ރައީސް، ޔާމީން ފައިޞަލަށް: 2013 ވަނަ އިންތިޚާބުގައި އަބްދުއްރަޙީމް ހުންނެވީ ޤާސިމާއެކު!

2013 ވަނަ އަހަރުގެ ރިޔާސީ އިންތިޚާބުގައި މަޖިލީހުގެ ރައީސް އަބްދުއްރަޙީމް އަބްދުالله ހުންނެވީ ޖުމްހޫރީ ޕާޓީގެ ލީޑަރ ޤާސިމް އިބްރާޙީމާއެކު ކަމަށް އެ އަހަރުގެ ރިޔާސީ އިންތިޚާބު ކާމިޔާބު ކުރެއްވި ކުރީގެ ރައީސް އަބްދުالله ޔާމީން ޢަބްދުލްޤައްޔޫމް ވިދާޅުވެއްޖެއެވެ.

ދާދިފަހުން ފަތުރުވެރިކަމާ ބެހޭ ވަޒީރު އިބްރާޙީމް ފައިޞަލް އޮންލައިން ނޫހަކަށް ދެއްވި ބަސްދީގަތުމެއްގައި ވަނީ 2013 ވަނަ އަހަރުގެ އިންތިހާބުގައި ވާދަކުރާނެ ކެންޑިޑޭޓެއް ކަނޑައެޅުމަށް، ބޭއްވުނު ޕީޕީއެމްގެ ޕްރައިމަރީގައި، އުމަރު ނަސީރުގެ މައްޗަށް ޔާމީނަށް ކުރި ހޯދުނީ އެބްދުއްރަޙީމްގެ ސަބަބުން ކަމަށް ވިދާޅުވެފައެވެ. އަދި ރައީސް ޔާމީން އަށް 2013 ވަނަ އަހަރުގެ ރިޔާސީ އިންތިހާބު ކާމިޔާބުކޮށްދެއްވީވެސް އަބްދުއްރަހީމް ކަމަށް ފައިޞަލް ވިދާޅުވިއެވެ.

ރޭ ބޭއްވި ޕީއެންއެފްގެ ފްރޮންޓް އޮފީސް ޖަލްސާގައި، އެވާހަކަ ތަކަށް ރައްދު ދެއްވަމުން، ޔާމީން ވިދާޅުވީ، 2013 ވަނަ އަހަރުގެ އިންތިޚާބުގައި އަބްދުއްރަޙީމް ހުންނެވީ ޔާމީނާއެކު ނޫން ކަމަށެވެ.

"އަބްދުއްރަހީމް ހުންނެވީ ރައީސް ޔާމީނާއެކީއެއް ނޫން. އަބްދުއްރަހީމް ހުންނެވީ ގާސިމާއެކީ، " ރައީސް ޔާމީން ވިދާޅުވި އެވެ.

ރައީސް ޔާމީން ވިދާޅުވީ ރިޔާސީ އިންތިޚާބުގެ ކުރީ ބުރުގައި ވަރަށް ބޮޑު ތަފާތަކުން ރައީސް ނަޝީދު ކުރީގައި އޮންނެވި ކަމަށާ، ދެވަނާގައި 63،000 އެއްހާ ވޯޓުން ޔާމީން އޮތް އިރު، ތިންވަނާގައި އޮތް ގާސިމަށްވެސް 61،000 އެއްހާ ވޯޓް ލިވިލެއްވިކަމަށެވެ.

އޭރު އަޅުގަނޑުމެންގެ ތެރޭގައި، އަޅުގަނޑެއްނޫން، ވަރަށް ގާތް މީހެއް އަޑުއެހީ، އަބްދުއްރަޙީމް ހަމަ ބުނުއްވީ، ތިމަންނަ އޭރުވެސް ބުނީމޭ، އަހަރެމެން އަތުގައި ފައިސާއެއް ނެތޭ މިއަށްވުރެ މާ ރަނގަޅުވާމޭ، ދެން އަޅުގަނޑަށް ކޮންމެ ނަމެއް ކިޔާފައި ކިޔުމަށްވުރެން، ތިމަންނަމެން ގާސިމަށް ތާއިދުކޮށްގެން މިކަން ނިންމި ނަމަ. ގާސިމޭ މި ވޯޓް ހޯދާނީ. އެކަން އަޅުގަނޑާ ހަމައަށް އައީ، ދޮގު ނުކުރެވޭ ވަރުގެ މީހެއްގެ ފަރާތުން. އަބްދުއްރަޙީމަކަށް ދޮގެއް ނުކުރެވޭނެ އެވާހަކައެއް.

ކުރީގެ ރައީސް އަބްދުالله ޔާމީން ޢަބްދުލްޤައްޔޫމް

”އެހެންވީމާ އަބްދުއްރަހީމް އޭރު ޕީޕީއެމް ތެރޭގައި ހުންނެވިޔަސް އަބްދުއްރަހީމް މަސައްކަތް ކުރެއްވީ އަޅުގަނޑާ އެކީގައެއް ނޫން.“ ރައީސް ޔަމީން ވިދާޅުވިއެވެ.

ޔާމީން ވިދާޅުވީ ޕީޕީއެމްގެ ފުރަތަމަ އިންތިހާބުގައި ނައިބު ރައީސް ކަމަށް ކުރިމަތި ލައްވައިގެން ނާކާމިޔާބުވުމުން އަބްދުއްރަހީމް ފުރައިގެން ދިޔައީ މެލޭޝިއާއަށް ކަމަށެވެ.

"ރައީސް ޔާމީން އެތައް އާދޭހެއް ކުރައްވައިގެން އަބްދުއްރަޙީމް ދުރުވީ. އެހެންވީމާ، އަބްދުއްރަހީމަކީ މާގިނަ ސިޔާސީކަންކަން ކޮށްގެން އަޅުގަނޑު ގެނެސް ގޮނޑިއަށް ވެޑުވި މީހެކޭ ފައިސަލަށް ހީވާކަމަށް ވަންޏާ، މިހާރު އެބަޖެހޭ މިކަހަލަ ކަންކަމުގެ ހަގީގަތް އޮޅުންފިލުވަދޭން. އަބްދުއްރަޙީމް 2013ގައި ހުންނެވީ ރައީސް ޔާމީން ހޮވޭތޯއެއް ނޫން. އަބްދުއްރަޙީމް މަސައްކަތް ކުރެއްވީ ގާސިމާއެކު. ގާސިމް ކެޓީމަ ދެން އެހިސާބުން އަބްދުއްރަޙީމްގެ މަސައްކަތެއް އަޅުގަނޑުމެންނަށް ފެނިގެން ދިޔައީ،"

ކުރީގެ ރައީސް އަބްދުالله ޔާމީން ޢަބްދުލްޤައްޔޫމް

ޔާމީން ވިދާޅުވީ، އެވާހަކަތައް ނުދައްކަވަން ހުންނަވަނީ، މާޒީއަކީ މާޒީ ކަމަށް ވުމުން ކަމަށާ އެހެން ނަމަވެސް، ”ގަބުރު ކޮނެގެން ކަށިނަގާ ހިސާބަށް ދާ ކަމަށް ވަންޏާ ދެން މީގެ ހަގީގަތާ ހަމައަށް ދާނަން“ ކަމަށެވެ.

ދައްކަން ބޭނުން ނަމަ، ދައްކަން އެފަދަ އެތަކެއް ވާހަކަ ހުރި ކަމަށާ އެހެން ނަމަވެސް، ”އެބޭފުޅުންގެ ކަރާމާތަށް ވިސްނާފައި“ އިސްވެ އެފަދަ ވާހަކަ ނުދައްކަވަނީ ކަމަށް ޔާމީން ވިދާޅުވިއެވެ.