އިންޑިއާ އާއި އިދިކޮޅަށް ކަންކަން ކުރުމަކީ ދިވެހިންނަށް ރަނގަޅު ގޮތަކަށް ނުވާނެ: ނަޝީދު

އިންޑިއާ އާއި އިދިކޮޅަށް ދިވެހިން ކަންކަން ކުރުމަކީ ދިވެހިންނަށް ރަނގަޅު ގޮތަކަށް ނުވާނެ ކަމަށް ރައްޔިތުންގެ މަޖިލީހުގެ ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ނަޝީދު މިފަދައިން ވިދާޅުވެފައިވަނީ މިއަދު ކުރެއްވި ޓްވީޓެއްގައެވެ.

މި ޓްވީޓްގައި ވަނީ ރާއްޖޭގެ ރައްޔިތުންގެ  އެންމެ ޒަމާން ވީ އެކުވެރި އަވަށްޓެރި ގައުމަކީ އިންޑިއާ ކަމށާއި ދިވެހިންނަށް އެންމެ އެހީތެރިވެދޭ ގައުމަކީވެސް އިންޑިއާ ކަމަށްވެސް ވިދާޅުވެފައެވެ.

ނަޝީދު މި މޭރުމުން ވާހަކަފުޅު ދައްކަވާފައިވާއިރު ރާއްޖޭގައި ތިބި އިންޑިއާ ސިފައިންގެ އަދަދު ސަރުކާރުން ވަނީ ހާމަ ކޮށްފައެވެ.

އިއްޔެ ރައީސް އޮފީހުން ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން އެ އޮފީހުގެ އަންޑަރ ސެކެރެޓަރީ ފޯ ޕަބްލިކް ޕޮލިސީ މުހައްމަދު ފިރުޒުލް ވިދާޅުވީ،ސަރުކާރަށް މިހާތަނަށް ލިބުނު މައުލޫމާތު ތަކުން އެނގޭ ގޮތުން ރާއްޖޭގައި ގާއިމްވެ ތިބި އިންޑިއާ ސިފައިންގެ އަދަދަކީ 77 ކަމަށެވެ. އޭގެ ތެރެއިން 24 ސިފައިން ތިބީ އިންޑިޔާއިން ހަދިޔާކުރި އެއް ހެލިކޮޕްޓަރު ބަލަހަށްޓައި ދުއްވުމަށް ކަމަށާ އަދި އަނެއް ހެލިކޮޕްޓަރ ދުއްވުމަށް 26 ސިފައިންތިބި އިރު، ޑޯނިއާ މަތިންދާބޯޓު ދުއްވުމަށް 25 ސިފައިން ތިބި ކަމަށް ފިރުޒުލް ވިދާޅުވި އެވެ. މީގެ އިތުރުން މެއިންޓަނަންސް އާއި އިންޖީނިއަރިން ފަދަ ކަންކަން ކުރުމަށް އިތުރު ދެ ސިފައިން ތިބި ކަމަށްވެސް ފިރުޒުލް ވިދާޅުވި އެވެ.

ރާއްޖޭގައި ތިބި އިންޑިއާ ސިފައިންގެ އަދަދު ހާމަ ކުރުމާއި، ރާއްޖޭގެ ސަލާމަތަށް ނުރައްކާވާގޮތަށް ހަދާފައި ހުރި އެއްބަސްވުންތައް ހާމަ ކުރުމަކީ ރައީސުލްޖުމްހޫރިއްޔާ ޑރ މުހައްމަދު މުއިއްޒުގެ ރިޔާސީ ވައުދެކެވެ. އަދި އިންޑިޔާ އާއި ވާހަކަ ދައްކައިގެން އެ ގައުމުގެ ސިފައިން ރާއްޖެއިން ފޮނުވާލުމަށްވެސް އެމަނިކުފާނު ވަޢުދުވެވަޑައިގެންފައިވާއިރު އެ މަސައްކަތް މިހާރު ވަނީ ފަށްޓަވާފައެވެ.

އަދި ވެރިކަމުގެ ފުރަތަމަ 14 ހަފްތާގައި ކުރާނެ އެންމެ މުހިންމު ކަމަކީ ރާއްޖޭގައި ތިބި އިންޑިއާ ސިފައިން ބޭލުން ކަމަށް  ރައީސް ޑރ.މުހައްމަދު މުއިއްޒު ވަނީ ވިދާޅުވެފައެވެ.