މީގެ ކުރިން އެމްޑީޕީން ނުކުތީ ވެރިކަންތައް ބަދަލުކުރަން؛ މިހާރު އެކަން ބަދަލު ކުރަންޖެހޭ: ރައީސް ޞާލިހު

ވެރިކަންތައް ބަދަލުކުރުމަކީ އެމްޑީޕީގެ ދާއިމީ ސިޔާތެއް ނޫންކަމަށާއި, އެކަން ބަދަލުކުރަން ޖެހޭ ކަމަށް ރައީސް އިބްރާހީމް މުހައްމަދު ޞާލިހު ވިދާޅުވެއްޖެއެވެ.

ރިޔާސީ ކެންޕެއިނަށް ހއ. އަށް ކުރައްވަމުންދާ ދަތުރުފުޅުގައި މިއަދު ހއ. މާރަންދޫ އަށް ވަޑައިގެން ވާހަކަފުޅުދައްކަވަމުން ރައީސް ވިދާޅުވީ މީގެ ކުރިން އެމްޑީޕީން އަބަދުވެސް ނުކުތީ ވެރިކަންތައް ބަދަލުކުރަން ކަމަށެވެ. އަދި މިހާރުވެސް ޕާޓީގެ ތެރެއިން ވެރިކަން ބަދަލުކުރަން އުޅޭ ކަމަށާ، އެއީ ޕާޓީގެ ތެރޭގައި ހަރުލާފައި ހުރި ކަމެއް ކަމަށް އެމަނިކުފާނު ވިދާޅުވިއެވެ.

ނަމަވެސް އެކަން ބަދަލުކުރަންޖެހޭ ކަން ފާހަގަކުރައްވައި ރައީސް ޞާލިހު ވިދާޅުވީ، ވެރިކަމުގައި ތިބެންވެސް އެމްޑީޕީން ދަސްކުރަން ޖެހޭކަމަށާ ރައްޔިތުންނަށް ޚިދުމަތް ކުރެވޭނީ އެކަން ކޮށްގެން ކަމަށެވެ.

އެ ވިސްނުން ވެރިކަން ބަދަލުކުރުމުގެ ވިސްނުން، އަޅުގަނޑުމެންގެ ތެރޭގައި ވަރަށް ބޭބޭފުޅުންގެ އެބަހުރި. ޕާޓީ ތެރޭގައި ވެރިކަމުގައި ތިބެވެސް ވެރިކަން ބަދަލުކުރުމުގެ ވިސްނުން އެބަހުރި. އެއީ ހަރުލާފައި ނުނެއްޓި ހުރި ކަންތައް. އެމްޑީޕީގެ ދާއިމީ ސިޔާސަތެއް ނޫން އެއީ ވެރިކަންތައް ބަދަލު ކުރުމަކީ. ވެރިކަމުގައި ތިބެންވެސް ދަސްކުރަންޖެހޭނެ. ރައްޔިތުންނަށް ހިދުމަތް ކުރެވޭނީ އެކަންކޮށްގެން.

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު

ރައީސް ޞާލިހު ވިދާޅުވީ މިފަހަރުގެ ރިޔާސީ އިންތިހާބަށް އެމްޑީޕީގެ ޓިކެޓްގައި ނުކުމެވަޑައިގެން ހުންނެވީ 2018 ވަނަ އަހަރު ރައްޔިތުން ހޮވި ސަރުކާރު ދަމަހައްޓަވަން ކަމަށެވެ. އަދި އެއަހަރު ރައްޔިތުން އިންތިހާބު ކުރި ކޯލިޝަން ސަރުކާރު ދަމަހައްޓަވާނެ ކަމުގެ ޔަގީންކަންވެސް ރައީސް ޞާލިހު ވަނީ ދެއްވާފައެވެ.