ކެލާ އަންހެނުން ތަކެތީގެ އަގު އަތްފޯރާފަށަށް ތިރިކުރީ ވާ ޖަހައިގެން!

ކާބޯތަކެތީގެ އަގުތައް އިންތިހާއަށް އުފުލެމުންދާތީ، ކެލާގެ ގެއެއްގައި ދެ އަންހެނުން ތަފާތު ގޮތަކަށް އިހުތިޖާޖުކޮށްފިއެވެ.

އެ ދެ އަންހެނުން އިހުތިޖާޖު ކުރާ މަންޒަރު ފެނިގެންދާ ވީޑިއޯއެއް މިހާރު ވަނީ ސޯޝަލް މީޑިއާގައި އާންމުވެފައެވެ.

އެ ވީޑިއޯގައި ފެނިގެންދަނީ އެ ގޭގައި އާންމުކޮށް ބޭނުންކުރާ ބައެއް ކާބޯތަކެތީގެ ބާވަތްތަކުގައި ވާޖަހާ ފިލާގަނޑެއްގައި އައްސާފައިވާތަނެވެ. އަދި އެ ފިލާގަނޑުގައި "އަތްފޯރާފަށުގައި"، މިފަދައިން ލިޔެފައިވެއެވެ.

ފިލާގަނޑުގައި އައްސާފައި ހުރި ބައެއް ބާވަތްތަކުގެ ތެރޭގައި އާންމުކޮށް ބޭނުންކުރާ މަސްދަޅާއި، ކިރާއި މައިލޯ ދަޅު އަދި ކައްކަން ބޭނުންކުރާ ތެޔޮ ފުޅި ހިމެނެއެވެ. ކާބޯތަކެތީގެ އަގުތައް އުފުލެމުންދާއިރު، މި ތަކެއްޗަކީ އަގަށް އެންމެ ބޮޑެތި ބަދަލުތައް އައި ބާވަތްތައްކަން ފާހަގަކޮށްލެވެއެވެ.

ކާބޯތަކެތީގެ އަގު އުފުލެމުންދާތީ ކަންބޮޑުވުން ފާޅުކުރި އަންހެނުން ބުނީ، ތަކެތީގެ އަގު އުފުލެމުންދާތީ ގެއަށް ބޭނުންވާ ސާމާނު ގަތުމަށް ދަތިތަކާއި ކުރިމަތިވެފައިވާކަމަށެވެ. އަދި ތަކެތީގެ އަގުތައް ކޮންޓްރޯލެއް ނެތި އުފުލެމުން ދާ ދިއުމުގެ ޒިންމާ ސަރުކާރުން ނަގަން ޖެހޭކަމަށެވެ.

"ކާބޯތަކެތީގެ އަގު ބޮޑުކަމުން މި އުޅެނީ އެއްޗެއް ނުގަނެވިގެން. ރައްޔިތުން ހަނާވަނީ. އެންމެން ނިކުމެ މި ނާގާބިލް ސަރުކާރު ބަދަލުކުރަން ވެއްޖެ"

ކާބޯތަކެތީގެ އަގު އުފުލެމުންދާތީ ކަންބޮޑުވުން ފާޅުކުރި އަންހެން މީހާ

މިދިޔަ އޭޕްރީލް މަހުގެ ނިޔަލަށް ރާއްޖޭގެ ކާބޯތަކެތީގެ އަގުތައްވަނީ 3.7 އިންސައްތައަށް މަތިވެފައެވެ. އަނެއްކޮޅުން އަންނަ އަހަރުގެ ޖެނުއަރީމަހުން ފެށިގެން ރައްޔިތުން އަތުން ނަގާ ޓެކްސް ބޮޑުކުރުމަށް ސަރުކާރުން ވަނީ މަޖިލީހަށް ބިލެއް ހުށައަޅާފައެވެ. އެ ބިލު ފާސްވެއްޖެ ނަމަ މިހާރު ރައްޔިތުން އަތުން ނަގާ ޓެކްސް 6 އިންސައިން 8 އިންސައްތައަށް ބޮޑުވާނެއެވެ.

ރައްޔިތުން އަތުން ނަގާ ޓެކްސް ބޮޑުކުރުމާއެކު، ކާބޯތަކެތީގެ އަގުތައް މިހާރަށްވުރެ 2 އިންސައްތަ ބޮޑުވެގެންދާނެކަން ފާހަގަކޮށްލެވެއެވެ.