ރައީސް ޔާމީންގެ ފަރާތްޕުޅުން، ދަރިކަލުން ޒޭންގެ، ޢީދު ދުވަހުގެ ޚާއްސަ މެސެޖެއް

މި 1444 ވަނަ އަހަރުގެ ބަރަކާތްތެރި ފިތުރު ޢީދު ދުވަހުގެ ތަހުނިޔާ ކުރީގެ ރައީސް އަދި އިދިކޮޅު ރިޔާސީ ކެންޑިޑޭޓް ރައީސް އަބްދުالله ޔާމީން އަބްދުލްގައްޔޫމް ގެފަރާތްޕުޅުން އެމަނިކުފާނުގެ ދަރިކަލުން ޒޭން ޔާމީން އަރިސްކުރައްވައިފިއެވެ.

ޢީދު ދުވަހުގެ މުނާޞަބަތުގައި ރައީސް ޔާމީންގެ ފަރާތްޕުޅުން، ޢީދުގެ ތަހުނިޔާ އެންމެހައި ދިވެހި ރައްޔިތުންނަށް އަރުއްްވައި، ދަރިކަލުން ޒޭން ވަނީ އެމަނިކުފާނުގެ ޚާއްޞަ މެސެޖެއްވެސް ޢާއްމު ރައްޔިތުންނަށް އަރުއްވާފައެވެ.

އެގޮތުން އޭނާ ވަނީ، ނުހައްގު އަނިޔާތަކާއި ނަހަމަ ސިޔާސީ ނުފޫޒު ތަކާއި ދެކޮޅަށް އެންމެހައި ފަރާތްތަކުން ކުރަމުންދާ މަސައްކަތުގައި ސާބިތުވެ ތިބުމަށް ރައީސް ޔާމީންގެ ފަރާތްޕުޅުން ނަސޭހަތްތެރިވެފައެވެ.

"މި ފުރުސަތުގައި ރައީސް ޔާމީންގެ ހައްގު ގަޔާއި، ދިވެހި ގައުމުގެ ހައްގުގައި، ދިވެހި އެންމެހައި ލޮބުވެތި ރައްޔިތުން، އަދި މުވައްސަސާތަކުން، ނަހަމަ ސިޔާސީ ނުފޫޒު ތަކާއި، ނުހައްގު އަނިޔާ ތަކާއި ދެކޮޅަށް ސާބިތުވެ ތިއްބެވުމަށް ރައީސް ޔާމީންގެ ނަސޭހަތް އަޅުގަނޑު ރައްދު ކޮށްދެން"

ޒޭން ޔާމީން

ރައީސް ޔާމީން މިވަގުތު އަންނަނީ ވ. އާރަށު މުއާމަލާތާއި ގުޅުވާ ރައީސް ޔާމިންގެ މައްޗަށް އުފުލާފައިވާ ދައުވާތައް ސާބިތުވާކަމަށް ކަނޑައަޅާ މިދިޔަ ޑިސެމްބަރު މަހު ކުރި ޖަލު ހުކުމް ތަންފީޒް ކުރައްވަމުންނެވެ. އެމަނިކުފާނު މި ނިމިދިޔަ ރޯދަ މަހާއި، މި ޢީދަށް ގޭ ބަންދަށް ބަދަލު ކުރުމަށް ވަކީލުން މަސައްކަތް ކުރެއްވި ނަމަވެސް އެކަން ވާގޮތް ވަނީ ނުވެފައެވެ.

ވ. މައްސަލާގައި ރައީސް ޔާމީން ގެ މައްޗަށް ކޮށްފައިވާ އެއީ ހުކުމަކީ ނުހައްޤުން އިއްވާފައިވާ ހުކުމެއް ކަމަށް އިދިކޮޅުން އަންނަނީ ބުނަމުންނެވެ. އަދި ހައިކޯޓުގައި އޮތް އިސްތިއުނާފު މައްސަލަ އެމަނިކުފާނު ކާމިޔާބު ކުރައްވާނެކަމަށްވެސް އިދިކޮޅުން ދަނީ ބުނަމުންނެވެ.