ދަރިވަރުން ސުކޫލަށް ނުދާ މައްސަލާގައި ފިޔަވަޅު އަޅަން އަންގައިފިން: ޑރ. ޝަފީޢު

އެއްވެސް އުޒުރެއް ނެތި، ދަރިވަރުން ސުކޫލަށް ނުދާ މައްސަލައަކީ ބަލަންޖެހޭ ކަމެއް ކަމަށާ، އެކަމާއި ގުޅިގެން ފިޔަވަޅު އެޅުމަށް ސުކޫލުތަކަށް އަންގަވާފައިވާނެ ކަމަށް ތަޢުލީމާ ބެހޭ ވަޒީރު ޑރ. އިސްމާޢީލް ޝަފީޢު ވިދާޅުވެއްޖެއެވެ.

ނެޝަނަލް އެސެސްމަންޓް އޮފް ލާނިން އައުޓްކަމްސް ރިޕޯޓް އާންމުކުރުމަށް ބޭއްވި ހަފްލާގައި ވާހަކަ ވަޒީރު ވަނީ މި ދުވަސްވަރު 8،000އެއްހާ ދަރިވަރުން ސުކޫލަށް ނުދާކަން ފާހަގަކުރައްވާފައެވެ.

މަޖިލީހުގެ މިއަދުގެ ޖަލްސާގައި އެކަމާ ގުޅިގެން މެންބަރަކު ކުރެއްވި ސުވާލަށް ޖަވާބު ދެއްވަމުން ވަޒީރު ވިދާޅުވީ، ސުކޫލަށް ނުދާ ދަރިވަރުން ދެނެގަނެ އެކަމަށް ބޮޑު އިސްކަމެއް ދީގެން މަސައްކަތް ފެށުނީވެސް ޕީޕީއެމްގެ ސަރުކާރެއްގައި ކަމަށެވެ.

އޭރުގައި ސުކޫލަށް ނުދާކުދިން ދެނެގަނެ، ސުކޫލަށް ކުދިން ގެނައުމުގެ މަސައްކަތް ފެށިގެން ދިޔައީ. ނަމަވެސް އެމްޑީޕީއަށް ވެރިކަން ލިބުމާއެކު މި މޮނިޓަރިން މެކެނިޒަމް ވަރަށް ބޮޑަށް ދަށްވެގެން ދިޔައީ. އެޓެންޑެންސް ޕޮލިސީއެއް އޮވޭ. އެކަމަކު އޭގައި ވާގޮތުން ސުކޫލުތަކުން ރިޕޯޓްކުރަން މިޖެހެނީ މިހާ ކުދިން ނަދެޔޭ. ވަކި މުއްދަތުތަކެއް ހުރޭ. ތިން ދުވަސް. 10 ދުވަސް. އެގޮތަށް ކަނޑައަޅަފައި ހުރޭ ލޯންގް އެބްޒެންޓިޒަމްއަކީ 10 ދުވަހޭ. ޖެހިޖެހިގެން ތިން ދުވަހު ނައިއްސިނަމަ ރިޕޯޓްކުރަންޖެހޭނެއޭ. މިނިސްޓްރީއަށް ލިބެމުންދިޔައީ އެ މައުލޫމާތު ސުކޫލްތަކުން ފޮނުވީމާ

ތަޢުލީމާ ބެހޭ ވަޒީރު ޑރ. އިސްމާއީލް ޝަފީޢު

ނަމަވެސް ކޮންމެ ދުވަހެއްގެ އެޑެންޑެންސް މިނިސްޓްރީއަށް ފޮނުވަން މިހާރު މަޖުބޫރުވާނެ ކަމަށާ، އެގޮތަށް ފޮނުވުމުގެ ތެރެއިން ގިނަ ދަރިވަރުންތަކެއް ސުކޫލަށް ނުދާކަން ދެނެގަނެވުނުކަމަށް ވަޒީރު ވިދާޅުވިއެވެ.

މިއީ އަޅުގަނޑުމެން ކަނބޮޑުވާންޖެހޭ ކަމެއް. މެންބަރުންވެސް، ބެލެނިވެރިންވެސް، މުދައްރިސުންވެސް، ރަށުގެ އެންމެންވެސް ކަންބޮޑުވާންޖެހޭ ކަމެއް. ސުކޫލަށް ކުއްޖަކު ނުދިޔުމަކީ އޭގެ ނޭދެވޭ އަސަރު މުޅި ގައުމުގެ ހިޔުމަން ކެޕިޓަލް ޑިވޮލަޕްމަންޓްއަށް ކުރާނެ ކަމެއް.

ތަޢުލީމާ ބެހޭ ވަޒީރު ޑރ. އިސްމާއީލް ޝަފީޢު

އެހެންކަމުން އެއްވެސް ސަބަބަކާ ނުލައި ސުކޫލަށް ނުގޮސް ކުއްޖަކު ހުރުމަކީ ބަލައިގަނެވޭނެ ކަމެއް ނޫން ކަމަށާ، އެކަމަށް މިނިސްޓްރީން ފިޔަވަޅު އަޅާނެ ކަމަށް ވަޒީރު ވިދާޅުވިއެވެ. އަދި ނިމުނު ހަފްތާގައި މާލޭ ސުކޫލުތަކުގެ ޕްރިންސިޕަލުންނާ ބައްދަލުކުރައްވައި އެކަމާ ގުޅިގެން ވާހަކަދެއްކެވި ކަމަށާ، އެ މައްސަލާގައި ފިޔަވަޅު އެޅުމަށް އަންގަވާފައި ވާނެ ކަމަށް ވިދާޅުވިއެވެ.

ވަޒީރު ވިދާޅުވީ ސުކޫލަށް ދަރިވަރުން ނުދާ މައްސަލައިގައި މި ސަރުކާރުން ފިޔަވަޅެއް ނާޅައި ދޫކޮށް ނުލައްވާނެ ކަމަށެވެ.