ކޮމްޕޮސިޝަން ބަދަލުކުރަނީ: ޖޭއެސްސީގެ މެމްބަރުންގެ އަދަދު މަދުކުރަން ހުށައަޅައިފި

ޖުޑީޝަލް ސާރވިސް ކޮމިޝަން، ޖޭއެސްސީ އެކުލެވިގެންވާ ގޮތް ބަދަލުކޮށް، އެ ކޮމިޝަންގެ މެންބަރުންގެ ޢަދަދު 7 މެމްބަރުންނަށް މަދުކުރުމަށް ބަންޑާރަ ނާއިބުގެ އޮފީހުން ރައްޔިތުންގެ މަޖިލީހަށް ބިލު ހުށައަޅައިފި އެވެ.

ޝަރުއީ ދާއިރާއަށް އޮންނަ ސިޔާސީ ނުފޫޒު ނައްތާލުމަށް ޖުޑިޝަލް ސާވިސް ކޮމިޝަން އެތުރިފައިވާ ގޮތް ބަދަލުކުރުމަކީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ، އަދި މަޖިލިސް އިންތިޚާބާއި ދިމާކޮށް ސަރުކާރު ހިންގާ މައި ޕާޓީ އެމްޑީޕީން ވި ބޮޑު ވައުދެކެވެ.

އަދި އެއީ ޝަރުޢީ ދާއިރާ އިޞްލާޙުކުރުމަކީ އިޖުތިމާޢީ ޢަދުލުވެރިކަމުގެ ދާއިރާއިން އަދުގެ ސަރުކާރުން ވެފައިވާ އެންމެ މުހިންމު އެއް ވައުދުކަމަށް ބަންޑާރަނައިބު އިބްރާހިމް ރިއްފަތު ވެސް ވަނީ ވިދާޅުވެފަ އެވެ.

އެ މަސައްކަތް 2019 ވަނަ އަހަރު ފަށާފައިވާއިރު، މިހާތަނަށް 9 ބިލެއް ވަނީ މަޖިލީހަށް ހުށައަޅާފަ އެވެ. އަދި ބަންޑާރަނައިބު މިހާރު މަޖިލީހަށް ހުށައަޅާފައިވާ ދެ ބިލާއެކު ޖޭއެސްސީ އިސްލާހުކުރުމުގެ މަސައްކަތް މުޅިން ފުރިހަމަވެގެންދާނެކަމަށް ބަންޑާރަނައިބު ވިދާޅުވި އެވެ.

މިހާރު ޖޭއެސްސީ އެތުރިފައިވާ ގޮތަށް ބަލާއިރު ޖުމްލަ 10 ބޭފުޅުން އެ ކޮމިޝަނުގައި ތިއްބަވައެވެ. އޭގެ ތެރޭގައި ހިމެނިވަޑައިގަންނަވަނީ؛

- ރައްޔިތުން މަޖިލީހުގެ ރައީސް

- ރައްޔިތުން މަޖިލީހުގެ މެމްބަރެއް

- ރައީސުލްޖުމްހޫރިއްޔާގެ މެމްބަރެއް

- އެޓަނީ ޖެނެރަލް

- ސިވިލް ސަރވިސް ކޮމިޝަންގެ ރައީސް

- ސުޕްރީމްކޯޓުގެ ފަނޑިޔާރެއް

- ހައިކޯޓްގެ ފަނޑިޔާރެއް

- ދަށުކޯޓްތަކުން ފަނޑިޔާރެއް

- ޤާނޫނީ ވަކީލެއް

- އާއްމުގެ ތެރެއިން މީހެއް

ޖޭއެސްސީ އިޞްލާހު ކުރެއްވުމަށް ބިލު ރައްޔިތުންގެ މަޖިލީހަށް ހުށައެޅުއްވުމުގެ ކުރިން ބަންޑާރަ ނާއިބުގެ އޮފީހުން ވަނީ ޢާންމުންގެ ޚިޔާލުވެސް ހޯއްދަވާފައެވެ.

އެގޮތުން ގިނަ މީހުން ވަނީ ޖޭއެސްސީ އެކުލެވިގެންވާގޮތް ބަދަލުކުރުމަށް ފެންނަކަމަށް ބުނެފައެވެ.

އެ ކޮމިޝަން ބަދަލުކުރަން ފެންނަކަމަށް ޢާންމުން ބުނެފައިވާ ސަބަބުގެ ތެރޭގައި ޖޭއެސްސީގެ ބައެއް މެމްބަރުންނަކީ ސިޔާސީ މުއައްސަސާތަކުގެ އެންމެ އިސްވެރިންނަށް ވުމުގެ ސަބަބުން އެކޮމިޝަނުގެ މަސައްކަތްތަކަށް ސިޔާސީ ނުފޫޒު އޮތުމުގެ ފުރުސަތު ބޮޑުވުންކަމަށް ބުނެފައިވެއެވެ.