މެންބަރުންނަށް ބޮޑެތި އިނާޔަތްދޭތީ ކަންބޮޑުވުންފާޅުކުރުން ނާޒިމް ސިފަކުރީ ނަފްރަތުއުފެއްދުމަށް
އާއްމުންނަށް ނުލިބޭ ބޮޑެތި އިނާޔަތްތައް މެންބަރުންނަށް ލިބޭތީ ކަންބޮޑުވުންފާޅުކޮށް ޕެޓިޝަން ހުށަހެޅުމުން އެއީ ނަފްރަތުއުފެއްދުން ކަމުގަައި ދިއްގަރު ދާއިރާގެ މެމްބަރު އަހުމަދު ނާޒިމް މިއަދު ވިދާޅުވެއްޖެއެވެ.
އާންމު ރައްޔިތުންނަށް ނުލިބޭ ނަމަވެސް މަޖިލީހުގެ މެމްބަރުންނާއި އެބޭފުޅުންގެ އާއިލާތަކަށް ލިބޭ ހެލްތު އިންޝުއަރެންސް ކަނޑައިލުމަށް އެދި، އާންމުންގެ ފަރާތުން ހުށަހެޅި އީ ޕެޓިޝަނަށް މަޖިލީހުގެ މިއަދުގެ ޖަލްސާގައި ބަހުސްކުރައްވަމުން، ނާޒިމް ވިދާޅުވީ ހަމައެކަނި މަޖިލިސް މެމްބަރުންނަށް ބޮޑެތި އިނާޔަތްތަކެއް ލިބޭ ކަމަށް ދައްކައިގެން އުފައްދަނީ ފިތުނަ ކަމަށެވެ.
"އެކަމުގެ ސަބަބުން މި މަޖިލީހުގެ މެންބަރުން ނުރައްކަލަކަށް ހުށަހެޅި، އަދި އަޅުގަނޑުމެންގެ އިއްޒަތްތެރި މެންބަރަކު އަވަހާކޮށްލެވިގެންވެސް ހިނގައްޖެ ހަމަ މިގޮތަށް ނަފުރަތު އުފެއްދުމުގެ ނަތީޖާއެއްގެ ގޮތުން،" ނާޒިމް ވިދާޅުވިއެވެ.
މިއާއެކު ނާޒިމް ވިދާޅުވީ ގާނޫނުއަސާސީގެ 102 ވަނަ މާއްދާގެ ދަށުން އެ އިނާޔަތްތައް ލިބެނީ ހަމައެކަނި މެންބަރުންނަށް ނޫންކަމަށް ވިދާޅުވެ،ރައީސުލްޖުމްހޫރިއްޔާ، ނައިބު ރައީސް، މިނިސްޓަރުން، މަޖިލިސް މެމްބަރުން، ފަނޑިޔާރުން އަދި މުސްތަގިއްލު މަގާމުތަކުގެ މުސާރައާއި އިނާޔަތްތައް ކަނޑައަޅާނީ މަޖިލީހުން ކަމަށާ، އެ އިނާޔަތްތަކަކީ ހަމައެކަނި މެމްބަރުންނަށް ލިބޭ އެއްޗެއް ނޫން ކަމަށެވެ.
އަދި އާންމުންނަށް ލިބޭ ސިއްހީ ހިދުމަތާއި މެމްބަރުންގެ ހެލްތް އިންޝުއަރެންސް އަކީ އަޅާކިޔަންޖެހޭ ދެކަމެއް ނޫން ކަމަށްވެސް ނާޒިމް ވިދާޅުވިއެވެ.
މިއާއެކު އޭނާ ވަނީ މުސްތަގިއްލު މަގާމުތަކާއި ބާރުތަކުގައި ތިއްބަވާ ބޭފުޅުންނަށް އިނާޔަތްތައް ދޭ ދިނުން ދިފާއުކޮށް އެ އިނާޔަތް ދެނީ ވެރިކަން ހިންގާ ފަރާތުގެ "ވަކިތަކުން" މިނިވަން ކުރުމަށް ކަމަށް ވިދާޅުވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
