އިން ފަހަނައަޅާ ނުދާހާ ހިނދަކު ހުރިހާ ޤައުމަކާއި ގާތް ގުޅުން ބާއްވާނަން: ޑރ މުއިއްޒު

ޕްރޮގްރެސިވް ކޮންގްރެސް ކޯލިޝަންގެ ވެރިކަމެއްގައި ތަންފީޒު ކުރާނީ މިނިވަން އަދި ހުރިހާ ޤައުމުތަކެއްގެ މެދުގައި ހަމަހަމަކަން ޤާއިމްކުރާނެ ޚާރިޖީ ސިޔާސަތެއް ކަމަށާއި، އެ ސިޔާސަތުގައި ކަނޑައަޅާފައިވާ އިންތައް ފަހަނައަޅާ ނުދާހާ ހިނދަކު ހުރިހާ ގައުމުތަކާއި ގާތް ގުޅުމެއް ބާއްވާނެކަމަށް އެ ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒު ވިދާޅުވެއްޖެ އެވެ.

ޑރ މުއިއްޒު މިފަދައިން ވިދާޅުވެފައިވަނީ މި ރިޔާސީ އިންތިޚާބުގައި ޕްރޮގްރެސިވް ކޮންގްރެސް ކޯލިޝަންގެ މެނިފެސްޓޯ "ދިވެހީންގެ ރާއްޖެ" އިފްތިތާހުކޮށް، އެ މެނިފެސްޓޯގެ ދަށުން ބޯހިޔާވަހިކަން ކަށަވަރުކޮށްދިނުމަށް ކުރައްވާނެ ކަންކަން އިއުލާނުކުރުމަށް އާދިއްތަ ދުވަހުގެ ރޭ ހުޅުމާލޭ ފޭސް 2 ގައި ބޭއްވި ބޮޑު ޖަލްސާގައި ވާހަކަދައްކަވަމުން ނެވެ.

ޑރ މުއިއްޒުގެ ވާހަކައިގައި ވަނީ ރިޔާސީ އިންތިޚާބުގެ ސްލޯގަންއެއްގެ ގޮތުގައި "ދިވެހީންގެ ރާއްޖެ" އިޚްތިޔާރު ކުރެއްވި ސަބަބަށް އަލިއަޅުވާލައްވާފަ އެވެ. އެގޮތުން އެމަނިކުފާނު ވިދާޅުވީ މި ސަރުކާރު ވެރިކަމާއި ހަވާލުވިފަހުން ޚާރިޖީ ސިޔާސަތު އޮތީ އަވައްޓެރި އެއް ޤައުމަކަށް ބުރަވެ، އެ ގައުމުން ބުނާހާ ގޮތަކަށް ކަންކަން ހުރާ ސިޔާސަތަކަށް ބަދަލުވެފައި ކަމަށެވެ. ސީދާ އެ ޤައުމުގެ ނަން ވިދާޅުނުވި ނަމަވެސް ޑރ މުއިއްޒުގެ ވާހަކަފުޅުގައި އަވައްޓެރި ޤައުމުކަމަށް އެ ނިސްބަތްކުރެއްވީ އިންޑިއާ އަށެވެ.

އެމަނިކުފާނު ވިދާޅުވީ، ޕްރޮގްރެސިވް ކޮންގްރެސް ކޯލިޝަންގެ ވެރިކަމެއްގައި އެކަން ބަދަލުކުރައްވާނެ ކަމަށެވެ. ހުރިހާ ޤައުމަކާއި އެކުވެސް ގާތް ގުޅުމެއް ބާއްވާނެ ކަމަށާއި، އެއާ އެކުވެސް އެއްވެސް ޤައުމަކަށް ދިވެހިންގެ މިނިވަންކަމާއި އިސްތިގުލާލާއި ކުޅޭނެ ފުރުސަތު ނުދެއްވާނެ ކަމަށް ޑރ މުއިއްޒު ވިދާޅުވި އެވެ.

ޚާރިޖީ ސިޔާސަތުތައް ކަނޑައަޅާނީ މިނިވަންކަމާއި އިސްތިގުލާލު ހިމާޔަތްކޮށް ރައްކާތެރިކުރެވޭނެ އުސޫލުތަކުގެ ތެރެއިން ކަމަށާއި، އެ އުސޫލުތަކާއި ޚިލާފު ނުވާހާ ހިނދަކު، އަދި ދޭދޭ ޤައުމުތަކުން އިން ފަހަނައަޅާ ނުދާހާ ހިނދަކު، ޚާރިޖީ ސިޔާސަތު ތަންފީޒު ކުރުމުގައި ބޮޑު ޤައުމެއް ކުޑަ ޤައުމެއް ތަފާތުކުރުމެއް ނެތި ހަމަހަމަ ކަމާއެކު ގުޅުންތައް ދަމަހައްޓާނެކަމަށް ޑރ މުއިއްޒު ވިދާޅުވި އެވެ.

"އަޅުގަނޑުމެންގެ މިނިވަންކަމާއި ސިޔާދަތީ ބާރު ފަހަނައަޅާ ދާނެ ފުރުސަތެއް ނުދޭނަން. އަޅުގަނޑުމެންގެ މިނިވަންކަން އަޅުގަނޑުމެންނަށް ދެމެހެއްޓެން ޖެހޭނެ، އަޅުގަނޑުމެންގެ ސިޔާދަތު އަޅުގަނޑުމެންނަށް ހިފެހެއްޓެން ޖެހޭނެ. އެގޮތަށް ކަންކުރަން ބޭނުންވާ ހުރިހާ ފަރާތްތަކަކީ އަޅުގަނޑުމެންނާއި އެންމެ ގާތް ފަރާތްތަކަށް ވާނެ. ކުޑަ ގައުމެއް ބޮޑު ގައުމެއް، ކައިރި ގައުމެއް ދުރު ގައުމެއް ވެގެން އަޅުގަނޑުމެންގެ ޚާރިޖީ ސިޔާސަތުގައި މި ދެންނެވި އިން ފަހަނައަޅާ ނުދަންޏާ ވާނީ ހަމަހަމަ ގައުމުތަކުގެ ގޮތުގައި"

ޑރ މުޙައްމަދު މުއިއްޒު

އެކަންކަން ފާހަގަކުރައްވާ ޑރ މުއިއްޒު ވިދާޅުވީ ތަރައްގީގެ ކަންކަމަށްވުރެ ވެސް އެންމެ މުހިންމީ ޤައުމުގެ މިނިވަންކަމާއި އިސްތިގުލާލު ރައްކާތެރި ކުރުން ކަމަށެވެ.

މި ޤައުމު އަދުގެ ޖީލުތަކާއި ހަމަޔަށް ފޯރުކޯށްދީފައިވަނީ ކާބަފައިން މަތިވެރި ގުރުބާނީއެއް ވެގެން ކުރި ބުރަ މަސައްކަތުން ކަމަށާއި، އެއީ ބޭކާރުކަމަކަށް ހަދައި ގައުމުގެ މިނިވަންކަން ދޫކޮށްލައިގެން ނުވާނެކަމަށް ޑރ މުއިއްޒު ވިދާޅުވި އެވެ. އަދި ސެޕްޓެމްބަރު 9 ގައި ވޯޓުލާއިރު، އެންމެ ބޮޑަށް ވިސްނަންވީ އެ ކަންކަމާއި ދޭތެރޭގައި ކަމަށާއި، އެ ވިސްނުން ހުރިހާ ދިވެހީން ވެސް އިސްކުރުމަށް ޑރ މުއިއްޒު ވަނީ އިލްތިމާސްކުރައްވާފަ އެވެ.