މިނިސްޓަރު މަހުލޫފަށްވެސް ހިސާބު އޮޅިއްޖެ!

ރިޔާސީ އިންތިހާބުގެ ކެމްޕެއިން ފޯރީގައި ވާހަކަ ދައްކަވަމުން ޔޫތު މިނިސްޓަރު އަހުމަދު މަހްލޫފަށް ވެސް އިންތިހާބުގެ ނަތީޖާ އޮޅި، ހިސާބު ޖައްސަވާނެ ގޮތްވެސް އޮޅިވަޑައިގެންފިއެވެ.

އެމްޑީޕީގެ ރިޔާސީ ކެންޑިޑޭޓް، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ކެންޕެއިނަށް ރޭ ގަލޮޅުގައި ބޭއްވި ބައްދަލުވުމުގައި މިނިސްޓަރު މަހްލޫފް ވެސް ވަނީ ވަރަށް ފޯރީގައި ވާހަކަ ދައްކަވަމުން ވިދާޅުވީ، އިންތިހާބުގެ ފުރަތަމަ ބުރުގައި ނުކުތީ އެމްޑީޕީން އުންމީދު ކުރި ނަތީޖާއެއް ނޫން ކަމަށެވެ.

"އަޅުގަނޑަށް ހީވަނީ ހަމަ ހަގީގަތަށްވެސް އަޅުގަނޑުމެން ތަންކޮޅެއް ފޮނިވީހެން" މަހްލޫފް ވިދާޅުވި އެވެ.

އެހެން ނަމަވެސް، މިހާރު ކަންކަން ރެއަކާލައިފި ކަމަށާ، މިހާރު ގަލޮޅުގެ ރައްޔިތުން ނުކުމެ ތިބީ "ރާސްޓަސް ލާފައި" ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ދެވަނަ ދައުރަކަށް އިންތިހާބު ކުރައްވަން ކަމަށް މަހްލޫފު ވިދާޅުވި އެވެ.

މިއާއެކު މަހްލޫފް ވިދާޅުވީ، އެމްޑީޕީ އަދި ބަލި ނުވާކަމަށާ، އަދި ތާރީޚަށް ބެލި ނަމަވެސް އިންތިހާބު ކާމިޔާބު ކުރުމުގެ ފުރުސަތު އެންމެ ބޮޑީ އެމަނިކުފާނަށް ކަމަށެވެ. އެގޮތުން 2008 ވަނަ އަހަރުގެ ފުރަތަމަ ބުރުގައި ކުރީގެ ރައީސް މަޢުމޫން އަބްދުލްޤައްޔޫމް %45 ހޯއްދެވިއިރު ދެވަނަ ބުރު ކާމިޔާބުކުރެއްވީ ފުރަތަމަ ބުރުގައި %25 ހޯއްދެވި ކުރީގެ ރައީސް މުހައްމަދު ނަޝީދު ކަމަށް މަހްލޫފު ވިދާޅުވި އެވެ.

އަދި 2013 ވަނަ އަހަރުގެ އިންތިޚާބުގެ ފުރަތަމަ ބުރުގައި ރައީސް ނަޝީދު %47 ހޯއްދަވާފައިވަނިކޮށް ފަހަތުން އަރާ ދެވަނަ ބުރު ކާމިޔާބުކުރެއްވީ ފުރަތަމަ ބުރުގައި %25 ހޯއްދެވި ކުރީގެ ރައީސް ޔާމީން އަބްދުލްގައްޔޫމް ކަމަށް ވެސް މަހްލޫފް ވިދާޅުވި އެވެ.

މިއާއެކު މި އަހަރުގެ ރިޔާސީ އިންތިހާބުގައި ޑރ. މުހައްމަދު މުޢިއްޒަށް ލިބިލެއްވީ %43 ވޯޓު ކަމަށާ، ނަމަވެސް ރައީސް ޞާލިހަށް %40 ލިބިލެއްވި ކަމަށް މަހްލޫފު ވިދާޅުވި އެވެ.

އަޅުގަނޑުމެންނަށް މި ފެނުނީ، ޑރ. މުޢިއްޒަށް %43 ކަންނޭގެ ލިބިވަޑައިގެންނެވި ތަން. އަޅުގަނޑުމެންގެ ކެންޑިޑޭޓް ރައީސް ޞާލިހް މިއޮތީ %40 އާއެކީ. އިރާދަކުރެއްވިޔާ އަޅުގަނޑުމެން 30 ވަނަ ދުވަހު ފަސޭހަކާއެކީ ކާމިޔާބު ކުރާނަން.

މިނިސްޓަރު އަހުމަދު މަހުލޫފް

މަހްލޫފް މިފަދައިން ވިދާޅުވެފައި ވާއިރު، އިލެކްޝަންސް ކޮމިޝަންގެ ރަސްމީ ނަތީޖާ ދައްކާގޮތުން، ރިޔާސީ އިންތިހާބުގެ ފުރަތަމަ ބުރުގައި ޑރ. މުޢިއްޒަށް ލިބިލެއްވީ %46.06 އެވެ. އަދި ރައީސް ޞާލިހަށް ލިބިލެއްވީ %39.05 އެވެ. ވީއިރު، އެ 46 އިންސައްތަ 43 އިންސައްތައަށް ހެދޭނެ އެއްވެސް ގޮތެއް ނެތް އިރު، 39.05 "ރައުންޑް އޮފް" ކޮށްގެންވެސް އޭތި 40 އިންސައްތައަށް ހެދޭނެ ގޮތެއް ނޯންނާނެއެވެ.

ވުމާއެކު، މިފަހަރު ހިސާބު ޖަހަން ނޭނގިފައި، ނުވަތަ އޮޅުން އަރާފައި މިވަނީ މިނިސްޓަރު މަހްލޫފް އަށްކަން ފާހަގަކޮށްލަންޖެހެއެވެ.