އައްޑޫ ސިޓީ ހިތަދޫގެ ޓޫރިޒަމް ޒޯނު ތަރައްގީ ކުރުމުގެ ފުރުސަތު ހުޅުވާލައިފި

އައްޑޫ ސިޓީ ހިތަދޫގެ އީދިގަލި ޓޫރިޒަމް ޒޯނުގައި ފަތުރުވެރިކަމުގެ ވަސީލަތްތައް ތަރައްގީ ކުރުމުގެ ފުރުސަތު އިންވެސްޓަރުންނަށް ހުޅުވާލައިފިއެވެ.

އައްޑޫ ސިޓީ ކައުންސިލުން ކުރި އިއުލާނެއްގައި ބުނީ، އައްޑޫ ސިޓީގެ އީދިގަލި ޓޫރިޒަމް ޒޯން ތަރައްގީކޮށްދިނުމަށް ޝައުގުވެރިކަން ހުރި ފަރާތްތަކަށް އެ ފުރުސަތު ހުޅުވާލާފައިވާ ކަމަށެވެ.

ރާއްޖެ އާއި ރާއްޖެއިން ބޭރުގެ އިންވެސްޓަރުންނަށްވެސް ހުޅުވާލައިގެން ތަރައްގީ ކުރުމަށް ދޫކުރާ ޒޯނަކީ 21،007.39 ފޫޓުގެ ތަނެއް ކަމަށާއި، އެ ތަނުގައި ތަރައްގީ ކުރެވޭނެ އިންވެސްޓްމަންޓުތަކުގެ ތެރޭގައި ސިޓީ ހޮޓަލާއި ގުޅުން ހުރި ޓޫރިޒަމް ވަސީލަތްތައް ހުންނަންވާނެ ކަމަށް އެ އިއުލާންގައި ބުނެއެވެ. އެ ސަރަހައްދު ކުއްޔަށް ދޫކުރަނީ 50 އަހަރަށް ކަމަށް ވެސް އައްޑޫ ސިޓީ ކައުންސިލުން ބުނެއެވެ.

އައްޑޫ ސިޓީ ކައުންސިލްގެ އިދާރާއިން ބިޑިން ޑޮކިއުމެންޓް މި މަހުގެ 13 ވަނަ ދުވަހުން ފެށިގެން 21 ވަނަ ދުވަހުގެ ނިޔަލަށް ކޮންމެ ދުވަހަކު ހެނދުނު 9:00 އަކުން މެންދުރު 12:30 އިން ލިބޭނެ ކަމަށާއި، މި މަސައްކަތުގެ ބިޑްސެކިޔުރިޓީއެއްގެ ގޮތުގައި ދިވެހި ކުންފުނިތަކުން 10،000 ރުފިޔާ އަދި ބޭރުގެ ކުންފުނިތަކުން 700 ޑޮލަރު ދައްކަން ޖެހޭނެ ކަމަށާއި އެ ފައިސާ ރީފަންޑު ނުވާނެ ކަމަށް ވެސް އިއުލާނުގައިވެއެވެ.

އެހެންކަމުން، އެކަމަށް ޝައުގުވެރިވާ ފަރާތްތަކުން ބިޑް ޑޮކިއުމެންޓާއި އެހެނިހެން ލިޔެކިންތައް ހަމަކޮށް އައްޑޫ ސިޓީ ކައުންސިލްގެ އިދާރާއަށް ހުށަހެޅުމަށް ވަނީ އެ ކައުންސިލުން ބުނެފައެވެ.

އައްޑޫގެ ޓޫރިޒަމް ކުރިއެރުވުމަކީ ރައީސް ޑރ. މުހައްމަދު މުއިއްޒުގެ ވެސް ވައުދުފުޅަކަށް ވާއިރު، "އައްޑޫ އައްސޭރި ޓޫރިޒަމް ޑިވެލޮޕްމެންޓް ޕްލޭން"ގެ ނަމުގައި ޓޫރިޒަމް މިނިސްޓްރީއިން ޕްލޭނެއް ވެސް އެކުލަވާލާފައިވާކަން ފާހަގަކޮށްލަން ޖެހެއެވެ.