ބިން ނުހިއްކާ ހަދަން އޮތް ފްލޯޓިން ސިޓީ، ބިން ހިއްކައިގެން ހަދާގޮތަށް ނިންމައިފި

ފްލޯޓިން ސިޓީގެ ކުރީގެ ޕްލޭންގައި އެއްވެސް ވަރަކަށް ބިން ހިއްކާގޮތަށް ނެތް ނަމަވެސް ފަހުގެ ޕްލޭންގައި ފްލޯޓިން ސިޓީގެ ވަށައިގެން ބިން ހިއްކުމަށް ނިންމާފައިވާ ކަމަށް ޕްލޭނިން މިނިސްޓަރު މުހައްމަދު އަސްލަމް ވިދާޅުވެއްޖެ އެވެ.

މިއަދު ކުރިއަށްދިޔަ ރައްޔިތުންގެ މަޖިލީހުގެ ޖަލްސާގައި ތިނަދޫ އުތުރު ދާއިރާގެ މެންބަރު ޢަބްދުލް މުޣުނީ ވަނީ ފްލޯޓިން ސިޓީ ހަދަން ދިން ފަޅުތަކުގައި ކިތައް ރަށް ހިއްކާފައި ވޭތޯ އާއި އަދި އެ ސިޓީއިން ދައުލަތަށް ކިހާ އާމްދަނީއެއް ލިބިފައިވޭތޯ ސުވާލުކުރައްވާފައެވެ.

މުޣުނީގެ ސުވާލާއި ގުޅިގެން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވަނީ، ފްލޯޓިން ސިޓީއާއި ގުޅިގެން މެންބަރުންގެ ހިތުގައި ވަރަށް ގިނަ ސުވާލު ހުރިކަން ފާހަގަކުރައްވައި އެކަމުގެ ތަފްސީލް މިނިސްޓަރަށް އެނގިލައްވާ މިންވަރަކުން ހާމަކުރެއްވުމަށް އެދިވަޑައިގެންފަ އެވެ.

"އިއްޒަތްތެރި ވަޒީރު، މި ފްލޯޓިން ސިޓީއާއި ގުޅޭ ވަރަށް ފުރިހަމަ ތަފްސީލް ދެއްވަން ވަރަށް ބޮޑަށް އެދެން. ބައެއް މެންބަރުން އެކަމުގެ ޝައުގުވެރިކަން އުފެދިގެން ބައްލަވަން ވަރަށް އެދިވަޑައިގަންނަވާ،" ރައީސް ނަޝީދު ވިދާޅުވި އެވެ.

މެންބަރު މުޣުނީގެ ސުވާލާއި، ރައީސް ނަޝީދުގެ ވާހަކަތަކަށް ޖަވާބު ދެއްވަމުން މިނިސްޓަރު އަސްލަމް ވިދާޅުވީ، ފްލޯޓިން ސިޓީގެ މަސައްކަތުގައި ބަޔަކު އުޅޭތާ ވަރަށް ޒަމާން ވެއްޖެ ކަމަށެވެ. އަދި އެއީ ބިން ހިއްކައިގެން ކުރަން އޮތް ކަމެއް ނޫން ކަމަށާއި ނަމަވެސް ފަހުން ފެނުނު ޕްލޭންތަކެއްގައި ފްލޯޓިން ސިޓީގެ ވަށައިގެން ބިން ހިއްކާގޮތަށް އޮތް ކަމަށެވެ.

ބިން ހިއްކައިގެން ކުރަން އޮތް ކަމެއްގެ ގޮތަކަށެއްނޫން އޮތީކީއެއް. އެހެން ނަމަވެސް ފަހުން އައިއްސަ، އަޅުގަނޑަށް ހަމަ ގައިމުވެސް ފެނުނު ޕްލޭން ތަކެއްގައި ހުރި، ރަށުގެ ރީފް ގެ ޕެރިފަރީގައި ރަށް ތަކެއް ހިއްކާފައި، ޝެލްޓާޑް ލެގޫން އެއްގެ ތެރޭގައި ފްލޯޓިން ސިޓީއެއް ހެދުމުގެ ކޮންސެޕްޓް. ދެން އަޅުގަނޑު އެންމެ ފުރަތަަމަ އެކަން ދެކުނުއިރު އޮތީކީއެއް މުޅިން ހިއްކާ ގޮތަކަށް އަޅުގަނޑަކަށް ހަނދާނެއް ނުވޭ. އެއްވެސް ވަރަކަށް ހިއްކާ ގޮތަކަށް އަޅުގަނޑަކަށް ހަނދާނަކަށް ނުވެއް އާދޭ.

ޕްލޭނިންގ މިނިސްޓަރު މުހައްމަދު އަސްލަމް

އަސްލަމް އިތުރަށް ވިދާޅުވީ ފްލޯޓިން ސިޓީގެ މޮކަޕެއް ހެދުމަށް ރާއްޖޭގެ ކުންފުންޏަކާއި ހަވާލުކުރިކަން މައުލޫމާތު ލިބިލެއްވި ކަމަށާ، އެހެން ނަމަވެސް އެއީ ސީދާ މިނިސްޓްރީގެ ދަށުން މިހާރު ހިންގާ ޕްރޮޖެކްޓެއް ނޫން ކަމަށްވާތީ އޭގެ ހުރިހާ ތަފްސީލެއް އެންމެ ސައްހަ ގޮތުގައި އޭނާ އަށް ނޭނގި ދާނެ ކަމަށެވެ.

"އަޅުގަނޑަށް އެނގި ހުރި މިންވަރުން މި ދަންނަވަނީ. އަދި އަޅުގަނޑު ދޭ މައުލޫމާތުގައި ކުށެއް އުޅުމަކީވެސް އެކަށީގެންވާ ކަމެއް." އަސްލަމް ވިދާޅުވި އެވެ.

"މޯލްޑިވްސް ފްލޯޓިން ސިޓީ"ގެ ނަމުގައި ކުރިއަށްދާ މަޝްރޫއު ލޯންޗް ކުރީ މާޗް 14، 2021 ގައެވެ. ރައީސް މުހައްމަދު ނަޝީދުގެ އިސް ނެންގެވުމަކަށް ނެދަލޭންޑްސްގެ ޑަޗް ޑޮކްލޭންޑްސް ކުންފުނިން 2011 ވަނަ އަހަރުން ފެށިގެން ހިންގަން ރާވަމުން ދިޔަ މަޝްރޫއަށް ބައެއް ބަދަލުތައް ގެނެސް ޖޫން 23، 2022 ވަނަ ދުވަހު އިތުރު އެއްބަސްވުމެއްގައި ސަރުކާރާއި ޑަޗް ޑޮކްލޭންޑްސް ކުންފުންޏާ ދެމެދު އަލުން ސޮއިކޮށްފައިވެ އެވެ.

"ފްލޯޓިން ސިޓ" ގައި 5000 ހައުސިން ޔުނިޓާއި، 35 ލަގްޒަރީ ވިލާ، އަދި 9000-1500 އަކަފޫޓުގައި ދެބުރިއަށް ހަދާ ތިންކޮޓަރީގެ އެޕާޓްމެންޓުތަކެއް ހުންނާނެއެވެ. އެޕާޓްމެންޓެއްގެ އަގުތައް އުޅެނީ 2 މިލިއަނާއި 4 މިލިއަން ރުފިޔާގެ އަދަދެކެވެ. ފްލޯޓިން ސިޓީ ހަދާނީ ނެދަލެންޑްސްގައި ބޭނުންކުރާ ޓެކްނޮލޮޖީގެ އެހީގައެވެ.