ދިރާގު މޯލްޑިވްސް ރޯޑް ރޭހަކީ ވޯލްޑް އެތުލެޓިކްސް ރޭންކިންގް ކޮމްޕެޓިޝަނެއްގެ ގޮތުގައި ކަނޑައަޅައިފި

ރާއްޖޭގެ އެންމެ ބޮޑު ދުވުން ކަމަށްވާ ދިރާގު މޯލްޑިވްސް ރޯޑް ރޭސް (ޑީއެމްއާރްއާރް)، ވޯލްޑް އެތުލެޓިކްސް ރޭންކިންގ ކޮމްޕެޓިޝަނެއްގެ ގޮތުގައި ރަސްމީކޮށް ކަނޑައަޅައިފި ކަމަށް ދިރާގުން ބުނެފިއެވެ.

ދިރާގުން ބުނީ، މި ފިޔަވަޅާއެކު ދުވުމުގައި ބައިވެރިވާ ދުވުންތެރިން ހާސިލުކުރާ ނަތީޖާތައް ބައިނަލްއަޤުވާމީ ރޭންކިންގގައި ހިމެނޭނެ ކަމަށެވެ. އެގޮތުން އެ ނަތީޖާތައް ދުނިޔޭގެ ފެންވަރުގައި ރަސްމީކޮށް ބަލައިގަންނަ ކާމިޔާބީތަކަކަށް ވާނެ ކަމަށް އެ ކުންފުނިން ބުނެއެވެ.

މި އަހަރުގެ ދުވުން ބާއްވާނީ 2026 ނޮވެމްބަރު 20 ވަނަ ދުވަހު، ހުކުރު ދުވަހު ހުޅުމާލޭ ސެންޓްރަލް ޕާކުގައެވެ. ދިރާގުން ބުނެފައިވާ ގޮތުގައި ދުވުމުގައި ބައިވެރިވުމަށް 5,500 އަށްވުރެ ގިނަ ދުވުންތެރިން ރަޖިސްޓަރީވެފައިވާއިރު، މިއީ ޑީއެމްއާރްއާރްގެ ތާރީޚުގައި އެންމެ ގިނަ ބައިވެރިން ހިމެނޭ އަހަރެވެ. ފުރަތަމަ ހުޅުވާލީ 4,000 ޖާގައެއް ކަމަށާއި، ޢާންމުންގެ ފަރާތުން ލިބުނު ބޮޑު ތަރުޙީބާ ގުޅިގެން ޖާގަ އިތުރުކުރީ ކަމަށް އެ ކުންފުނިން ބުނެއެވެ.

ދުވުމުގައި ހާފް މެރަތަން، 10 ކިލޯމީޓަރު އަދި ފަސް ކިލޯމީޓަރުގެ ކެޓަގަރީތައް ހިމެނޭއިރު، މި ފަހަރު އަލަށް ޓީމް ކެޓަގަރީތައް ވެސް ތަޢާރަފުކޮށްފައިވެއެވެ. ތަޖުރިބާކާރު ދުވުންތެރިންނާއި އަލަށް ދުވުމަށް ނުކުންނަ ފަރާތްތައް އެއްތަނަކަށް ގެނެސް، ދުޅަހެޔޮ ދިރިއުޅުމަށް ހިތްވަރުދީ، ދުވުމުގެ އާދަ އަށަގަންނުވައި، އެންމެންނަށް ބައިވެރިވެވޭނެ ޕްލެޓްފޯމެއް ފަހިކޮށްދިނުމަކީ ދުވުމުގެ މައިގަނޑު މަޤްޞަދު ކަމަށް ދިރާގުން ބުނެފައިވެއެވެ.

ކުރީގެ އަހަރުތަކާ އެއްގޮތަށް، މި އަހަރުގެ ދުވުން ވެސް ޚާއްޞަކޮށްފައިވަނީ ދިރާގުގެ ސީއެސްއާރް ޕްރޮގްރާމުގެ މައިގަނޑު ދާއިރާއެއް ކަމަށްވާ ކުޑަކުދިންގެ ރައްކާތެރިކަމަށެވެ. އެ ދާއިރާގައި މަސައްކަތްކުރާ އެންޖީއޯތަކަށް ޢާންމު ހޭލުންތެރިކަން އިތުރުކުރުމާއި ފައިސާ ހޯދުމުގެ ފުރުސަތު މި އިވެންޓުން ލިބިގެންދާނެ ކަމަށް ދިރާގުން ބުނެއެވެ.

ޑީއެމްއާރްއާރްއަކީ ވޯލްޑް އެތުލެޓިކްސްގެ ސަޓިފައިޑް ރޭސް ރޫޓަކާއެކު، އެސޯސިއޭޝަން އޮފް އިންޓަނޭޝަނަލް މެރަތަންސް އެންޑް ޑިސްޓަންސް ރޭސަސް (އެއިމްސް)ގެ ވޯލްޑް ރަނިންގ ކަލަންޑަރުގައި ލިސްޓުކުރެވިފައިވާ ރާއްޖޭގެ ފުރަތަމަ ބައިނަލްއަޤުވާމީ ދުވުމެވެ. ރާއްޖޭގެ އެކި ސަރަހައްދުތަކުން އެކި ޢުމުރުގެ ދުވުންތެރިންނާއެކު، ބޭރުގެ ގިނަ ޤައުމުތަކުގެ ދުވުންތެރިން ވެސް އެ ދުވުމުގައި ބައިވެރިވެއެވެ.