މާފަރުގެ އިހްތިޞާސުން ވަކިކުރި ބައި ހޯދައިދިނުމަށް މުއިއްޒު ވައުދުވެއްޖެ
މި ސަރުކާރުން ނ. މާފަރުގެ އިހްތިސާސުން ވަކިކުރި ދެ ފަޅުރަށާ އެކު، ފަޅުގެ ބޮޑުބައި ޕީޕީއެމް ޕީއެންސީގެ ވެރިކަމެއްގައި މާފަރުގެ ބަޔަކަށް ހަދައިދެއްވާނެކަމަށް އެ ކޯލިޝަންގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
ރިޔާސީ އިންތިޚާބުގެ ދެވަނަ ބުރުގެ ކެމްޕެއިންގައި އަތޮޅުތަކަށް ކުރައްވަމުން ގެންދަވާ ކެމްޕެއިން ދަތުރުގައި ނ މާފަރަށް ވަޑައިގެން އެ ރަށުގެ ސަޕޯޓަރުންނާއި ބައްދަލުކުރައްވާ ވާހަކަ ދައްކަވަމުން ޑރ.މުއިއްޒު ވިދާޅުވީ މި ސަރުކާރުން މި ރަށުގެ އިހްތިސާސުން ވަކިކޮށްފައިވާ ބަޔަކީ މި ރަށަށް ލިބެން ޖެހޭނެ ބައެއްކަމަށް އޭނާ ގަބޫލުކުރައްވާ ކަމަށެވެ. އަދި އެ ކަން އޭނާގެ ވެރިކަމެއްގެ ކުރީކޮޅުގައި ނިންމަވައި ދެއްވާނެ ކަމަށް ވިދާޅުވެ ޕިޕީއެމް ޕީއެންސީގެ ވެރިކަމެއްގައި މާފަރަށް ގެނެސްދޭން ބޭނުންވާ ތަރައްގީގެ މަޝްރޫއުތައް މުއިއްޒުވަނީ އިއުލާން ކުރައްވާފައެވެ.
މި ރަށު ފަޅުތެރެއިން އިހްތިސާސުން މި ސަރުކާރުން ވަކިކޮށްފައިވާ ބައި އަނބުރާ ހޯދައިދޭނަން. މި ކަން އަޅުގަނޑު އިންތިޚާބުވާ ފުރަތަމަ ތިން މަސް ދުވަސް ތެރޭ ނިންމައިދޭނަން
ޑރ މުއިއްޒު
މީގެ އިތުރުން މާފަރުގެ ތަރައްގީގެ މަޝްރޫއުތަކަށް އަލި އަޅުވާކައި މުއިއްޒު ވިދާޅުވީ މާފަރުގެ މަގުތައް ހެދުމަކީ ވަރަށް މުހިންމު މަޝްރޫއެއް ކަމަށްވުމުން އޭނާގެ ވެރިކަމެއްގައި ޚާއްސަ އަހަމިއްޔަތުކަމެއް ދެއްވައިގެން އެ މަޝްރޫއު ކުރިޔަށް ގެންދަވާނެ ކަމަށެވެ.
އަދި އޭގެ އިތުރުން މާފަރުގެ ފުޓްބޯޅަ ދަނޑު ހެދިފައިވީ ނަމަވެސް އެ ދަނޑުގައި ޗޭންޖިންގް ރޫމް އެއް ނެތް ކަމަށާއި އެ ތަނުގައި ޗޭންޖިންގް ރޫމެއް ގާއިމްކޮށްދެއްވާނެ ކަމަށް މުއިއްޒު ވައުދުވެވަޑައިގެންފައިވެއެވެ.
ވެރިކަންކުރާ މައި ޕާޓީ އެމްޑީޕީގެ ސަރުކާރުން ސިއްހީ ނިޒާމަށް ފަރުވާ ކުޑަކޮށްފައިވާ މިންވަރު ފާހަގަކޮށް މުއިއްޒު ވިދާޅުވީ މާފަރުގައި ސިއްހީ ނިޒާމު ހަރުދަނާކޮށް ކުރިއަރުވާނެ ކަމަށެވެ.
މީގެ އިތުރުން، މާފަރުގެ ރައްޔިތުންނަށް ބޯހިޔާވަހިކަމުގެ ޔަގީންކަން ވެސް އޭނާ ދެއްވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
