ނަޝީދު ވެއްޖެއްޔާ އަމިއްލަ ޕާޓީއާއި ދެކޮޅަށް މަސައްކަތް ކުރުންވެސް ވަނީ ޑިމޮކްރަސީއަށް: ސަނީފް

މުޙައްމަދު ނަޝީދު ކުރައްވައިފި ނަމަ ޕާޓީގެ ރައީސްގެ މަޤާމުގައި ހުންނަވާ ޕާޓީއާއި ދެކޮޅަށް މަސައްކަތްކުރުން ވެސް ވަނީ ޑިމޮކްރަސީއަށް ކަމަށް ރައްޔިތުންގެ މަޖިލީހުގެ ތިނަދޫ ދެކުނު ދާއިރާގެ މެމްބަރު އަބްދުالله ސަނީފު ވިދާޅުވެއްޖެ އެވެ.

ސަނީފު މިފަދައިން ވިދާޅުވެފައިވަނީ ކުރިއަށް އޮތް ރިޔާސީ އިންތިޚާގައި އެމްޑީޕީން ވާދަކުރައްވާނެ ކެންޑިޑޭޓެއް ކަނޑައަޅާފައި ވަނިކޮށް އެ ކެންޑިޑޭޓާއި ދެކޮޅަށް އަދި މިހާރު ވެރިކަން ކުރަމުންދާ އެމްޑީޕީ ސަރުކާރާއި ދެކޮޅަށް ނަޝީދު މަސައްކަތްޕުޅު ކުރައްވަމުން ގެންދަވާތީ ނުރުހުން ފާޅުކުރައްވާ ކުރެއްވި ޓްވީޓެއްގަ އެވެ.

ސަނީފު ވިދާޅުވަނީ ނަޝީދާއި ޖެހުނީމާ ޑިމޮކްރަސީގެ އުސޫލުތައްވެސް ބަދަލުވާ ކަމަށެވެ. އެމަނިކުފާނު އަމިއްލަފުޅު ޕާޓީއާއި ދެކޮޅަށް މަސައްކަތްޕުޅު ކުރެއްވި ނަމަވެސް އެއީ ޑިމޮކްރަސީގެ ހަމަކަމުގައި ބައްލަވަން ޖެހޭ ކަމަށެވެ.

އޭގެ އިތުރުން އެމްޑީޕީގެ ރިޔާސީ ޕްރައިމަރީއިން ބަލިވެ ވަޑައިގަތުމުން ބަލި ޤަބޫލުފުޅު ނުކުރެއްވުމަކީ ވެސް ޑިމޮކްރަސީކަމަށް ބަލައިގަންނަން ޖެހޭކަމަށް ސަނީފުގެ ޓްވީޓުގައި ވަނީ އިޝާރާތް ކުރައްވާފަ އެވެ.

އޭގެ އިތުރުން ސަނީފު ވަނީ ރައްޔިތުންގެ މަޖިލީހުގެ ރިޔާސަތު ނަޝީދު ބަލަހައްޓަވަމުން ގެންދަވާ ގޮތާއި ގުޅިގެންވެސް ފާޑުކިޔުންތައް އަމާޒުކުރައްވާފަ އެވެ.

މަޖިލީހުގެ ރައީސާއި ނައިބު ރައީސް ހުންނެވި ނަމަވެސް ގިނަ ދުވަސްތަކު ރިޔާސަތު ބަލަހައްޓަވަނީ މަޖިލީހުގެ ވިލިފުށީ ދާއިރާގެ މެމްބަރު އަފީފުކަމަށް ސަނީފު ވިދާޅުވި އެވެ. އަދި އޭނާ ވަނީ މަޖިލީހުގެ ރިޔާސުން ނަޝީދު ބޭލުމަށްފަހު އެ މަގާމު އަފީފަށް ދިނުން މާ ރަނގަޅުކަމަށް ވިދާޅުވެފަ އެވެ.

އެމްޑީޕީގެ ރިޔާސީ ޕްރައިމަރީއާއި ގުޅިގެން ޕާޓީގެ ދެ ރައީސުންނަށް ތާއީދު ކުރައްވާ މެމްބަރުންގެ މެދުގައި އޮތް ޚިޔާލުފަތުވުންތައް ބޮޑުވެ ޕާޓީ ދެބައި ވެފައިވާއިރު މެމްބަރުންގެ މެދުގައި ދަނީ ބަހުގެ ހޫނު ހަމަލާތަކެއްވެސް ބަދަލުކުރައްވަމުން ނެވެ.

މިފަހުން ސަރުކާރުގައި ތިއްބެވި ނަޝީދަށް ތާއީދު ކުރައްވާ ބައެއް މެމްބަރުން މަޤާމުތަކުން ވަކިކުރައްވާފައިވާއިރު، އަންނަ ރިޔާސީ އިންތިޚާބުގައި ނަޝީދާއި އޭނާގެ ވަފާތެރިން ތާއީދުކުރަން ނިންމާފައިވަނީ ޖުމްހޫރީ ޕާޓީގެ ލީޑަރު އަދި އެ ޕާޓީގެ ރިޔާސީ ކެންޑިޑޭޓު ޤާސިމް އިބްރާހިމަށެވެ.

އޭގެ އިތުރުން އެމްޑީޕީގެ ރައީސް ނަޝީދާއި އޭނާގެ ފަހަތްޕުޅުގައި ތިއްބެވި މެމްބަރުން ގެންދަވަނީ ރައީސް ޞާލިހަށް ދެވަނަ ދައުރެއް ދޭންޖެހޭ އެއްވެސް ސަބަބެއް ނެތްކަމަށް ވިދާޅުވަމުންނެވެ.