އެއްވެސް ކުންފުންޏެއް އުވައެއް ނުލާނެ، ވަޒީފާތަކުން މީހުންނެއް ނުކަނޑާނެ: ތަރުޖަމާނު
ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒު ވެރިކަމަށް ވަޑައިގެންފި ނަމަ ބައެއް ކުންފުނިތައް އުވާލައްވާނެކަމަށް ފަތުރަމުންދަނީ ދޮގު ވާހަކަތަކެއް ކަމަށް އެމަނިކުފާނުގެ ތަރުޖަމާނު މުހައްމަދު ޠަލާލު ދެއްވައިފި އެވެ.
ޑރ މުއިއްޒުގެ ކެމްޕޭނުގެ އެންމެ ފަހުގެ މައުލޫމާތުތައް ހިއްސާކުރުމަށް މިއަދު ޠަލާލު ބޭއްވި ޕްރެސް ކޮންފަރެންސްގައި ވާހަކަދައްކަވަމުން ވިދާޅުވީ ޕްރޮގްރެސިވް ކޮންގްރެސް ކޯލިޝަންގެ ސިޔާސަތުތަކާއި ގުޅޭގޮތުން ޑރ މުއިއްޒު ދައްކަވާ ވާހަކަތައް ބައެއް ފަރާތްތަކުން ވަރަށް ބޮޑަށް އޮޅުވާލައިގެން ދައްކަމުންދާކަން ފާހަގަކުރެވިފައިވާ ކަމަށެވެ.
އަދި އެމަނިކުފާނު ވިދާޅުވިކަމަށް ހަގީގަތާއި ޚިލާފު ވާހަކަތައްވެސް ފަތުރަމުންދާކަން ފާހަގަކުރެވިފައިވާ ކަމަށެވެ. އެގޮތުން ޑރ މުއިއްޒު ވެރިކަމަށް ވަޑައިގެންފި ނަމަ ބައެއް ކުންފުނިތައް އުވާލައްވާނެ ކަމަށާއި، އެ ކުންފުނިތަކުގެ މީހުންގެ ވަޒީފާތައްވެސް ގެއްލިގެންދާނެކަމަށް ބައެއް ފަރާތްތަކުން ވާހަކަތައް ފަތުރަމުންދާ ކަމަށެވެ.
އެހެން ނަމަވެސް އެއީ ހަގީގަތާއި ޚިލާފު ވާހަކަތަކެއް ކަމަށާއި، ޑރ މުއިއްޒު ވެރިކަމަށް ވަޑައިގެން އެއްވެސް ކުންފުންޏެއް އުވާލާ، އަދި އެއްވެސް މުވައްޒަފަކު ވަޒީފާއިން ވަކި ނުކުރައްވާނެ ކަމަށް ޠަލާލު ވިދާޅުވި އެވެ.
"އެއްވެސް ކުންފުންޏެއް ޑރ މުއިއްޒު އުވައެއް ނުލައްވާނެ. އެއްވެސް މުވައްޒަފަކަށް ދެރަވާގޮތަށް އެމަނިކުފާނު އެއްވެސް ކަމެއް ނުކުރައްވާނެ"
ޑރ މުއިއްޒުގެ ތަރުޖަމާނު ޠަލާލު
ޠަލާލު ވިދާޅުވީ ޑރ މުއިއްޒު އެ ވަޑައިގަންނަވަނީ އަދުލުވެރި ވެރިކަމެއް ކުރެއްވުމަށް ކަމަށެވެ. އެމަނިކުފާނު ޚިދުމަތްކުރައްވާނީ ތަފާތުކުރުމެއް ނެތި ހުރިހާ ރައްޔިތުންނަށް ހަމަހަމަ ކަމާއި އެކުގައި ކަމަށާއި، ރައްޔިތުންނަށް ދެރަ ނިކަމެތިކަމެއް ލިބޭގޮތަށް އެއްވެސް ކަމެއް ނުކުރައްވާނެކަމަށް ޠަލާލު ވިދާޅުވި އެވެ.
ޠަލާލު ވިދާޅުވީ ވަޒީފާގެ ބިރުދެއްކުމަށް ސަރުކާރުން ކުރަމުންދާ މަސައްކަތްތައް ހުއްޓާލަން ޖެހޭކަމަށެވެ. އަދި ވަޒީފާގެ ބިރުދެއްކުމަށް ސަރުކާރުން ދައްކަމުންދާ ވާހަކަތަކާއި ދޭތެރޭ ރައްޔިތުން ހޭލުންތެރިވާން ޖެހޭކަމަށެވެ.
އެއްވެސް ކުންފުންޏެއްގައި މަސައްކަތް ކުރާ ފަރާތެއް ވަޒީފާއިން ވަކި ނުކުރައްވާނެ ކަމަށާއި، އަދި އެމީހުންގެ މުސާރަވެސް ކުޑަ ނުކުރައްވާނެކަމަށް ޑރ މުއިއްޒު ވިދާޅުވަނީ، މީހުން ވަޒީފާއިން ވަކިނުކޮށް ކުންފުނިތައް ހަމަމަގަށް އަޅުވަންވީ ގޮތް އެނގިވަޑައިގަންނަވާތީ ކަމަށް ޠަލާލު ވަނީ ވިދާޅުވެފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
