ރައީސް ޔާމިނުގެ ރިޔާސީ ކެމްޕޭނު ރަސްމީކޮށް ފަށަން ޕީޕީއެމް ތައްޔާރުވެއްޖެ
ޕީޕީއެމްގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމުގެ ރިޔާސީ ކެމްޕޭނު ރަސްމީކޮށް ފެށުމަށް ޕީޕީއެމް ތައްޔާރުވެއްޖެ އެވެ.
އިދިކޮޅު ކޯލިޝަންގެ ލީޑަޝިޕުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އިދިކޮޅު ކޯލިޝަން ހިންގުމާއި ވަގުތީ ގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله ވިދާޅުވީ ރައީސް ޔާމީންގެ ކެމްޕޭނުގެ މަސައްކަތްތައް މިހާރުވެސް ކުރެވެމުންދާ ކަމަށެވެ.
އެގޮތުން މިހާރު ކުރެވެމުންދަނީ އިދާރީ މަސައްކަތްތަކާއި މެނިފެސްޓޯ އެކުލަވާލުމުގެ މަސައްކަތްތައް ކަމަށް އޭނާ ވިދާޅުވި އެވެ.
އެއާއެކު އަބްދުއްރަހީމް ވިދާޅުވީ ރޯދައަށްފަހު ރަސްމީކޮށް ރައީސް ޔާމީންގެ ކެމްޕޭނު ފަށައި އަތޮޅުތެރެއަށް ދަތުރުތައް ފައްޓާނެ ކަމަށެވެ.
"ހަޤީގަތުގައި މިހާރުވެސް ކެމްޕޭނުގެ މަސައްކަތްތައް ކުރެވެމުން އެބަދޭ. ކެމްޕޭނުގެ އިދާރީ މަސައްކަތްތައް މި އޮފީސްތެރޭގައި އެބަ ހިނގާ. މެނިފސްޓީ ލިޔުމުގެ މަސައްކަތް ރައީސް ޔާމީން ހުންނަވާ ހަވާލުކުރެއްވި ގޮތަށް ކުރިއަށް އެބަދޭ. ދެން އޮތީ ދަތުރުތައް! އިރާދަކުރެއްވިއްޔާ ރަމަޟާން މަސް ނިންމާފަ ލަހެއް ނުވެ އަޅުގަނޑުމެންގެ ދަތުރުތައް ފެށިގެންދާނެ. ރައީސް ޔާމިނާއި އަޅުގަނޑުމެން މި ދަނީ ޕާޓީ ކަންކަމުގައި ވަރަށް ގާތުން މަޝްވަރާކުރަމުން"
ޕީއެންސީގެ ރައީސް އަބްދުއްރަހީމް އަބްދުالله
އަބްދުއްރަހީމް އިތުރަށް ވިދާޅުވީ ރައީސް ޔާމީން އަނބުރާ ވެރިކަމަށް ގެނައުމަށް ރައްޔިތުން ތިބީ ކެތްމަދުވެފައި ކަމަށެވެ. އެމަނިކުފާނުގެ ނަންފުޅު ރިޔާސީ އިންތިޚާބުގެ ކަރުދާސްކޮޅުގައި އޮންނާނެ ކަމަށާއި، މާތްالله ގެ ވާގިފުޅާއެކު ރިޔާސީ އިންތިޚާބު ކާމިޔާބުކުރައްވާނީ ރައީސް ޔާމީން ކަމަށް އަބްދުއްރަހީމް ވަނީ ވިދާޅުވެފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
