އިންތިޚާބު ކާމިޔާބު ކުރުމަށް ދެއްކި އެކުވެރިކަން, ސަރުކާރު ދެމެހެއްޓުމަށް ދައްކައިދެއްވާ: އިންތިޚާބީ ރައީސް
މިއަހަރުގެ ރިޔާސީ އިންތިޚާބު، ޕީޕީއެމް/ޕީއެންސީ ކޯލިޝަންގެ ކާމިޔާބު ކުރުމަށް ކެމްޕެއިން ޓީމްތަކާއި ސަޕޯޓަރުން އެކުވެރިކަމާއިއެކު މަސައްކަތް ކުރި ފަދައިން، ސަރުކާރު ދެމެހެއްޓުމަށް ވެސް މަސައްކަތް ކޮށްދެއްވުމަށް އިންތިޚާބީ ރައީސް ޑރ. މުހައްމަދު މުއިއްޒު އެދިވަޑައިގެންފިއެވެ.
ރޭ ސޯޝަލް ސެންޓަރުގައި ޑރ. މުޢިއްޒުގެ ކެމްޕެއިން ޓީމްތަކާއެކު ބޭއްވި ބައްދަލުވުމުގައި ވާހަކަ ދައްކަވަމުން އެންމެ ފުރަތަމަ ކަމަކަށް، އެމަނިކުފާނު ވަނީ އިންތިޚާބުގެ ކެންޕެއިން ތެރެއިން ކެންޕެއިން ޓީމުތަކުންނާއި، ސަޕޯޓަރުން ކުރި ބުރަ މަސައްކަތަށް ވަރަށް ޚާއްސަ ޝުކުރެއް ދަންނަވައިފައެވެ. އަދި އެ ޓީމުތަކުން ކުރި މަސައްކަތުގެ ސަބަބުން ދިވެހިރާއްޖޭގެ މުސްތަގުބަލު އުޖާލާ ކުރުމަށް ފުރުސަތެއް ލިބިގެން ގޮސްފައިވާ ކަމަށްވެސް ވިދާޅުވި އެވެ.
ކޮންމެ ކަމެއްވެސް ހާސިލް ކުރުމަށްވުރެ، އެ ހާސިލް ކުރެވުނު ކަންތައް ދެމެހެއްޓުމަށް އުނދަގޫ ވާނެކަން ފާހަގަކުރައްވައި މުޢިއްޒު ވަނީ، އަންނަން އޮތް ސަރުކާރު ދެމެހެއްޓުމަށްވެސް އެންމެން ގުޅިގެން އެކުވެރިކަމާއި އެކު މަސައްކަތް ކުރެއްވުމަށް އެދިލައްވާފައެވެ.
"އާދެ ކަމެއް ހާސިލް ކުރުން، ކަމެއް ހާސިލް ކުރުމަށްފަހު އެކަން ދެމެހެއްޓުމަށްވުރެ ފަސޭހަ ވާނެ. ދެންމިއޮތީ ދެމެހެއްޓުން. ގައުމީ މަސައްކަތެއް. ވަރަށް ވަރުގަދަ މަސައްކަތެއް ކުރަން މިޖެހެނީ. އަޅުގަނޑު އެދެނީ އަޅުގަނޑުމެން އެންމެންނަކީ މި ކެމްޕެއިން ކާމިޔާބު ކުރުމަށް މިދެއްކި އެކުވެރިކަން އެގޮތުގައި ދައްކަން. އަޅުގަނޑުމެންގެ ގައުމު ސަލާމަތް ކުރުމުގައި ހަމަ އެ އެކުވެރިކަންމަތީގައި އަދި އެއަށްވުރެވެސް ނުގުޑާ އަޒުމެއްގައި ގައުމާއިގެން ކުރިއަށް ދިޔުމުގައި އަތުކުރި އޮޅާލައިގެން ތިބޭ ބަޔަކަށް ވެގެންދާން"
އިންތިޚާބީ ރައީސް ޑރ މުހައްމަދު މުއިއްޒު
މިއާއެކު މުޢިއްޒު ވަނީ ކުރިއަށް އޮތީ ވަރަށް ހައްސާސް ދުވަސްތަކެއްކަން ފާހަގަކުރައްވައި، އެމަނިކުފާނުގެ ސަރުކާރުން ފަށްޓަވާ ގައުމީ މަސައްކަތުގައި އެންމެން އެކަތިގަނޑަކަށްވެ މަސައްކަތް ކުރުމަށް އެދިވަޑައިގެންފައެވެ.
“ކުރިއަށް މި އޮތީ ވަރަށް މުހިންމު ހައްސާސް ދުވަސްތަކެއް. އަޅުގަނޑުމެންގެ ގައުމު ހަމަމަގަށް އެޅުވުމުގަ މި ފެށޭ މަސައްކަތުގަ އަޅުގަނޑުމެން އެންމެން އެކަތިގަނޑެއްގެ ގޮތުގަ އެކުވެރިކަމާއި އެކު ކުރިއަށްދާން ޖެހޭ.” ޑރ. މުއިއްޒު ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
