކުރާ ވާހަކަ ދައްކަންވާނީ. ސަރުކާރުން މަށަށް ލިބޭނެ އެއްޗެއްގެ ވާހަކަ ދައްކަންވީ ވަގުތެއް ނޫން މީކީ"
ޕީއެންސީގެ ރައީސް އަބްދުއްރަހީމް އަބްދުالله
އަބްދުއްރަހީމް ވިދާޅުވީ މިއީ ދެން އަންނަ ވެރިކަމެއްގައި ތިމަންނާމެންނަށް ލިބެން އޮތީ ކޮން މަންފާއެއްތޯ ބަލަންވީ ވަގުތު ނޫން ކަމަށެވެ. އަދި މިއީ އަމިއްލަ އެދުން ދޫކޮށްލާ ގައުމު އިސްކުރަންވީ ފަހަރު ކަމަށެވެ.
މިފަހަރު ބަލަންވީ ގައުމަށް ގައްދާރިވި މި ސަރުކާރުގެ އިސްވެރިންގެ ކިބައިން ގައުމު ސަލާމަތްކޮށްދެވޭނެ ގޮތެއް ކަމަށާއި، އެކަން ކުރުމަށް ސިޔާސީ ޕާޓީތަކުން ޕީޕީއެމްއާއި އެކު މަސައްކަތް ކުރުމަށް ނިކުމެވަޑައިގަތުމަށް އަބްދުއްރަހީމް ގޮވާލެއްވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
