1.8 މިިލިއަން ވަނަ ފަތުރުވެރިޔާއަށް ހޫނު މަރުހަބާއެއް!

ރާއްޖެއަށް ޒިޔާރަތްކުރި 1.8 މިލިއަން ވަނަ ފަތުރުވެރިޔާއަށް ހޫނު މަރުހަބާއެއް ކިޔައިފި އެވެ.

1.8 މިލިއަން ވަނަ ފަތުރުވެރިޔާއަށް މަރުހަބާ ކިޔުމަށްޓަކައި މިއަދު ވެލާނާ އިންޓަނޭޝަނަލް އެއާޕޯޓުގައި ވަނީ ޚާއްސަ ހަރަކާތެއް ކުރިއަށް ގެންގޮސްފަ އެވެ.

ސަގާފީ ބޮޑުބެރުގެ ހަރަކާތްތަކާއެކު އެ ފަތުރުވެރިއާއަށް މަރުހަބާ ކިޔާފައިވާއިރު، މަރުހަބާ ކިޔުމުގައި ރާއްޖޭގެ ޓުއަރިޒަމް މިނިސްޓަރު އިބްރާހީމް ފައިސަލް އާއި ރާއްޖޭގެ ފަތުރުވެރިކަން ޕްރޮމޯޓު ކުރުމަށް ހަދާފައިވާ ކުންފުނި މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) ގެ މެނޭޖިންގ ޑިރެކްޓަރު ފާތުމަތު ތައުފީގު ބައިވެރިވެވަޑައިގެންނެވި އެވެ.

މިއަދު ކުރިއަށް ގެންދިޔަ މި ހަރަކާތުގައި ޓުއަރިޒަމް މިނިސްޓްރީއާއި، އެމްއެމްޕީއާރުސީ އަދި އިމިގްރޭޝަންގެ އިތުރުން ފަތުރުވެރިކަމުގެ ސިނާއަތާއި ގުޅުންހުރި އިދާރާތަކުން ވަނީ އެ ފަތުރުވެރިޔާއަށް އެކި ހަދިޔާތައް ދީފަ އެވެ.

އޭގެ ތެރޭގައި ހިލްޓަން މޯލްޑިވްސްއިން އަމިންގިރި ރިސޯޓްގައި މިފަތުރުވެރިޔާއަށް 4 ރޭ ވަންދެން ހިލޭ ހުރުމުގެ ވައުޗާއެއް ހިލްޓަންގެ ޖެނެރަލްގެ މެނޭޖަރުގެ ފަރާތުން ދީފައިވެ އެވެ.

ރާއްޖެއަށް ޒިޔާރަތްކުރި 1.8 މިލިއަން ވަނަ ފަތުރުވެރިޔާއަށް މަރުހަބާ ކިޔުމަށް ބޭއްވި ހަރަކާތަށް ފަހު ނޫސްވެރިންނަށް ދެއްވި އިންޓަވިއުއެއްގައި ޓުއަރިޒަމް މިނިސްޓަރު ފައިސަލް ވަނީ ރާއްޖޭގެ ފަތުރުވެރިކަމުގެ ސިނާއަތު އާ ހަރުފަތަކަށް ގެންދިއުމަށް ސަރުކާރުން މަސައްކަތްކުރާނެ ކަމުގެ ފުރިހަމަ ޔަގީންކަން ދެއްވާފަ އެވެ. އަދި ފަތުރުވެރިކަމުން ލިބޭ އާމްދަނީ 6 ބިލިއަނަށް އިތުރުކުރުމަށް މަސައްކަތް ކުރައްވާކަމަށް ވެސް ވިދާޅުވި އެވެ.

"އަޅުގަނޑުމެންގެ ޓާގެޓަކީ ޓޫރިޒަމް ސެކްޓަރ އާއި ގުޅުން ހުރި ހުރިހާ ސިނާއަތެއް ގުޅިގެން ޓޫރިޒަމްއިން ލިބޭ ރެވެނިއު 6 ބިލިއަން އަށް އިތުރު ކުރުން" ޓޫރިޒަމް މިނިސްޓަރު އިބްރާހީމް ފައިސަލް

ޓުއަރިޒަމް މިނިސްޓަރު ފައިސަލް

ތަފާސްހިސާބުތަކުން ދައްކާގޮތުގައި މިހާރު ރާއްޖެއަށް އެންމެ ގިނައިން ޓުއަރިސްޓުން އަންނަ އެއް ގައުމަކީ ރަޝިޔާއެވެ. އޭގެ އިތުރުން އިންޑިއާ އަދި ޗައިނާއަކީ ވެސް ގިނަ އަދަދަކަށް ފަތުރުވެރިން އަންނަ ގައުމުތަކެވެ.

ރާއްޖޭއަކީ މިހާރުވެސް ފަތުރުވެރިންގެ މެދުގައި މަގުބޫލު މަންޒިލަކަށް ވީ ނަމަވެސް، ރާއްޖޭގެ ފަތުރުވެރިކަމުގެ ސިނާއަތު ފުޅާކުރުމަށް އައު މަންޒިލުތަކާއި މާކެޓުތައް ހޯދުމުގެ މަސައްކަތް އެމްއެމްޕީއާރުސީން ކުރަމުންދާކަމަށް އެ ކުންފުނީގެ އެމްޑީ ފާތުމަތު ތައުފީގު ވަނީ ވިދާޅުވެފަ އެވެ.

އެގޮތުން އައު މާކެޓުތައް ހޯދުމަށް އެ ކުންފުނިން ދިރާސާކުރަން ފަށާފައިވާކަން ވެސް މިއަދުގެ ހަރަކާތަށް ފަހު ނޫސްވެރިންނަށް މައުލޫމާތު ދެއްވަމުން ފާތުމަތު ތައުފީގު ވަނީ ވިދާޅުވެފަ އެވެ.