އަނިޔާވެރިވެ، އެހެން ޕާޓީތަކުގެ ކެންޕެއިނަށް ހުރަސް އަޅަން އެމްޑީޕީން ވާގިވެރިއެއް ނުވާނެ: މާރިޔާ

އަނިޔާވެރިވެ، އެހެން ޕާޓީތަކުގެ ކެންޕެއިނަށް ހުރަސް އަޅަން އެމްޑީޕީގެ ލީޑާޝިޕުން ވާގިވެރިއެއް ނުވާނެ ކަމަށް އެ ޕާޓީގެ ރިޔާސީ ކެންޑިޑޭޓް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ ކެންޕެއިން ތަރުޖަމާނު، ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެއެވެ.

އިއްޔެ އިދިކޮޅު ކޯލިޝަންގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ކ. ގުރައިދޫއަށް ވަޑައިގަންނަވަން ހަމަޖެހިފައި ވަނިކޮށް އެމްޑީޕީ ސަޕޯޓަރުން ނުކުމެ ޕީޕީއެމް ސަޕޯޓަރުންނަށް ހަމަލާދީ މާރާމާރީ ހިންގާފައިވެއެވެ.

ދެޕާޓީގެ ސަޕޯޓަރުންގެ މެދުގައި ހަމަނުޖެހުން ހިނގައި ގަޔަށް ބޮލަށް އަރާ ހިސާބަށް ދިޔައިރުވެސް، އެރަށުގައި ހަރަކާތްތެރިވަމުން ގޮސްފައި ވަނީ ވަރަށް މަދު ފުލުހުން ކަން ފާހަގަކޮށްލަންޖެހެއެވެ.

އެ ކަމާއި ގުޅިގެން ވާހަކަ ދައްކަވަމުން ދަ ޑިމޮކްރެޓްސް އިން މިއަދު ބޭއްވި ނޫސްވެރިންގެ ބައްދަލުވުމުގައި އެ ޕާޓީގެ ރިޔާސީ ކެންޑިޑޭޓްގެ ތަރުޖަމާނު، އިމްތިޔާޒު ފަހުމީ ވަނީ މި ސަރުކާރުން އެހެން ޕާޓީތަކުގެ ކެންޕެއިނަށް ހުރަސް އަޅަމުންދާ ކަމަށާ، ހުރިހާ ޕާޓީތަކަށް ވެސް ކެންޕެއިން ކުރުމަށް ހަމަހަމަ ފުރުސަތު ދޭންޖެހޭ ކަމަށް ވިދާޅުވެފައެވެ.

އެކަން ފާހަގަކޮށް، މިއަދު ރައީސް ޞާލިހުގެ ތަރުޖަމާނުގެ ފަރާތުން ބޭއްްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަށް ޖަވާބު ދެއްވަމުން މާރިޔާ ވިދާޅުވީ, ސަރުކާރުން މަސައްކަތް ކުރަމުން ދަނީ އެންމެނަށްވެސް ކެންޕެއިން ކުރުމަށް ހަމަހަމަ ފުރުސަތެއް ފަހި ކޮށްދެއްވުމަށް ކަމަށެވެ.

އަޅުގަނޑުމެންގެ ކެންޕެއިން ޓީމުތަކުން، އަނިޔާވެރި ހުރަސް އެޅުމަކަށް އަޅުގަނޑުމެންގެ ލީޑާޝިޕުން ވާގިވެރިއެއް ނުވާނެ. އަބަދުވެސް އަޅުގަނޑުމެން ބޭނުންވަނީ ހުރިހާ ބޭފުޅުންނަށްވެސް ކެންޕެއިން ކުރުމަށް ޖާގަ ދިނުމަށް. މިހާރުވެސް އެގޮތަށް ބޭނުން ވެގެން އެގޮތަށް މަގުފަހި ކޮށްދިނުމަށް ކޮށްދެވެން ހުރި ހުރިހާ ކަމެއް ކުރަން.

މާރިޔާ އަހުމަދު ދީދީ