ބޯންމައުތު އަތުން މޮޅުވެ، ގަދަހަތަރެއް ކަށަވަރުކުރުމަށް ޔުނައިޓެޑަށް މިހާރު ބޭނުންވަނީ އެންމެ ޕޮއިންޓެއް!

އިގިރޭސި ޕްރެމިއާ ލީގުގައި މިރޭ ރަށުން ބޭރުގައި 1-0 ގެ ނަތީޖާއަކުން ބޯންމައުތު ބަލިކޮށް މެންޗެސްޓާ ޔުނައިޓެޑުން ލީގުގެ ހަތަރުވަނައިގައި ތިން ޕޮއިންޓް ހޯދައިފިއެވެ.

މިރޭގެ މެޗުގެ ފުރަތަަމަ ހާފުގެ ވަރަށް ކުރީކޮޅު ޔުނައިޓެޑުން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދިއެވެ. މި ލަނޑު އެޓީމަށް ކާމިޔާބުކޮށްދިނީ ބްރެޒިލްގެ މިޑްފީލްޑަރު ކަސަމީރޯ އެވެ. މިއީ އެޓީމުގެ ޑެންމާކް މިޑްފީލްޑަރު ކްރިސްޓިއަން އެރިކްސަން ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ފުރަތަމަ ހާފުގައި މެޗުގެ ނަތީޖާ އެއްވަރުކުރުމަށް ބޯންމައުތުގެ އިގިރޭސި ފޯވާޑް ޑޮމިނިކް ސޮލަންކޭ އަށްވަނީ ހުސް ދެ ފުރުސަތު ލިބި ބޭނުންކުރެވޭ ގޮތްނުވެފައެވެ. އަދި ފުރަތަަމަ ހާފުގެ 41 ވަނަ މިނެޓުގައި އުނައިޓެޑުގެ ލީޑު ފުޅާކުރުމަށް ކަސަމީރޯ އަށް ލިބުނު ފުރުސަތުގައި އޭނާ ފޮނުވާލި ހަމަލާ ބޯންމައުތުގެ ގޯލް ކީއްޕަރު ވަނީ ދިފާއުކޮށްފައެވެ.

ދެވަަނަ ހާފުގެ 63 ވަނަ މިނެޓުގައި ބޯންމައުތުގެ ޕެނަލްޓީ އޭރިއާ ތެެރެއިން ޔުނައިޓެޑުގެ ފޯވާޑް ވެގްހޯސްޓް ފޮނުވާލި ހަމަލާ ނެޓޯ ދިފާއުކުރިއިރު، 76 ވަނަ މިނެޓުގައި ޔުނައިޓެޑުގެ މިޑްފީލްޑަރު ބުރޫނޯ ފެނާންޑޭޒް ފޮނުވާލި ހަމަލާގެ ހުރަހަކަށް ވީ ވެސް މިރޭގެ މެޗުގެ މޮޅު ކުޅުމެއް ދެއްކި ބޯންމައުތުގެ ބްރެޒިލް ގޯލްކީޕަރު ނެޓޯއެވެ.

ދެވަަނަ ހާފުގެ 84 ވަނަ މިނެޓުގައި ބޯންމައުތުގެ ވޭލްސް ފޯވާޑް ކީފަރ މޯރް އަށް ވަނީ މެޗުގެ ނަތީޖާ ހަމަހަމަ ކުރުމަށް ހުސް ފުރުސަތެއް ލިބި ބޭނުން ނުކުރެވިފައެވެ. އަދި މެޗުގެ އިތުވަގުތުގެ ތެރޭގައި އެޓީމުގެ މާކޯސް ސެނެސީ ފޮނުވާލި ހަމަލާ ޔުނައިޓެޑުގެ ކީއްޕަރު ޑޭވިޑް ޑެހެއާ ވަނީ ދިފާއުކޮށްފައެވެ.

މިރޭގެ މެޗުން ލިބުނު ތިން ޕޮއިންޓާއެކު 36 މެޗު ކުޅެގެން މެންޗެސްޓާ ޔުނައިޓެޑަށް 69 ޕޮއިންޓް ލިބިފައިވާއިރު، ފަސްވަނައިގައި އޮތް ލިވަޕޫލްއަށް 37 މެޗު ކުޅެގެން ލިބިފައިވަނީ 66 ޕޮއިންޓެވެ. އަދި ގަދަ ހަތަރެއްގެ ޖާގައެއް ކަށަވަރުކުރުމަށް ބާކީ އޮތް ދެމެޗުން މެންޗެސްޓާ ޔުނައިޓެޑް މިހާރު ބޭނުންވަނީ އެންމެ ޕޮއިންޓެކެވެ.