ޑޮލަރު އޭޓީއެމް ބެހެއްޓުން ހިމެނޭހޭން މުޢިއްޒުގެ މުހިންމު ވަޢުދުތަކެއް މާފުށްޓަށް!

މާލެއިން ބޭރު، އަތޮޅުތެރޭގެ އެންމެ ފުރަތަމަ ޑޮލަރު އޭޓީއެމް ބެހެއްޓުން ހިމެނޭހެން އިދިކޮޅު ރިޔާސީ ކެންޑިޑޭޓު ޑރ. މުހައްމަދު މުއިއްޒުގެ މުހިންމު ވަޢުދުތަކެއް މާފުށްޓަށް ވެވަޑައިގެންފިއެވެ.

ރޭ ކ. ގުރައިދޫގައި ބޭއްވި ކެންޕެއިން ބޮޑު ޖަލްސާގައި ވާހަކަ ދައްކަވަމުން މުޢިއްޒު ވިދާޅުވީ، ގެސްޓް ހައުސް ވިޔަފާރި ފުޅާދާއިރާއެއްގައި ކުރަމުން އަންނަ ކ އަތޮޅު މާފުށީގައި މި ސަރުކާރުން ހިންގަމުންދާ ބިން ހިއްކުމުގެ މަޝްރޫޢު ކުރިއަށް ގެންދަނީ އެ ރަށު ރައްޔިތުން އެދިފައިވާ ގޮތަށް ނޫން ކަމަށާ، އެކަމުގައި އެއްވެސް ގޮތަކަށް ރައްޔިތުންގެ މަޝްވަރާއެއް ވެސް ހޯދާފައި ނުވާކަމަށެވެ.

އެހެންކަމުން މުޢިއްޒުގެ ވެރިކަމެއްގައި ރައްޔިތުންގެ ހިޔާލު ހޯދައިގެން ރައްޔިތުން އެދޭ ގޮތަށް މާފުއްޓަށް ބިން އިތުރު ކޮށްދެއްވާނެ ކަމަށް މުޢިއްޒު ވިދާޅުވިއެވެ.

މުއިއްޒު ވިދާޅުވީ ތަރައްގީ އަންނަން ޖެހޭނީ ތަރުތީބު ވެގެން ކަމަށެވެ. އެގޮތުން ބިމެއް ހިއްކުމަށް ފަހު ދެން ކުރަން ޖެހޭ އެންމެ އާދައިގެ ކަންތަކުގެ ތެރޭގައި ފެނާއި ކަރަންޓު އަދި ނަރުދަމާ ހިމެނޭ ކަމަށާ އެއީ އަސާސީ ކަންކަން ކަމުގައި ދެކި އެރަށުގައިވެސް އެކަން ކޮށްދެއްވާނެ ކަމަށެވެ.

މީގެ އިތުރުން މުއިއްޒު ވިދާޅުވީ އަތޮޅު ތެރޭގެ ރަށްތަކަށް ދިއުމުން އެދެނީ ދިވެހި ރުފިޔާ އޭޓީއެމްގެ ހިދުމަތް ލިބޭނެ ގޮތް ހެދުން ކަމަށާ، ނަމަވެސް ޑޮލަރުގެ އެތައް މުއާމަލާތެއް ކޮންމެ ދުވަހަކު މާފުށީގައި ކުރާއިރު، އެކަމަށްޓަކައި އެ ރަށުގެ ގެސްޓް ހައުސް ވިޔަފާރިވެރިން ބޭނުން ވަނީ ޑޮލަރު އޭޓީއެމެއް ކަަމަށެވެ.

މިހާތަނަށް މާލެއިން ބޭރު އެއްވެސް ރަށެއްގައި ޑޮލަރު އޭޓީއެމްއެއް ބެހެއްޓުމުގެ މަޝްވަރާއެއް ވެސް ކުރެވިފައި ނެތެވެ. އެހެންކަމުން މާލެއިން ބޭރުގައި ބެހެއްޓޭ އެންމެ ފުރަތަމަ ޑޮލަރު އޭޓީއެމް ހުންނާނެ ރަށަކީ މާފުށިކަމަށް ހަދައިދޭނެކަމަށް މުއިއްޒު ވައުދުވެވަޑައިގަތެވެ.

ވަރަށް ގިނަ ބޭރު ފައިސާ، ޑޮލަރުގެ މުޢާމަލާތް މާފުށީގައި ހިންގާ. އެހެން ރަށްތަކުން އެދެނީ ދިވެހި ރުފިޔާގެ އޭޓީއެމް އެކަނި ބަހަށްޓަން. އެ ރަށްތަކުގައި ޑޮލަރު ވިޔަފާރި އެހާބޮޑަށް ނުހިނގާތީ. އެހެންނަމަވެސް، ޑޮލަރުގެ ވިޔަފާރި އެންމެ ބޮޑަށް އެއް ފަސްގަނޑެއްގައި ހިނގާ ތަނަކަށް މާފުށި ވާއިރު، ޑޮލަރުގެ ވިޔަފާރީގައި ގެސްޓްހައުސް ހިންގާ ފަރާތްތަކަށް އެންމެ ބޮޑަށް ބޭނުންވާނީ، އޭޓީއެމް އަކީ ޑޮލަރު ނެގޭ އޭޓީއެމް އަކަށް ވުން. މާލެއިން ބޭރުގައި އަޅުގަނޑަށް އެނގިފައިވާ ގޮތުގައި އަދި ނެތް ޑޮލަރު އޭޓީއެމް އެއް ބެހެއްޓިފައި. އެހެންކަމަށް ވާނަމަ، މާލެއިން ބޭރުގައި ބެހެއްޓޭ އެންމެ ފުރަތަަމަ ޑޮލަރު އޭޓީއެމް ބެހެއްޓޭ ރަށަކަށް މާފުށި އަޅުގަނޑުމެން ހަދައިދޭނަން.

ޑރ. މުއިއްޒު

މާފުށީގެ ބިން އިތުރު ކުރުމުގެ އިތުރުން ގުރައިދޫ އާއި ގުޅީގެ ބިން ހިއްކުމުގެ މަޝްރޫޢު ވެސް ރައްޔިތުން އެދޭ ގޮތަށް ކުރިއަށް ގެންދަވާނެ ކަމަށް މުޢިއްޒު ވިދާޅުވިއެވެ.

އަދި ގުރައިދޫގެ ބަނދަރު ތަރައްޤީ ކުރުމާއި، ސުކޫލި އެއްދަންފަޅިއަށް ބަދަލުކޮށް ޒަމާނީ ސުކޫލަކަށްވެސް ހަދައިދެއްވާނެ ކަމަށް މުޢިއްޒު ވިދާޅުވިއެވެ.