އީވާ ރިޔާސަތުން ދުރުކުރަން ހުށައެޅި މައްސަލައިގެ ނޯޓިސް ފޮނުވައިފި

ރައްޔިތުން މަޖިލީހުގެ ނައިބް ރައީސްކަމުން ގަލޮޅު އުތުރު ދާއިރާގެ މެމްބަރު އީވާ އަބްދުالله ވަކިކުރަން ހުށައެޅި ޤަރާރު މަޖިލީހަށް ބަލައިގަނެ އީވާއަށް ނޯޓިސް ފޮނުވައިފިއެވެ.

މަޖިލީހުގެ 50 މެމްބަރުންގެ ސޮޔާއި އެކު އިވާ ވަކިކުރުމަށް މަޖިލީހަށް ގަރާރެއް ހުށައެޅީ މިމަހުގެ 13 ވަނަދުވަހުއެވެ. އެ ގަރާރުގައި އެމްޑީޕީއަށް ނިސްބަތްވެޑައިގަންނަވާ 49 މެމްބަރުންނާއި އަމިއްލަ މެމްބަރެއްގެ ގޮތުގައި މަޖިލީހުގައި އިންނަވާ ނޮޅިވަރަމް ދާއިރާގެ މެމްބަރު މުޙައްމަދު ނަޝީދު އަބްދުالله ވަނީ ސޮއި ކުރައްވާފައެވެ.

މަޖިލީހުގެ ނައިބުރައީސްކަމުން އީވާ ވަކިކުރަން އެމްޑީޕީން ހުށަހެޅީ، މަޖިލީހުގެ ކުރީގެ ރައީސް މުހައްމަދު ނަޝީދު މަގާމުން ވަކިކުރަން އެމްޑީޕީން ހުށަހެޅި މައްސަލަ އެެޖެންޑާކުރުމަށް ފަހުގައިވެސް ކުރިއަށް ގެންދެވޭ ގޮތް ނުވެ އެ މައްސަލަ ވަރަށް ބޮޑުވެގެންދިޔަ ދަނޑިވަޅެއްގައެވެ.

އެމްޑީޕީން އީވާ ވަކިކުރަން ދެވަނަ ފަހަރަށް ހުށަހެޅީ ނަޝީދު ރިޔާސަތުން ދުރުކުރާ މައްސަލަ ކުރިއަށް ނުގެންދެވި، އީވާ އަކީ އެމަނިކުފާނާއި އާއިލީ ގުޅުމެއް އޮންނަ ބޭފުޅެއް ކަމުން، އީވާގެ މަގާމުގެ ބޭނުން ކުރައްވައި ގަސްތުގައި މައްސަލަ ލަސްކުރައްވައި އާއިލީ އަދި ޒާތީ މަސްލަހަތު ހިމާޔަތްކުރައްވަމުންދާ ކަމަށް ބުނެއެވެ. އަދި އެއީ ޤާނޫނު އަސާސީގެ 75 ވަނަ މާއްދާއާ ކަނޑައެޅިގެން ހިލާފު އަމަލެއްކަމަށްވެސް އެމްޑީޕީން ވަނީ ބުނެފައެވެ.

މީގެ ކުރިން ވެސް އެމްޑީޕީން މަޖިލީހަށް ހުށަހެޅި އީވާގެ އިތުބާރު ނެތްކަމުގެ މައްސަލަ އަނބުރާ ގެންގޮސްފައިވާއިރު އެފަހަރު މައްސަލަ އަނބުރާ ގެންދިޔައީ ރިޔާސީ އިންތިޚާބުގެ ދެވަނަ ބުރާއި ދިމާކޮށް، އެމްޑީޕީން އިންތިޚާބު ކާމިޔާބު ކުރުމަށް ޑިމޮކްރެޓްސް ގެ ތާއީދު ހޯދުމުގެ މަސައްކަތް ފަށާފައިވަނިކޮށެވެ.