ރައީސް އެދިވަޑައިގަންނަވަނީ މަޖިލީސް ހިންގޭނެ ގޮތެއް ހޯދުން: މިއުވާން

މަޖިލީސްގެ މަސައްކަތްތައް ހުއްޓާނުލާ، މަޖިލީސް ހިންގޭނެ ގޮތެއް ހޯދުމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު އެދިވަޑައިގަންނަވާކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެ އެވެ.

ރައްޔިތުންގެ މަޖިލީހުގެ ނައިބުރައީސް އީވާ އަބްދުاللهގެ އިތުބާރު ނެތްކަމުގެ މައްސަލަ މަޖިލީހަށް ހުށައަޅާފައި އޮއްވާ، މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތްކަމުގެ މައްސަލަ ވެސް ހުށައެޅުމާއި ގުޅިގެން މަޖިލިސް ކުރިއަށް ގެންދިއުމަށް ވަނީ ހުރަސްއެޅިފަ އެވެ.

ރައީސް ނަޝީދާއި، ނައިބުރައީސް އީވާ އާއި ދެބޭފުޅުން ވަނީ އެދެބޭފުޅުންގެ އިތުބާރު ނެތްކަމުގެ މައްސަލަ ހުށައަޅާފައި އޮއްވާ މަޖިލީހުގެ ރިޔާސަތު ބެލެހެއްޓެވުމަށް އުޒުރުވެރިވާކަމަށް އަންގާފަ އެވެ. އަދި އެ ކަމާއި ގުޅިގެން މަޖިލީހުގައި ހޫނު ބަހުސެއް އުފެދި މަޖިލީސް ކުރިއަށް ނުގެންދެވި ނިމުނު ހަފްތާގައި ވެސް ޖެހުނީ މަޖިލީހުގެ ޖަލްސާތައް ހުއްޓާލާށެވެ.

މަޖިލީހުގެ މައިނޯރިޓީ މެމްބަރުން ވިދާޅުވަމުން ދަނީ މަޖިލީހުގައި "މަރުތަޅު" އެޅުވީ ރައީސުލްޖުމްހޫރިއްޔާ ކަމަށެވެ. އަދި މިހާރު މަޖިލީހަކީ އެމަނިކުފާނު ކޮންޓްރޯލުކުރައްވާ ތަނެއްކަމަށެވެ.

އެހެންކަމުން އެމަނިކުފާނު ބޭނުންފުޅުވާނަމަ މަޖިލީސް ނުހުއްޓުވާ ކުރިއަށް ގެންދެވޭނެކަމަށް އިދިކޮޅު މެމްބަރުން ދަނީ ވިދާޅުވަމުންނެވެ.

އެހެން ނަމަވެސް މަޖިލީސް ހުއްޓުވުމަކީ ރައީސް ޞާލިހު ބޭނުންފުޅުވާ ގޮތް ނޫންކަމަށް ރައީސް އޮފީހުގެ ތަރުޖަމާނު މިއުވަނު ވަނީ ވިދާޅުވެފައެވެ. އެގޮތުން މިއުވާނު ވިދާޅުވީ މަޖިލިހުގެ ޖަލްސާތައް ކުރިއަށް ނުގެންދެވި ދައުލަތުގެ އެއްބާރު ހުއްޓިފައި އޮތުމަކީ ރައީސް ޞާލިހު ވަރަށް ބޮޑަށް ކަންބޮޑުވެލައްވާ ކަމެއް ކަމަށެވެ.

އަދި މަޖިލީސް ނުހުއްޓި ހިންގޭނެ ގޮތެއް ހައްދަވާދެއްވުމަށް މިވަގުތު މަޖިލީހުގެ ރިޔާސަތު ބަލަހައްޓަވަމުން ގެންދަވާ ވިލިފުށީ ދާއިރާގެ މެމްބަރު ހަސަން އަފީފުގެ އަރިހުގައި ރައީސް ޞާލިހު އެދިލެއްވިކަމަށް މިއުވާން ވިދާޅުވި އެވެ.

މަޖިލީސް ހުއްޓިފައި އޮންނަ މައްސަލައާއި ގުޅޭގޮތުން އެމްޑީޕީގެ މެމްބަރުން ވިދާޅުވަމުން ދަނީ، މަޖިލީސް ހުއްޓުވާލީ ރައީސް ނަޝީދު ކަމަށެވެ. އަދި ނަޝީދު މަޖިލީސް ހުއްޓުވާފައި ބާއްވަނީ ނައިބު ރައީސް އީވާގެ އިތުބާރު ނެތްކަމުގެ މައްސަލަ ކުރިއަށް ގެންދިޔަ ނުދިނުމަށްކަމަށް އެމްޑީޕީގެ މެމްބަރުން ދަނީ ތުހުމަތު ކުރަމުން ނެވެ.