ފޯޅަވަހި ވިއްކާލީ 500 މިލިއަން ޑޮލަރުގެ ޑީލެއް ހަދައިގެން، ޑީލަރަކީ ޝާހިދު: ބޮންޑެ

ރާއްޖޭގެ ކަނޑުގެ ސަރަހައްދުން ބައެއް ގެއްލޭގޮތަށް ފޯޅަވަހި މައްސަލައިގައި ދައުލަތުގެ ސްޓޭންޑް ބަދަލު ކުރީ 500 މިލިއަން ޑޮލަރުގެ ޑީލެއް ހަދައިގެން ކަމަށާއި، އެ ޑީލު ހެދުމުގައި މެދުވެރިއެއްގެ ގޮތުގައި ހަރަކާތްތެރިވީ ސަރުކާރުގެ ފޮރިން މިނިސްޓަރު އަބްދުالله ޝާހިދުކަމަށް މަޖިލީހުގެ ރައްޔިތުންގެ މަޖިލީހުގެ މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑެ) ވިދާޅުވެއްޖެ އެވެ.

ފޯޅަވަހި މައްސަލައިގައި ދައުލަތުގެ ސްޓޭންޑު ބަދަލުކުރުމުގެ ކުރިން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު މޮރިޝަސްގެ ބޮޑުވަޒީރަށް ފޮނުވި ސިޓީފުޅު ހާމަކުރުމަށް ގޮވާލާ ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގެ 33 ވަނަ ޖަލްސާގައި ވާހަކަދައްކަވަމުން މެމްބަރު އިބްރާހިމް ރަޝީދު ވަނީ އަބްދުالله ޝާހިދަށް ބޮޑެތި ތުހުމަތުތަކެއް ކުރައްވާފަ އެވެ.

އޭނާ ވިދާޅުވި ގޮތުގައި ފޯޅަވަހި ޑީލު ހަދާފައިވަނީ ޝާހިދު އދ ގެ އާންމު މަޖިލީހުގެ ރައީސްކަމުގެ މަޤާމުގައި ހުންނަވައިގެން ނެވެ. ފޯޅަވަހި މައްސަލައިގައި ޝާހިދު 500 މިލިއަން ޑޮލަރު ނަގާފައިވާ ކަމަށާއި، އެކަން ތަހުގީގުކުރަން ޖެހޭކަމަށް އޭނާ ވަނީ ގޮވާލައްވާފަ އެވެ. އަދި ޝާހިދު އެ ޑީލު ހަދާފައިވަނީ ރައީސް ޞާލިހަށްވެސް އޮޅުވާލައިގެންކަމަށް ބޮންޑެ ވަނީ ތުހުމަތު ކުރައްވާފަ އެވެ.

"ފޯޅަވަހި ވިއްކާލީ އިއްޒަތްތެރި ރައީސް. 500 މިލިއަން ޑޮލަރުގެ ޑީލެއް ހެދިވާހަކަ ދައްކާ. އެކަން ތަހުގީގު ކުރަން ޖެހޭ. ފޯޅަވަހި އެއީ ރާއްޖޭގެ 15 ވަނަ އަތޮޅު. 15 ވަނަ އަތޮޅު ވިއްކާލީއެ! ރައްޔިތުން މަޖިލީހުން ފާސްކޮށްފަ 2010 ވަނަ އަހަރު ރައީސް ނަޝީދު ފާސްކޮށްފަ އދ އަށް ހުށައަޅާފައި އޮތް ލިޔެކިޔުންތަކެއް ބާތިލުކޮށް ރައްޔިތުންނަށް ސިއްރުން ސިޓީ ފޮނުވައިގެން. މިފަހަރު ރައްޔިތުން ވޯޓެއް ނުދޭނެ ފޯޅަވަހި ސިއްރު ސިޓީ، އަބްދުالله ޝާހިދުގެ ޑީލު، 500 މިލިއަން ޑޮލަރުގެ މައްސަލަ ރައްޔިތުންނަށް ހާމަނުކޮށްދެނީސް"

މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑެ)

މޮރިޝަސްގެ ބޮޑުވަޒީރަށް ރައީސް ޞާލިހު ފޮނުއްވި ސިޓީފުޅު އަނބުރާ ގެނެސް، އެ ސިޓީގައިވާ އެއްޗެއް ހާމަކުރުމަށް ގޮވާލާ ޕެޓިޝަނެއް ތައްޔާރުކުރަން ފަށާފައިވާކަމަށް ބޮންޑެ ވިދާޅުވި އެވެ.

އޭގެ އިތުރުން އޭނާ ވިދާޅުވީ އެ ސިޓީގައި އޮތް އެއްޗެއް ރައްޔިތުންނަށް ހާމަނުކުރާހާ ހިނދެއްގައި ކުރިއަށް އޮތް ރިޔާސީ އިންތިޚާބުގައި ރައީސް އިބްރާހިމް މުޙައްމަދު ޞާލިހަށް ރައްޔިތުން ވޯޓެއް ނުދޭނެ ކަމަށެވެ.

އެހެންކަމުން، އެ މައްސަލަތައް ބަލައި ފޯޅަވަހި ވިއްކާލަން ހެދި ޑީލުގެ މައްސަލަވެސް ތަހުގީގުކޮށް ރައްޔިތުންނަށް ކަން ހިނގާފައި އޮތް ގޮތް އޮޅުން ފިލުވާދިނުމަށް ބޮންޑެ ވަނީ ގޮވާލައްވާފަ އެވެ.