ހަނިމާދޫ އެއަރޕޯޓްގެ މަސައްކަތް ކުރިއަށްދާގޮތް އާރްއޭސީއެލްގެ އެމްޑީ މުބީން ބައްލަވާލައްވައިފި

ހދ ހަނިމާދޫ އެއަރޕޯޓް ތަރައްޤީ ކުރުމުގެ މަޝްރޫޢު ކުރިއަށްދާގޮތް ރީޖަނަލް އެއަރޕޯޓް ކޮމެޕެނީ ލިމިޓެޑް (އާރްއޭސީއެލް) ގެ އެމްޑީ އަހްމަދު މުބީން ބައްލަަވާލައްވައިފިއެވެ.

އާރްއޭސީއެލްގެ މެނޭޖިންގ ޑިރެކްޓަރުކަމާއި ހަވާލުވެވަޑައިގަތުމަށްފަހު އަހްމަދު މުބީން ހދ ހަނިމާދޫއަށް ކުރެއްވި ދަތުރުފުޅެއްގައި ހަނިމާދޫ އިންޓަރނޭޝަނަލް އެއަރޕޯޓް ތަރައްޤީ ކުރުމުގެ މަސައްކަތް ހިނގަމުންދާ ސަރަހައްދަށް ޒިޔާރަތްކުރައްވާ އެ މަސައްކަތް ކުރިއަށްދާ ގޮތާއި މަސައްކަތުގެ ދުވެލި ވަނީ ބައްލަވައިފައެވެ.

އާރްއޭސީއެލްއިން ބުނީ އެ ކުންފުނީގެ އެމްޑީ މިއަދު ހަނިމާދޫ އެއަރޕޯޓްގެ މަސައްކަތް ކުރިއަށްދާ ސަރަހައްދަށް ޒިޔާރަރަތްކުރައްވައި، މަސައްކަތުގެ ކޮންޓްރެކްޓަރާ ބައްދަލުކުރައްވާ އެ މަޝްރޫއާ ގުޅޭގޮތުން ތަފްސީލީ ގޮތެއްގައި މަޝްވަރާ ކުރައްވައިފައިވާކަމަށެވެ.

ހަނިމާދޫ އިންޓަރނޭޝަނަލް އެއަރޕޯޓު ތަރައްޤީކުރުމުގެ މަޝްރޫޢު އިންޑިއާގެ ޖޭ.އެމް.ސީ ޕްރޮޖެކްޓްސްއާއި ޙަވާލުކޮށްފައިވަނީ 2022 ވަަނަ އަހަރުގެ ސެޕްޓެމްބަރުމަހުގެ 25 ވަނަ ދުވަހުއެވެ.

ހަނިމާދޫ އެއަރޕޯޓް ތަރައްޤީ ކުރުމުގެ މަޝްރޫޢަކީ އިންޑިއާގެ އެގްޒިމް ބޭންކުގެ ލޯނު އެހީގައި ކުރިޔަށް ގެންދިޔުމަށް ހަމަޖެހިފައިވާ މަޝްރޫޢެކެވެ.

މިމަޝްރޫޢުގެ ދަށުން ހަނިމާދޫގައި 2.46 ކިލޯމީޓަރުގެ އައު ރަންވޭއަކާއި އަހަރަކު 1.3 މިލިއަން ފަސިންޖަރުންނަށް ޚިދުމަތްދެވޭނެ ޖާގައިގެ ޓަރމިނަލެއް ޢިމާރާތްކުރެވޭނެއެވެ.

މިމަޝްރޫޢު ނިމުމުން ބައިނަލްއަޤްވާމީ ދަތުރުތަކުގައި ބޭނުންކުރާ އެއަރބަސް A320 އާއި ބޮއިންގ 737 މަރުކާގެ ބޯޓުފަހަރަށް ހަނިމާދޫ އެއަރޕޯޓުން ޚިދުމަތް ދެވޭނެއެވެ. އަދި މެދުއިރުމައްޗާއި، ދެކުނު އޭޝިއާއާއި، ދެކުނު އިރުމަތީ އޭޝިއާއާއި އިރުމަތީ އެފްރިކާގެ ޤައުމުތަކުން ސިދާ ފްލައިޓްތައް ހަނިމާދޫއަށް އޮޕަރޭޓް ކުރުމުގެ ޤާބިލުކަން ލިބިގެންދާނެ ކަމަށް މަސައްކަތް ހަވާލުކުރި ކުރީގެ ސަރުކާރުން ހާމަކޮށްފައިވެއެވެ.