މުދަލާއި ހިދުމަތުގެ އަގު ކޮންޓްރޯލް ކުރަން ގަރާރެއް މަޖިލީހަށް

މުދަލާއި ހިދުމަތުގެ އަގު ބޮޑުވެ، ރައްޔިތުންނަށް ބޮޑެތި ގޮންޖެހުންތަކާއި ކުރިމަތިވަމުންދާތީ، ތަކެތީގެ އަގުތައް ކޮންޓްރޯލް ކުރަން ސަރުކާރަށް ގޮވާލައި ރައްޔިތުންގެ މަޖިލީހަށް ގަރާރެއް ހުށަހަޅައިފި އެވެ.

ރައްޔިތުންގެ މަޖިލީހަށް ހުށަހެޅުއްވީ މަޑުއްވަރީ ދާއިރާގެ މެންބަރު އާދަމް ޝަރީފު ހުށަހެޅުއްވި މި ގަރާރުގައި ބުނީ، ނޭޝަނަލް ބިއުރޯ އޮފް ސްޓެޓިސްޓިކް އިން އާންމު ކޮށްފައިވާ ތަފާސްހިސާބުން ދައްކާ ގޮތުގައި މިދިޔަ އަހަރު ކާބޯތަކެއްޗާއި މުދަލާއި ހިދުމަތުގެ އަގު 7.83 ޕަސެންޓް އިތުރުވެފައިވާ ކަމަށާއި ނިސްބަތުން ވޭތުވެ ދިޔަ އަހަރުގެ ތެރޭގައި 75 އިންސައްތައަށްވުރެ, އިންފްލޭޝަން އުފުލިފައިވާ ކަމަށެވެ.

އަދި ކާބޯތަކެތީގެ ހިދުމަތްދޭ ތަންތަނުގެ އަގުތައް 4.3 އިންސައްތަ ބޮޑުވެފައިވާކަން ތަފާސް ހިސާބުތަކާއި ބެހޭ އިދާރާއިން އާންމުކޮށްފައިވާ ތަފާސް ހިސާބުތަކުން ހާމަވާ ކަމަށެވެ.

އަދި އެ ގަރާރުގައި ބުނެފައި ވަނީ، މި ހިސާބުތަކަށް ބަލާއިރު ކަންބޮޑުވާ މިންވަރަށް އިންފްލޭޝަން މަތިވަމުންދާ ކަމަށާއި، ރާއްޖޭގައި އުފައްދާ ތަކެތީގެ އަގުތަކާއި ހިދުމަތުގެ އަގުތައް އުފުލެމުންދާ ކަމަށެވެ.

"ހާއްސަކޮށް ރޯދަ މަހަށް ދިވެހިން އާއްމުކޮށް ބޭނުންކުރާ ކާބޯތަކެތީގެ އެކި ބާވަތްތަކުގެ އަގުތައް ކުރިއަށްވުރެ ބޮޑުވަމުންދާއިރު ލިބޭ އާމްދަނީން ދެކޮޅުނުޖެހޭ ރައްޔިތުންގެ ގިނަ ބަޔަކަށް އާމްދަނީ އިތުރުކުރެވޭނެ މަގުތަކެއް ފެންނަން ނެތުމާއި ޖޫރިމަނާއާއި އެހެނިހެން ނަންނަމުގައި ސަރުކާރަށް ދައްކަންޖެހޭ ފައިސާ އެއް ދުވަހުން އަނެއް ދުވަހަށް އިތުރުވަމުންދަނީ." ގަރާރުގައި ބުނެފައި ވެއެވެ.

އެހެންކަމުން ސަރުކާރުން ބޮޑުކުރި ޖީއެސްޓީ އަލުން މުރާޖާކޮށް، ސަރުކާރު ހިއްސާވާ ކުންފުނިތަކުގެ އަގު ހެޔޮކުރަން އެ ގަރާރުގައި ގޮވާލާފައިވެ އެވެ. އަދި މުދަލުގެ އަގު ކޮންޓްރޯލް ކުރެވޭނެ ގޮތްތަކެއް ސަރުކާރުން ރާވައި، ހާއްސަކޮށް ރޯދަމަހު ބާޒާރުގައި ވިއްކާ ތެކެތީގެ އަގު އަތްފޯރާ ފަށުގައި ހިފެހެއްޓޭނެ އިންތިޒާމްތައް ހަމަޖައްސައިދިނުމަށް ގޮވާލާފައިވެ އެވެ.