ހިޔާގެ ކޮންމެ ޓަވަރެއްގައި ދެ ލިފްޓު ހަރުކޮށްދޭނަން: އިންތިޚާބީ ރައީސް
އަންނަ އަހަރަށް ލަފާކޮށް، މަޖިލީހަށް ހުށަހަޅާ ބަޖެޓުގައި، ހުޅުމާލެ ދެވަނަ ފިޔަވަހީގައި އިމާރާތްކޮށްފައިވާ ކޮންމެ ހިޔާ ޓަވަރެއްގައި ދެ ލިފްޓް ހަރު ކުރުމަށް ހިމަނާފައިވާނެ ކަމަށް އިންތިހާބީ ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
ރިޔާސީ އިންތިޚާބުގައި ލިބިލެއްވި ކާމިޔާބީއަށްފަހު ފުރަތަމަ ފަހަރަށް، ޑރ. މުޢިއްޒު ވަނީ މިއަދު ހަވީރުގެ ވަގުތެއްގައި ހިޔާ ސަރަހައްދުގެ ރައްޔިތުންނާއި ބައްދަލު ކުރައްވަން އެ ސަރަހައްދަށް ވަޑައިގެންފައެވެ. އޭރު ވެހެމުން ދިޔަ ވާރޭގައިވެސް ގިނަ އަދަދެއްގެ ބަޔަކު ވަނީ އެމަނިކުފާނަށް މަރުހަބާ ދަންނަވަން އެ ސަރަހައްދަށް ޖަމާވެފައެވެ.
އެގޮތުން އެއްވެ ތިބި މީހުންނާ ބައްދަލު ކުރައްވައި ވާހަކަ ދައްކަވަމުން މުއިއްޒު ވަނީ ރިޔާސީ އިންތިހާބުގެ ދެވަނަ ބުރުގައި ހިޔާ ފްލެޓުތަކުގައި ދިރިއުޅޭ ރައްޔިތުން ދެއްވި ތާއީދަށް ފަށް ފަށުން ޝުކުރު ދަންނަވާ ކަމަށެވެ.
އަދި ކެންޕެއިންގެ ތެރެއިން އެމަނިކުފާނު ހިޔާ ސަރަހައްދުގެ ރައްޔިތުންނަށް ވެވަޑައިގެންނެވި ވަޢުދުތަކާއި އެއްގޮތަށް ހިޔާ ސަރަހައްދުގައި ކަންކަން އިންތިޒާމުކޮށްދެއްވާނެކަމުގެ ޔަގީންކަން މުޢިއްޒު ވަނީ ދެއްވާކަަށެވެ. އެގޮތުން 2024 ވަނަ އަހަރުގެ ބަޖެޓު ހެދުމުގެ މަރުހަލާގައި ތެރެއިން ހިޔާ ޓަވަރުތަކުގައި ލިފްޓު އިތުރުކުރުމަށް ހިމަނާފައިވާނެކަމަށާ، ކޮންމެ ޓަވަރަކަށް ދެ ލިފްޓު އިތުރުވާނެކަމަށް އެމަނިކުފާނު ވިދާޅުވި އެވެ.
އަދި އެތަނުން އެއް ލިފްޓަކީ ސްޓްރެޗާރ އެރުވޭނެވަރުގެ ބޮޑު ލިފްޓެއްކަމަށްވާއިރު، އަނެއް ލިފްޓަކީ ގާތްގަނޑަކަށް 14 މީހުންގެ ކެޕޭސިޓީގެ ލިފްޓެއް ކަމަށް މުޢިއްޒު ފާހަގަކުރެއްވި އެވެ.
ކޮންމެ ޓަވަރަކަށް ދެ ލިފްޓް އަންނާނެ. އެއް ލިފްޓަކީ ސްޓރޭޗާ އެރުވޭ ވަރުގެ ބޮޑު ލިފްޓެއް. އަނެއް ލިފްޓަކީ ގާތްގަނޑަކަށް 14 މީހުންގެ ކެޕޭސިޓީގެ ލިފްޓެއް. އެހެންވީމަ، ކޮންމެ ޓަވަރަކަށް އިރާދަކުރެއްވިއްޔާ ދެ ލިފްޓު އަންނާނެ. ޔަގީންކަން ދެނީ އަޅުގަނޑުމެން ވީ ވައުދާ އެއްގޮތަށް ހުރިހާ ކަމެއް ތަންފީޒުކޮށްދޭނަމޭ."
އިންތިޚާބީ ރައީސް ޑރ މުހައްމަދު މުއިއްޒު
މިއާއެކު މުޢިއްޒު ވަނީ ބޯކޮށް ވާރޭވެހެމުންދާތީ ވާހަކަފުޅު ކުރިކޮށްލައްވާފައެވެ.
އެއަށްފަހު އެމަނިކުފާނުވަނީ ބޯ ވާރޭ ތެރޭގައިވެސް އެމަނިކުފާނާއި ބައްދަލުކުރައްވަން އެއްވެ ތިބި މީހުންނާ ސަލާމް ކުރައްވައި ފޮޓޯ ނަންގަވާފައިވެއެވެ. މި ބައްދަލުވުމުގައި އިންތިހާބީ ނައިބު ރައީސް ހުސެއިން މުހައްމަދު ލަތީފް ވެސް ބައިވެރިވެވަޑައިގެންނެވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
